Ýermeýa 17 - Мукаддес Китап

17‑нҗи бап Яхуданың гүнәси

¹ «Яхуданың гүнәси демир галам билен язылды. Бу оларың йүреклериниң гатына, гурбанлык сыпаларының шахларына чакмак дашы билен оюлып язылды.

² Хер гүр япраклы агаҗың янындакы ве бейик байырдакы гурбанлык сыпалары, Ашера бутлары оларың чагаларының ядындадыр.

³ Сениң байлыгыңы ве тутуш хазыналарыңы юрдуңда эден гүнәлериңиң төлеги хөкмүнде олҗа эдип пайларын.

⁴ Саңа берен мүлкүми өз гүнәң билен йитирдиң. Мен сени танамаян юрдуңда душманларыңа гул эдерин, чүнки сиз Мениң газабымы туташдырдыңыз, ол эбедилик ловлар».

Реббе бил багла!

⁵ Реб шейле диййәр: «Ынсана бил баглан, ынсаның гүйҗүне даянан, йүреги Ребден дашлашан адама нәлет болсун!

⁶ Ол чөлдәки бир чалы ялыдыр, ягшылык геленде оны гөрмез. Гурак чөлде, илатсыз шорлукда яшар.

⁷ Реббе бил баглан, Реббе даянан адам нәхили багтлы!

⁸ Ол сувуң якасында отурдылан агач киминдир, чешмәниң боюнда көкүни яйрадар. Ыссыдан горкян дәлдир, япрагы хемише яшылдыр. Йыл гурак геленде хем гайга батмаз, миве бермекден асла галмаз».

⁹ Ынсан йүреги әхли затдан хилегәрдир, халыс ёлдан чыкандыр. Оңа ким дүшүнип билер?

¹⁰ «Мен-Реб хер ынсана тутан ёлуна, эден ишлерине гөрә җеза бермек үчин, ынсаның йүрегини барлаярын, пикирлерини сынаярын».

¹¹ Харам байлык топлан өз гузламадык юмуртгаларының үстүнде отуран кәкилик киминдир. Өмри ярпы боланда, ол байлык элден гидер, өмрүниң ахырында болса ол акмак болуп чыкар.

¹² Мукаддес өйүмиз овал-башдан беленде гөтерилен шөхратлы тагт киминдир.

¹³ Я Реб! Эй, Ысрайылың Умыды! Сени терк эденлериң бары утанҗа галар. «Менден йүз өвренлер тоз-топрага сиңип гидерлер, чүнки олар Мен Ребби – дири сувлар чешмесини, терк этдилер».

¹⁴ Я Реб, маңа шыпа бер, сагалайын. Мени халас эт, халас болайын, чүнки өвгим диңе Сенсиң.

¹⁵ Ине, олар маңа: «Реббиң сөзи ниреде? Ханы, ол амала ашсын-да!» диййәрлер.

¹⁶ Мен хызматыңда чопан болмакдан гачмадым. Бетбагтлык гүнүниң гелмегини-де ислемедим. Агзымдан чыкян хер бир сөзи Өзүң билйәнсиң, я Реб, ол сөз хузурыңда аяндыр.

¹⁷ Мени ховп астына салма, бетбагтлык гүни пенакәрим Сенсиң.

¹⁸ Гой, мени ызарлаянлар утанҗа галсын, эмма мени утанҗа гойма. Гой, олар горка дүшсүн, эмма мени горка салма. Башларындан бетбагтлык гүнүни индерип, гоша гыргынчылык билен ёк эт олары.

¹⁹ Реб маңа шейле дийди: «Яхуда патышаларының гирип-чыкян Халк дервезеси билен Иерусалимиң әхли дервезелерине гит-де, ол ерде дур.

²⁰ Онсоң халка шейле дий: „Эй, Яхуда патышалары, тутуш Яхуда ве бу дервезелерден гирйән әхли Иерусалим илаты, Реббиң сөзүне гулак асың!“».

²¹ Реб шейле диййәр: «Өз җаныңызың хатырасына Сабат гүни йүк гөтермәң, Иерусалимиң дервезелеринден ичери йүк салмаң.

²² Сабат гүни өйүңизден йүк чыкармаң, хич бир иш этмәң. Мениң ата-бабаларыңыза буйрушым ялы, Сабат гүнүни мукаддес хасаплаң.

²³ Эмма олар Мени диңлемедилер, гулак асмадылар. Бойнуёгынлык эдип, Мени диңлемедилер, тербийәми алмадылар».

²⁴ Реб ене шуны айдяндыр: «Эгер сиз Маңа гулак асып, Сабат гүни бу шәхериң дервезелеринден йүк салмасаңыз, хич бир иш этмән, Сабат гүнүни мукаддес хасапласаңыз,

²⁵ онда Давут тагтында отурҗак патышалар өз эмелдарлары билен сөвеш арабаларына, атлара мүнүп, яхуда халкы ве Иерусалимиң илаты билен бирликде бу шәхериң дервезелеринден гирерлер. Бу шәхер эбеди илатлы болар.

²⁶ Яхуда шәхерлеринден, Иерусалимиң этрапларындан, бенямин топрагындан, гүнбатар байырлыкдан, даглыкдан ве Негепден адамлар гелерлер. Олар Реббиң өйүне якма гурбанлыклары билен бейлеки гурбанлыклары, галла садакасыны, якымлы ыслы түтетги билен шүкүр садакасыны гетирерлер.

²⁷ Эмма Мени диңлемесеңиз, Сабат гүни Иерусалимиң дервезелеринден йүкли гирип, Сабат гүнүни мукаддес хасапламасаңыз, онда Мен шәхериң дервезелерини ода берерин. От Иерусалимиң ички галаларыны якып яндырар, ол хич вагт сөнмез».