Ýermeýa 11 - Мукаддес Китап

11‑нҗи бап Ысрайыл ве яхуда халкы әхти бозяр

¹ Ермея Реббиң шу сөзи аян болды:

² «Бу әхтиң шертлерине гулак гой. Яхуда халкы билен Иерусалим илатына беян эт.

³ Олара Ысрайыл Худайы Реб шейле диййәр дий: „Бу әхтиң шертлерине гулак асмадык адама нәлет болсун!

⁴ Мен ата-бабаларыңызы Мүсүрден – демир оҗагындан чыкаран гүнүм олара шейле буйрук бердим: ‘Мениң сөзүме гулак асып, Мениң буйран әхли табшырыкларымы ерине етириң. Шонда сиз Мениң халкым, Мен хем сизиң Худайыңыз боларын.

⁵ Шейтсеңиз, Мен ата-бабаларыңыза сүйт ве бал акян юрды бермеги ант ичип, берен сөзүми ерине етирерин’. Ине, гөршүңиз ялы, оны сизе бердим“». Онсоң мен: «Гой, шейле болсун, я Реб!» дийип җогап бердим.

⁶ Реб маңа бу сөзлериң хеммесини Яхуданың шәхерлеринде, Иерусалимиң көчелеринде җар эт-де, шуны айт дийди: «Бу әхтиң сөзлерине гулак асың, олары берҗай эдиң.

⁷ Чүнки Мен сизиң ата-бабаларыңызы Мүсүрден чыкаран гүнүмден тә шу гүне ченли дынгысыз „Сөзүме гулак асың“ дийип, берк дуйдурыш берип гелдим.

⁸ Эмма олар диңлемедилер, гулак асмадылар, гайтам, кесирлик билен өз яман ниетлерине эерип, херси өзүче херекет этди. Мунуң үчин Мен бу әхтиң әхли сөзлерини оларың башларындан индердим. Мен олара булары берҗай этмеги буйрупдым, эмма олар этмедилер».

⁹ Реб маңа шейле дийди: «Яхуда халкы билен Иерусалимиң илатының арасындакы дилдүвшүгиң үсти ачылды.

¹⁰ Олар ене-де сөзлериме гулак асмак ислемедик ата-бабаларының этмишлерине тарап доландылар. Башга худайларың ызына дүшүп, олара гуллук этдилер. Ысрайыл ве яхуда халкы өзлериниң ата-бабалары билен эден әхтими боздулар.

¹¹ Шонуң үчин хем Реб шейле диййәр: „Мен оларың башындан бела индерерин, олар гачып, гутулып билмезлер. Олар Маңа дады-перят эдерлер, эмма Мен олары диңлемерин.

¹² Онсоң Иерусалимиң ве Яхуда шәхерлериниң илаты гидип, өзлериниң садака берен худайларына дады-перят эдерлер, эмма бетбагтлык геленде, бу худайлар олары асла халас этмез.

¹³ Чүнки худайларың саны шәхерлериң саны билен деңдир, эй, Яхуда! Сиз Иерусалимиң көчелериниң санына гөрә утанчлы затлар үчин гурбанлык сыпаларыны, Багал бутуна гурбанлыклар хөдүр этмек үчин гурбанлык сыпаларыны гурдуңыз.

¹⁴ Эй, Ермея, сен-де бу халк үчин дилег этме, олар үчин дады-перят этме, ялбарма, чүнки бетбагтчылыга учрап, Мени чагыранларында, олары диңлемерин.

¹⁵ Көп пис ишлер эденинден соң, сөйгүли халкымың Мениң өйүмде нәме иши барка? Хатда Реббе багыш эдилен эт көмек этмез. Сиз пислик этмекде шатланярсыңыз.

¹⁶ Реб саңа ‘Мивеси датлы, яшыл япраклы зейтун агаҗы’ дийип ат берди. Эмма гүйчли галмагаллы гопгун билен оны ода берер, онуң шахалары янып күл болар.

¹⁷ Ысрайыл билен яхуда халкы пислик этди, олар Багал бутуна садакалар хөдүр эдип, Мениң гахарымы гетирдилер. Шонуң үчин сени экип отурдан Мен Хөкмүрован Реб башыңдан бетбагтлык индермеги карар этдим“».

Халк Ермея гаршы хиле гураяр

¹⁸ Шол вагт Реб халкың эден писликлерини маңа гөркезди. Ол муны маңа әшгәр этди. Я Реб, оларың эден ишлерини маңа аян этдиң.

¹⁹ Мен болсам дамагы чалынмага әкидилен юваш бир гузы киминдим. Оларың: «Гелиң, агаҗы мивеси билен ёк эделиң, мундан бейләк онуң ады ятланмаз ялы, оны дирилериң юрдундан кесип ташлалың» дийип, мениң гаршыма хиле гуряндыкларыны билмедим.

²⁰ Эмма, эй, адалатлы хөкүм эдйән, йүреклери ве пикирлери сынаян Хөкмүрован Реб! Давамы Саңа аян эдйәрин, олардан алҗак өҗүңи гөрейин!

²¹ Шонуң үчин хем сениң җаныңың кастына чыкып: «Сен Реббиң адындан пыгамберлик этмели дәлсиң, ёгсам бизиң элимизден өлерсиң» диййән анатот халкы хакында Хөкмүрован Реб шейле диййәндир.

²² Хава, Хөкмүрован Реб шейле диййәр: «Мен олары җезаландырарын. Оларың яш йигитлери гылычдан гечирилер, огулдыр-гызлары ачлыкдан өлерлер.

²³ Олардан аман галаны болмаз. Чүнки вагты геленде, Мен анатот халкының башындан бетбагтлык индерерин».