Ýermeýa 10 - Мукаддес Китап

10-нҗы бап Бутлардан горкмаң!

¹ Эй, ысрайыл халкы, Реббиң сизе айдян сөзүни диңләң.

² Реб шейле диййәр: «Гөгүң аламатларындан горкмаң, олардан диңе миллетлер горкяндыр. Миллетлериң ёлундан гөрелде алмаң.

³ Халкларың дәп-дессурлары бошдур, токайдан кесилен агаҗа уссаның гуралы шекил берйәр.

⁴ Оны алтын-күмүш билен безәп, гымылдамаз ялы, чекич билен чүйләп беркидйәрлер.

⁵ Оларың бутлары экин гарантгасы ялы, гепләп билйән дәлдирлер. Йөрәп билмейәндиклери үчин олары гөтерип әкитмелидир. Олардан горкмаң: Чүнки олар не яманлык эдерлер, не-де ягшылык».

⁶ Саңа меңзеш ёкдур, я Реб. Сен бейиксиң, гудратда адың бейикдир.

⁷ Сенден горкмаҗак бармы, эй, миллетлер Шасы?! Чүнки бу диңе Саңа ярашяндыр. Миллетлериң әхли акылдарларының, бар патышалыкларының арасында Сениң ялысы ёкдур.

⁸ Оларың бары акмак хем акылсыздыр. Бидерек бутлардан тәлим алярлар, олар гуран агачдан ясаландыр!

⁹ Таршышдан – енҗилен күмүш, Упаздан алтын гетирилйәр. Уссаның хем зергәриң хүнәридир бутлар, гөк хем гырмызы эшик гейдирерлер олара, барысы хем өкде хүнәрментлериң ишидир.

¹⁰ Эмма Реб хакыкы Худайдыр, Ол дири Худай хем бакы Патышадыр. Онуң гахарындан титрейәр тутуш ер, газабына гаршы дуруп билмез миллетлер.

¹¹ «Олара шейле дий: „Гөги хем ери яратмадык худайлар ер йүзүнден ве гөгүң астындан ёк боларлар“».

¹² Ери Өз гудраты билен ярадан Ребдир. Ол пайхасы билен дүнйәни беркарар этди, акылы билен гөклери яйды.

¹³ Ол гүрләнде, шаглаяр гөкдәки сувлар, гөтерилйәр ериң учларындан булутлар. Ягыш үчин йылдырымлар чакдыряр, аммарларындан шемал өвүсдирйәр.

¹⁴ Хер бир адам акмак хем надандыр, хер зергәр ясан бутларындан уяда галар, олар ясаландыр, оларда җан ёкдур.

¹⁵ Булар бидерекдир, масгарабазлаң ишидир; җезаландыранымда олар ёк боларлар.

¹⁶ Эмма Якубың пайы бейле дәлдир, чүнки әхли затлары ярадан Худайдыр, Ысрайыл тиреси Онуң мирасыдыр, Онуң ады Хөкмүрован Ребдир.

Бетбагтлык гелйәр

¹⁷ Эй, габавда отуранлар, шайыңызы тутуң!

¹⁸ Чүнки Реб шейле диййәр: «Ине, бу гезек Мен бу юрдуң илатыны узаклара ташларын. Гөрсүнлер дийип, үстлерине бела индерерин».

¹⁹ Чекйән хасратымдан яңа дат гүнүме! Ярам агыр, эмма мен: «Догруданам, бу мениң дердим, муны чекмегим герек» дийдим.

²⁰ Чадырым йыкылды, үзүлди әхли танаплары. Чагаларым ташлап гитдилер мени, ёк олар инди. Чадырымы тәзеден дикмәге, хич ким ёк перделерими асмага.

²¹ Чүнки азашдылар чопанлар акылындан, Ребби агтармадылар. Шонуң үчин болмады угруна ишлери, даргады әхли сүрүлери.

²² Диңләң, бир хабар гелйәр! Яхуда шәхерлерини харабалыга, шагаллар сүренине өвүрмек үчин демиргазык юртдан улы гопгун гелйәр.

²³ Я Реб, мен ынсаның ёлуның өз элинде дәлдигини, догры әдим басмагың ыгтыярында дәлдигини билйәрин.

²⁴ Газабың билен дәл-де, адалатың билен, я Реб, мени тербиеле! Ёгсам мени хич эдерсиң.

²⁵ Газабыңы дөк Сени танамаян миллетлериң, адыңы чагырмаян халкларың үстүнден. Чүнки олар Якубың неслини ялмадылар, оны ювудып, ёк этдилер, меканыны вейран этдилер.