Ýakup 5 - Мукаддес Китап

5‑нҗи бап Байлара дуйдурыш

¹ Гулак асың, эй, байлар, башыңыза инҗек бетбагтчылыклар үчин перят эдип аглаң!

² Байлыгыңыз чүйрәп, эшиклериңизи гүе иендир.

³ Алтындыр күмшүңиз посландыр, оларың посы сизиң гаршыңыза шаятлык эдип, бедениңизи от кимин иер. Сиз ахыркы гүнлерде байлык топладыңыз.

⁴ Экинлериңизи оран оракчылары алдап, иш хакыны бермедиңиз, бу шол пулларың перядыдыр. Оракчыларың дады-перяды Хөкмүрован Реббиң гулагына етди.

⁵ Сиз бу дүнйәде болчулыкда ве кейпи-сапада яшадыңыз, өзүңизи кыямат гүни союлмак үчин семретдиңиз.

⁶ Өзүңизе гаршы чыкмаса-да, бигүнә адамы хөкүм эдип өлдүрдиңиз.

Сабыр-такатлы болуң!

⁷ Эй, доганлар, Реб гелйәнчә, сабыр-такатлы болуң! Середиң, дайхан гүйзки хем язкы ягша нәхили сабырлы гарашяр. Ол топрагың бол хасыл берерине гарашяр.

⁸ Сиз хем сабыр-такатлы болуң! Мерт болуң, себәби Реббиң гелҗек гүни голайлады.

⁹ Эй, доганлар, өзүңизе хөкүм эдилмез ялы, бири-бириңизиң гаршыңыза шикаят этмәң. Ине, Казы босагада дур!

¹⁰ Эй, доганлар, башына дүшен эҗирлерде сабыр-такатлы болуп, Реббиң адындан геплән пыгамберлерден гөрелде алың.

¹¹ Билшиңиз ялы, биз чыдамлылык гөркезенлере багтлы диййәрис. Сиз Эйюбың чыдамлылыгы хакда эшиденсиңиз, иң соңунда онуң үчин Реббиң нәмелер эдендигини-де билйәнсиңиз. Хава, Реб мерхеметли ве рехим-шепагатлыдыр.

¹² Озалы билен, эй, доганларым, хөкүм эдилмезиңиз ялы, гөкденем, ерденем, махласы хич затдан ант ичмәң. Җогабыңыз диңе «хава» я-да, «ёк» болсун.

Дога-дилег этмегиң гүйҗи

¹³ Араңызда бири эҗир чекйәрми? Гой, ол Худая дога этсин. Бириниң кейпи көкми? Худая алкыш нагмаларыны айтсын.

¹⁴ Араңызда бири сыркавмы? Ол йыгнагың ёлбашчыларыны янына чагырсын, олар хем Реббиң адындан оңа яг гуюп, онуң үчин Худая дога этсинлер.

¹⁵ Иман билен эдилен дога-дилег нәсага шыпа берер, Реб оны аяга галдырар. Эгер ол гүнә газанан болса, онуң гүнәси гечилер.

¹⁶ Шыпа тапар ялы, гүнәлериңизи бири-бириңизиң янында боюн алып, бири-бириңиз үчин дога-дилег эдиң. Догручыл адамың ыхласлы дилеги гүйчли ве тәсирлидир.

¹⁷ Ыляс хем бизиң ялы адаты бир ынсанды. Ол ягыш ягмасын дийип, ыхлас билен дилег этди. Шейлеликде, үч йыл алты айлап ер йүзүне ягыш ягмады.

¹⁸ Соңра ол ене дилег этди ве асмандан ягыш ягып, ер хасыл берди.

^19-20 Доганларым, шуны ятда саклаң: эгер араңыздан бири хакыкат ёлундан азашса ве башга бири оны ене ёла салса, гүнәкәри догры ёла салан адам бир җаны өлүмден халас эдип, көп гүнәлериниң үстүни өртйәндир.