Ýermeýa 28 - Мукаддес Китап

28‑нҗи бап Азурың оглы Хананя галп пыгамбер

¹ Шол йылың, ягны дөрдүнҗи йылың бәшинҗи айында Яхуда патышасы Сидкияның патышалыгының башлангыҗында гибгонлы Азурың оглы Хананя пыгамбер Реббиң ыбадатханасындакы руханылар билен әхли халкың өңүнде маңа шейле дийди:

² «Ысрайыл Худайы Хөкмүрован Реб шейле диййәр: „Бабыл патышасының боюнтырыгыны дөвдүм.

³ Бабыл патышасы Небукаднесарың бу ерден алып, Бабыла әкиден Реббиң ыбадатханасының әхли гап-гачларыны ики йылың ичинде бу ере ызына гетирерин.

⁴ Яхуда патышасы Ехоякымың оглы Еконя билен Яхудадан Бабыла сүргүн эдиленлериң әхлисини ызына бу ере гетирерин, чүнки Бабыл патышасының боюнтырыгыны дөверин“. Муны Реб айдяндыр».

⁵ Онсоң Ермея пыгамбер руханыларың ве Реббиң ыбадатханасында дуран әхли халкың гөзлериниң алнында Хананя пыгамбер билен геплешди.

⁶ Ермея пыгамбер шейле дийди: «Омын! Айданың гелсин! Гой, Реб Өз ыбадатханасының гап-гачларыны ве сүргүне гиденлериң барыны Бабылдан бу ере ызына гетирип, сениң пыгамберлик эдип айдан сөзлериңи амала ашырсын!

⁷ Инди болса саңа ве әхли халка эшитдирип айтҗак бу сөзүми диңле.

⁸ Менденем, сенденем өң яшап гечен пыгамберлер көп юртлара ве бейик патышалыклара гаршы уршы, бетбагтлыгы, мергини овалдан бәри пыгамберлик эдипдилер.

⁹ Эмма саг-саламатлыгы пыгамберлик эдйәниң сөзи хакыкатдан-да амала ашанда, диңе шонда ол пыгамбери Реббиң ёлландыгы белли болар».

¹⁰ Шонда Хананя пыгамбер Ермеяның бойнундакы боюнтырыгы чыкарып, оны дөвди.

¹¹ Онсоң Хананя әхли халкың өңүнде сөз сөзләп: «Реб шейле диййәр: „Мен ики йылың ичинде Бабыл патышасы Небукаднесарың боюнтырыгыны әхли миллетлериң бойнундан айрып, шейле дөверин“» дийди. Ермея пыгамбер болса өз ёлуна гитди.

¹² Хананя пыгамбер Ермея пыгамбериң бойнундакы боюнтырыгы дөвенинден соңра, Ермея Реббиң сөзи аян болды:

¹³ «Бар, Хананя Реб шейле диййәр дийип айт: „Сен агач боюнтырыгы дөвдүң, эмма онуң ерине демир боюнтырык ясарсың!

¹⁴ Чүнки Ысрайыл Худайы Мен Хөкмүрован Реб бу миллетлериң хеммеси Бабыл патышасы Небукаднесара гуллук этсинлер дийип, бойнуна демир боюнтырык салдым, олар оңа гуллук эдерлер. Онуң ыгтыярына хатда ябаны хайванлары-да бердим“».

¹⁵ Онсоң Ермея пыгамбер Хананя пыгамбере шейле дийди: «Эй, Хананя, инди эшит! Сени Реб ёлламады, эмма сен бу халкы ялан геплере ынандырдың.

¹⁶ Мунуң үчин Реб шейле диййәр: „Ине, Мен сени ер йүзүнден согруп ташларын. Шу йыл өлерсиң, чүнки сен Реббиң гаршысына гепледиң“».

¹⁷ Шейлеликде, Хананя пыгамбер шол йылың единҗи айында өлди.