Ýermeýa 23 - Мукаддес Китап

23‑нҗи бап Догручыл Шаха

¹ «Мениң өримиң гоюнларыны ёк эдип, даргадян чопанларың вай халына! Муны Реб айдяндыр.

² Шонуң үчин Ысрайыл Худайы Реб халкымы бакян чопанлар хакда шейле диййәр: „Сиз Мениң сүрими даргатдыңыз, ковдуңыз, олары идетмедиңиз. Ине, Мен ярамаз ишлериңиз зерарлы сизи җезаландырарын. Муны Реб айдяндыр.

³ Сүримиң галанларыны олары даргадан әхли юртларымдан йыгнарын, олары гайтадан агылларына гетирерин; олар көпелерлер, өрңәрлер.

⁴ Олара чопанлар гоярын, олар инди горкмазлар, хедер этмезлер ве йитирим болмазлар. Муны Реб айдяндыр.

⁵ Ине, Мениң Давудың неслинден бир догручыл Шаха чыкарҗак гүнлерим гелйәр; муны Реб айдяндыр. Ол ша тагтына чыкып, пайхаслы хөкүм сүрер, юртда адалат ве догручыллык билен херекет эдер.

⁶ Онуң дөврүнде Яхуда халас болар, Ысрайыл ховпсуз яшар. Оны: ‘Реб – бизиң Хакперверимиздир!’ дийип атландырарлар.

⁷ Шонуң үчин хем шейле гүнлер гелер, мундан бейләк ‘Ысрайыл халкыны Мүсүр юрдундан чыкаран Реббиң барлыгындан ант ичйәрин’ дийилмез. Муны Реб айдяндыр.

⁸ Муңа дерек: ‘Ысрайыл халкының тохум-тиҗини демиргазык юрдундан ве даргадан юртларындан чыкарып гетирен Реббиң барлыгындан ант ичйәрин’ дийилҗек гүнлер гелер. Олар өз юртларында яшарлар“».

Галп пыгамберлер

⁹ Пыгамберлер хакында: Йүрегим ичимде сынды, әхли сүңклерим сандыраяр. Реб себәпли, Онуң мукаддес сөзлери себәпли мен серхош адам кимин, шерабың есири кимин болдум.

¹⁰ Чүнки юрт зынахорлыкдан долудыр, юрт нәлет зерарлы яс тутяр, чөлүң өрүлери гураяр. Адамлар пис ёла дүшүп, гүйчлерини зорлуга сарп эдйәр.

¹¹ «Пыгамбер-де, руханы-да худайсыздыр, оларың пислигини хатда Өз өйүмде-де гөрдүм. Муны Реб айдяндыр.

¹² Мунуң үчин йөрейән ёллары олара гараңкыдакы сүрчек ер кимин болар, ол ерде бүдрәп йыкыларлар. Чүнки җеза йылы оларың башына бела гетирерин. Муны Реб айдяндыр.

¹³ Самария пыгамберлериниң арасында Мен бу неҗис иши гөрдүм: Багалың адындан пыгамберлик эдип, олар Мениң халкым ысрайылы аздырдылар.

¹⁴ Иерусалимиң пыгамберлериниң арасында-да айылганч зат гөрдүм: олар зына эдйәрлер, ялана эерйәрлер, яманлык эдйәнлери гүйчлендирйәрлер, шейдип, хич ким эрбетликден эл чекмейәр. Мениң үчин оларың әхлиси Содом кимин, болды Иерусалимиң илаты Гомора кимин.

¹⁵ Шонуң үчин пыгамберлер хакында Хөкмүрован Реб шейле диййәр: „Мен олара аҗы ёвшан ийдирҗек, зәхерли сув ичирҗек. Чүнки Иерусалим пыгамберлериниң худайсызлыгы тутуш юрда яйрады“.

¹⁶ Хөкмүрован Реб шейле диййәр: „Өзүңизе пыгамберлик эдйән пыгамберлериң сөзлерини диңлемәң, олар сизе бидерек затлар өвредйәрлер. Олар Реббиң агзындан чыкан сөзлери дәл-де, өз йүреклериниң хыялыны сөзлейәрлер.

¹⁷ Олар Мени йигренйәнлере хемише ‘Реб сизе парахатлык болар дийди’ диййәрлер. Кесирлик билен өз яман ниетлерине эерйәнлере ‘Башыңыза бетбагтлык гелмез’ диййәрлер.

¹⁸ Реббиң сөзүни эшидип, гөрмек үчин, ким Онуң маслахатында болды? Онуң сөзүни ерине етирмек үчин, ким Оңа гулак асды?

¹⁹ Ине, Реббиң гызгын газабы, харасады гопуп, газаплы ловлаян харасады эрбетлериң башына инер.

²⁰ Йүрегиниң ниетини амала ашырянча, Реббиң гахар оды ятышмаз. Сиз муңа ахыркы гүнлерде дүшүнерсиңиз.

²¹ Бу пыгамберлери Мен ёлламадым, оларың өзлери ылгадылар. Олар билен геплешмедим, өзлеринден пыгамберлик этдилер.

²² Эмма олар маслахатымы алсадылар, халкыма сөзлерими эшитдирердилер, шонда халкы яман ёлларындан, шер ишлеринден гайтарардылар.

²³ Эйсем Мен диңе якындакы Худаймы? Узакдакы Худай дәлми? Муны Реб айдяндыр.

²⁴ Гизлин ерлерде букуланы Мениң гөрмеҗек гүманым бармы? Муны Реб айдяндыр. Асманы хем ери Мен долдурмаярынмы? Муны Реб айдяндыр.

²⁵ Мениң адымдан галп пыгамберлик эдйән пыгамберлериң ‘Дүйш гөрдүм, дүйш гөрдүм!’ дийишлерини эшитдим.

²⁶ Ялан сөзлейән, өз йүрек хилелерини беян эдйән пыгамберлериң калбында бу хачана ченли довам эдер?

²⁷ Багал себәпли ата-бабалар Мениң адымы унутдылар. Инди бу пыгамберлер хем бири-бирине гүррүң берйән дүйшлери аркалы халкыма Мениң адымы унутдырҗак болярлар.

²⁸ Пыгамбер өз гөрен бош дүйшлерини гүррүң бериберсин, эмма Мениң сөзүми эшиден хер кес сөзүми хакыкы беян этсин. Хей-де, бугдайы саман билен деңәп болармы? Муны Реб айдяндыр.

²⁹ Мениң сөзүм от кимин, гаяны бөлек-бөлек эдйән токмак кимин дәлмидир? Муны Реб айдяндыр.

³⁰ Мунуң үчин Мен бири-бирлеринден сөзүми огурлаян пыгамберлере гаршыдырын. Муны Реб айдяндыр.

³¹ ‘Реб шейле диййәр’ дийип, өз биленлерини айдян пыгамберлере Мен гаршыдырын“. Муны Реб айдяндыр.

³² Реб шейле диййәр: „Мен ялан дүйшлер билен пыгамберлик эдйәнлере гаршыдырын. Олар бу дүйшлери айдып, ялан сөзлери ве бош өвүнмелери билен Мениң халкымы аздырярлар. Олары Мен ёлламадым, олара Мен табшырык бермедим. Оларың бу халка асла пейдасы ёк“. Муны Реб айдяндыр.

³³ Бу халк я-да бир пыгамбер, я болмаса бир руханы сенден: „Ребден гелен пыгамберлик йүки нәме?“ дийип сораса, сен олара: „Сизиң өзүңиз йүк ахырын. Мен сизи терк эдерин“ дийип җогап бер. Муны Реб айдяндыр.

³⁴ Эгер бир пыгамбер, руханы я-да халкың ичинден бири „Бу Ребден гелен пыгамберлик сөзи“ дийсе, ол адамы хем, онуң тутуш хоҗалыгыны хем җезаландырарын.

³⁵ Сиз өз араңызда бири-бириңизден: „Реб нәме җогап берди? Реб нәме дийди?“ дийип сорамалысыңыз.

³⁶ Эмма мундан бейләк Ребден гелен пыгамберлик сөзүни агзамарсыңыз, чүнки хер кес өз сөзүни пыгамберлик сөзи дийип сайяр. Шейдип, сиз дири Худайың, Хөкмүрован Худайымыз Реббиң сөзлерини ёйдуңыз.

³⁷ Сиз пыгамберден: „Реб саңа нәме җогап берди? Нәме дийди?“ дийип сорамалысыңыз.

³⁸ Эмма сиз: „Ребден гелен пыгамберлик сөзи“ диййәрсиңиз. Муны Реб айдяндыр. Мен сизе бу сөзлери айтмаң дийип хабар иберен хем болсам, сиз „Ребден гелен пыгамберлик сөзи“ диен сөзлери ене айтдыңыз.

³⁹ Шонуң үчин хем Мен сизи терк эдип, сизи-де, өзүңизе ве ата-бабаларыңыза берен шәхерими-де хузурымдан айрып ташларын.

⁴⁰ Үстүңизе хич вагт унудылмаҗак эбедилик утанч ве түкениксиз рысвалык гетирерин».