Ýakup 4 - Мукаддес Китап

4‑нҗи бап Худая табын болуң!

¹ Араңыздакы чакнышыклы говгалар ве дава-җенҗеллер ниреден дөрейәр? Калбыңызда сөвеш эдйән пис хөвеслериңизден дәлми?

² Сиз ислейәрсиңиз, эмма хич зат газанмаярсыңыз; адам өлдүрйәрсиңиз, гөриплик эдйәрсиңиз, эмма хич бир максадыңыза етип билмейәрсиңиз; дава-җенҗелдир галмагал турузярсыңыз, эмма хич зат газанмаярсыңыз, себәби Худайдан дилемейәрсиңиз.

³ Диләниңизде-де, хич зат алмаярсыңыз, себәби яман ниет билен, өз небсиңизи доюрмак үчин дилейәрсиңиз.

⁴ Эй, бивепалар, дүнйә билен достлук Худая душман боляндыгыны билмейәрсиңизми? Ким дүнйә билен достлашса, Худая душман боляндыр.

⁵ Сиз Мукаддес Язгылардакы Худайың бизе берен ынсанлык рухы өрән габанҗаңдыр дийлен сөзлер бош ере айдыландыр өйдйәрсиңизми?

⁶ Эмма Худай бизе хас бейик мерхемет берйәр. Шоңа гөрә Мукаддес Язгылар шейле диййәр: «Худай текепбирлере гаршыдыр, эмма песпәл адамлара мерхемет эдйәндир».

⁷ Шонуң үчин Худая табын болуң! Иблисе гаршылык гөркезиң, шонда ол сизден гачар.

⁸ Худая якынлашың, Ол хем сизе якынлашар. Эй, гүнәкәрлер, элиңизи гүнәден тәмизләң. Эй, икигөвүнлилер, калбыңызы пәкләң.

⁹ Гама батың, яс тутуп аглаң! Гүлкүңиз яса, шатлыгыңыз гам-гусса өврүлсин.

¹⁰ Реббиң хузурында өзүңизи пес тутуң, Ол сизи бейгелдер.

¹¹ Эй, доганлар, бири-бириңизи яманламаң. Ким доганыны яманлаян я-да оны язгарян болса, ол Худайың кануныны яманлап, оны язгаряндыр. Кануны язгарян адам болса оны берҗай эдиҗи дәл-де, оңа казылык эдиҗидир.

¹² Эмма Канун Чыкарыҗы ве Казы бирдир, Ол халас этмеги-де, хеләк этмеги-де башаряндыр. Башга адамлара казылык эдер ялы, сен ким болупсың?

Текепбирлик этмәң

¹³ Инди: «Бу гүн я эртир пылан шәхере гитҗек, бир йылы шол ерде гечирҗек, сөвда-сатык этҗек, пул газанҗак» диййәнлер, маңа гулак асың!

¹⁴ Эртир нәме болҗагыны ниреден билйәрсиңиз?! Сизиң өмрүңиз нәме? Ол аз салым гөрнүп, соңра йитирим болян сәхер чыгы ялыдыр.

¹⁵ Муңа дерек: «Реб оңласа, яшарыс, оны я-да муны эдерис» диймелисиңиз.

¹⁶ Сиз болса өз текепбирлигиңиз билен өвүнйәрсиңиз. Бейле өвүнмелериң бары эрбетликдир.

¹⁷ Ким ягшылык этмеги билибем, оны этмейән болса, ол гүнә эдйәндир.