Ýakup 3 - Мукаддес Китап

3‑нҗи бап Дилиңизе эрк эдиң

¹ Эй, доганларым, хеммәңиз йыгнакда өвредиҗи болмаң! Себәби биз өвредиҗилериң хас берк хөкүме дучар болҗакдыгымызы билйәнсиңиз.

² Бизиң хеммәмиз хем көп гүнә эдйәрис. Эмма сөзүнде хата гойбермән, дилини җылавлап билйән адам кәмил болуп, тутуш беденине гөзегчилик эдип билйәндир.

³ Биз атларың табын болмагы үчин, агзына агыззырык дакып, оларың тутуш гөвресини доландырярыс.

⁴ Ине, гәмилере середиң! Олар гүйчли хем батлы еллер билен ковулса-да, бир кичиҗик күрек аркалы сүрүҗиниң ислән тарапына өврүлйәр.

⁵ Эдил шунуң ялы, дил хем бедениң бир кичиҗик агзасы болса-да, бейик ишлер билен өвүнйәндир. Пикир эдиң, кичиҗик бир учгун әпет токайы якып көйдүрйәндир.

⁶ Дил хем бир отдур, беден агзаларының арасындакы яманлык дүнйәсидир. Ол тутуш барлыгыңызы вейран эдйәндир, довзах оды билен бүтин дурмушыңызы көйдүрйәндир.

⁷ Ынсан хер дүрли хайванлара, гушлара, сүйрениҗилере, деңиз җандарларына диенини этдирендир ве этдирйәндир.

⁸ Эмма хич бир ынсан дилине диен этдирип билйән дәлдир. Дил гутармаян пислик болуп, өлдүриҗи зәхерден долудыр.

⁹ Дилимиз билен биз Реббимизи ве Атамызы алкышлаярыс, шол бир вагтың өзүнде хем Худайың кешбинде ярадылан ынсанлары нәлетлейәрис.

¹⁰ Алкыш ве нәлет бир агыздан чыкяр. Эй, мәхрибанларым, бу бейле болмалы дәлдир.

¹¹ Хей-де, бир булагың гөзбашындан хем аҗы, хем сүйҗи сув акармы?

¹² Доганларым, инҗир агаҗы зейтун я-да үзүм агаҗы инҗир мивесини берерми? Ёк! Эдил шонуң ялы, шор сувлы гөзбашдан сүйҗи сув акмаз!

Хакыкы даналык

¹³ Араңызда дана хем парасатлы адам бармы? Эгер бар болса, гой, ол муны догры дурмушы ве даналыкдан чыкян песпәллиги билен битирен оңат ишлеринде гөркезсин.

¹⁴ Эмма калбыңызда бахыллык ве мен-менлик бар болса, онда даналык билен өвүнмәң. Бу аңрыбаш яланчылык болар!

¹⁵ Бейле «даналык» гөкден инен дәлдир, ол дүнъеви болуп, рухы дәлдир, шейтандандыр.

¹⁶ Чүнки бахыллыгың, мен-менлигиң бар еринде бидүзгүнчиликлер ве хер дүрли пыссы-пыҗурлыклар хем бардыр.

¹⁷ Эмма гөкден инен даналык илки билен пәкликдир, соңра парахатлык сөйүҗиликдир, мылайымлык ве өзара ылалашыклыкдыр. Ол мерхеметден ве хайырлы ишлерден долудыр. Шейле даналык тарапгөйлик ве икийүзлүлик этмейәр.

¹⁸ Парахатлык дөредйәнлер парахатчылык тохумыны сепип, догрулык хасылыны орярлар.