Ýermeýa 12 - Мукаддес Китап

12‑нҗи бап Ермея Реббе налыш эдйәр

¹ Я Реб, Сениң билен давалашсам, Сен хемише хаклы чыкярсың. Эмма ене-де адалат барада Сениң билен гүрлешмек ислейәрин. Нәме үчин эрбетлең ёлы ровачланяр? Нәме үчин хайынлар асуда яшаяр?

² Олары Сен отуртдың, көк урдулар. Өсүп-улалып, миве бердилер. Сениң адың диллеринден дүшмейәр, эмма йүреклери Сенден узакдыр.

³ Мени болса, я Реб, Сен танаярсың, мени гөрйәрсиң, Өзүң хакдакы пикирлерими сынаярсың. Олары союлмалы гоюн кимин чыкар-да, союлҗак гүни үчин тайярла.

⁴ Хачана ченли юрт яс тутуп, отлар саралып солар? Ол ерде яшаянлаң пис ишлеринден яңа хайванлар билен гушлар йитип гитдилер. Чүнки бу халк диййәр: «Ол бизе нәме болҗагыны гөрмейәр».

Реб Ермея җогап берйәр

⁵ Эй, Ермея, пыядалар билен ылгап ядаян болсаң, онда атлылар билен нәдип ярышҗак? Эгер ховпсуз юртда бүдрейән болсаң, онда Иордан җеңңелинден нәдип чыкҗак?

⁶ Саңа хатда доган-гарындашларың, өз машгалаң-да хайынлык этди. Еңсәңден сеслерине бат бердилер. Йүзүңе ягшы сөзлер айтсалар-да, ынанмавери сен олара.

⁷ Мен халкымы терк этдим, мирасымы ташладым, җандан сөййән халкымы душманларының элине бердим.

⁸ Мирасым Мениң үчин токайдакы арслан кимин болды. Маңа тарап награ чекди, шонуң үчин Мен оны йигренйәрин.

⁹ Мирасым назарымда гыргы дей болдумы? Хер тарапдан вагшы гушлар үстүне чозды. Гидиң-де, әхли ябаны хайванлары топлаң, гой, олар мирасымы ювудып-ялмасынлар.

¹⁰ Көп чопанлар үзүм багымы вейран этдилер, экин мейданымы депеләп тоздурдылар, аҗайып меллегими такыр чөле өвүрдилер.

¹¹ Оны харабачылыга дөндердилер, хараба ичинде хузурымда аглаяр. Тутуш юрт вейран болды, эмма хич кимиң пиңине-де дәл.

¹² Чөлдәки әхли депелере талаңчылар гелдилер. Чүнки юрдуң бир четинден бейлекисине ченли Реббиң гылыҗы хеләк эдер, хич ким аман галмаз.

¹³ Олар бугдай экип, тикен ордулар, гара зәхмет чекип, хайыр гөрмедилер. Реббиң гахар-газабындан яңа алан хасылларына утансынлар.

¹⁴ «Ысрайыл халкым үчин берен мүлкүме эл уран әхли эрбет гоңшуларымы юртларындан согруп ташларын. Яхуда халкыны-да оларың арасындан согруп ташларын. Муны Реб айдяндыр.

¹⁵ Хеммесини согруп ташланымдан соң, олара ене йүрегим авар. Оларың хер бирини өз мүлкүне, өз топрагына гайтарып гетирерин.

¹⁶ Халкыма Багалың адындан ант ичмеги өвредишлери ялы, өзлери-де халкымың ёлларыны ыхлас билен өвренип: „Ребден ант ичйәрин“ дийип, Мениң адымдан ант ичмеги өвренселер, онда олар-да халкымың арасында орнашарлар.

¹⁷ Эмма гулак асмадык хер бир миллети көки билен бүтинлей гопарып ташларын ве ёк эдерин».