Ýakup 2 - Мукаддес Китап

2‑нҗи бап Тарапгөйлик этмәң

¹ Эй, доганларым, шөхратлы Реббимиз Иса Месихе болан иманыңыз себәпли тарапгөйлик этмекден сакланың.

² Айдалы, сизиң йыгнагыңыза алтын йүзүк дакынып, непис эшиклер гейнен бай адам билен көне-сана гейнен гарып адам гелипдир.

³ Сиз бай адама хормат гоюп: «Гелиң, төре гечиң» дийсеңиз, эмма гарыба: «Сен ол ерде дур» я-да «Бу ерде, аяк астында отур» дийсеңиз,

⁴ бу сизиң тарапгөйлик этдигиңиз болмазмы? Эгер шейле этсеңиз, эрбет пикирли казылара меңзәрсиңиз.

⁵ Гулак асың, эй, сөйгүли доганларым! Худай бу дүнйәде гарыплары имана бай болмаклары үчин сайламадымы? Худай Өзүни сөййәнлере вада берши ялы, гарыплары Шалыгыны мирас алмаклары үчин сайламадымы нәме?

⁶ Эмма сиз гарыплары масгара эдйәрсиңиз. Ёгсам сизе сүтем эдйән байлар дәлми? Сизи казыете сүйрейән хем шолар дәлми?

⁷ Сизиң дегишли болан Худайыңызың бейик адына дил етирйәнлер хем байлар дәлми нәме?

⁸ Эгер сиз Мукаддес Язгылардакы: «Якыныңы өзүңи сөйшүң ялы сөй» диен иң мөхүм буйругы ерине етирйән болсаңыз, догры иш эдйәнсиңиз.

⁹ Эмма адамлара тарапгөйлик эдйән болсаңыз, гүнә эдйәнсиңиз ве Мукаддес Кануның өңүнде кануны бозан хасапланянсыңыз.

¹⁰ Кимде-ким кануның хемме парзларыны берҗай эдип-де, диңе бир затда гүнә этсе, тутуш кануны бозан хасапланяндыр.

¹¹ Себәби «Зына этме» диен Худай «Адам өлдүрме» хем диендир. Эгер сиз зына этмесеңиз, эмма адам өлдүрсеңиз, кануны бозан җенаяткәр болянсыңыз.

¹² Шонуң үчин хем, хер бир гепиңиз ве херекетиңиз азатлык берйән канун боюнча хөкүм эдилҗек адамларыңкы ялы болсун.

¹³ Себәби рехимсиз адама рехимсизлик билен хөкүм эдилер. Рехимли адама болса рехимлилик билен хөкүм эдилер.

Иман ве оңат ишлер

¹⁴ Эй, доганларым! Араңыздан бири «иманым бар» дийибем, оны оңат ишлер билен гөркезмесе, мунуң нәме пейдасы бар?! Бейле иман оны халас эдип билерми?!

¹⁵ Пикир эдип гөрүң, иманлы эркек я-да аял доганыңызың бири ач-ялаңач болса,

¹⁶ сиз оңа иймит, гейим бермән, диңе: «Саг-аман бар, дашыңың йылап, гарныңың доймагыны дилейәрин» дийсеңиз, бу сөзүңиз оңа нәмә деркар?

¹⁷ Иман бабатда хем шейледир, эгер иш йүзүнде гөркезилмесе, ол өз-өзүнден өлүдир.

¹⁸ Кәбириниң: «Сениң иманың бар, мениң болса оңат ишлерим» диймеги мүмкин. Эмма мен айдярын, ханы, оңат ишлер этмезден маңа иманыңы гөркез, мен хем саңа иманымы оңат ишлерим аркалы гөркезейин!

¹⁹ Сен Худайың еке-тәкдигине ынанярсың. Говы эдйәрсиң! Муңа хатда арвах-җынлар хем ынанярлар ве галпылдаярлар.

²⁰ Эй, акмак, амалсыз иманың пейдасыздыгыны билеңокмы?

²¹ Атамыз Ыбрайым гурбанлык сыпасында өз оглы Ысхагы хөдүрлемек билен акланмадымы эйсем?

²² Серет, онуң иманы билен амаллары бирликде херекет этди ве иманы шу амалда кәмил болды.

²³ Шейлелик билен, Мукаддес Язгылардакы: «Ыбрайым Худая иман этди ве Худай оны догры хасаплады» диен сөз амала ашды. Ыбрайым Худайың досты дийип атландырылды.

²⁴ Гөрдүңми, ынсан диңе бир иман билен дәл, эйсем, эден ишлери аркалы хем акланяндыр.

²⁵ Эдил шунуң ялы, лолы Рахап хем эден иши аркалы акланды. Ол ысрайыл ичалыларыны өйүнде гизләп, олара башга ёлдан гачып гитмәге көмек этди.

²⁶ Эдил җансыз бедениң өли болшы ялы, амалсыз иман хем өлүдир.