Wagyz 9 - Мукаддес Китап

9-нҗы бап Хеммәниң такдыры бирдир

¹ Буларың хеммесини йүрегимде саклап, шейле нетиҗә гелдим: догрулар, дана адамлар ве оларың ишлери Худайың элинде. Сөйгиниң гарашяндыгыны я-да йигренҗиң гарашяндыгыны ынсан билйән дәлдир.

² Хеммәниң такдыры бирдир: догручылың-да, писиң-де, ягшының-да, яманың-да, тәмизиң-де, харамың-да, гурбанлык берйәниң-де, гурбанлык бермейәниң-де такдыры бирдир. Ягшы адама нәме болса, гүнәкәре-де шол болар; ант ичйәне нәме болса, ант ичмекден горкяна-да шейле болар.

³ Гүнүң астында эдилйән ишлериң иң яманы шудур: хеммәниң такдыры бир. Ине, ынсанларың йүреги писликден долудыр; өмүрлериниң довамында йүреклеринде телбелик бар. Соңра олар өлүлере гошуляндырлар.

⁴ Әхли яшаянларың арасындакы хер кес үчин умыт бар; чүнки дири ит өли ёлбарсдан ягшыдыр.

⁵ Яшаянлар өлҗекдигини билйәндирлер, йөне өлүлер хич зат билйән дәлдир. Олар үчин мундан бейләк пешгеш болмаз, хатда олары ятламазлар хем.

⁶ Оларың сөйгүси, йигренҗи ве габанҗаңлыгы эййәм ёк боландыр. Өлүлер Гүнүң астында болуп гечйән әхли затлара гошулып билмезлер.

⁷ Гит-де, чөрегиңи шатлык билен ий, шерабыңы гөвнүхошлук билен ич; чүнки Худай сениң эден ишлериңден эййәм разы болды.

⁸ Эшигиң мыдама ак болсун; башыңың хошбой ыслы ягы кемлик этмесин.

⁹ Гүнүң астында өзүңе берлен бош өмрүң бүтин довамында сөййән аялың билен дурмушдан леззет ал, чүнки дурмушдан, Гүнүң астында чекйән зәхметиңден галан пайың будур.

¹⁰ Элиң этмәге нәме тапса, оны бар гүйҗүң билен эт, чүнки сениң барян өлүлер диярыңда не иш, не дүшүнҗе, не билим, не-де даналык болар.

¹¹ Гүнүң астында ене бир зат гөрдүм: ярыш йүврүклериңки дәл, сөвеш-де гүйчлүлериңки; чөрек даналарыңкы дәл, байлык-да дүшүнҗелиниңки; мәхир-де билимлиниңки дәлдир. Чүнки хер кес аматсыз вагта ве хадыса дучар боляндыр.

¹² Ынсан хачан хасрат гелҗекдигини билйән дәлдир. Залым тора дүшен балыклар кимин, дузага дүшен гушлар кимин ынсанлар хем үстүне бетбагтлык дуйдансыз иненде, тора дүшйәрлер.

Даналык ве наданлык хакдакы ойланмалар

¹³ Гүнүң астында мен ене бир даналыгы гөрдүм, мениңче ол җуда ваҗып.

¹⁴ Аз илатлы бир кичи шәхер барды. Бир гүйчли патыша оңа хүҗүм эдип, оны габады; гаршысына әпет габав десгаларыны гурдурды.

¹⁵ Бу шәхерде бир дана гарып тапылды, ол шәхери пайхасы билен халас этди. Эмма хич ким бу гарыбы ятламады.

¹⁶ Онсоң мен дийдим: «Даналык гүйчден говудыр», йөне гарып адамың пайхасы әсгерилмейәр, онуң сөзлери эшидилмейәр.

¹⁷ Акыллының имисалалыкда айдан сөзлери, акылсызларың арасындакы хөкүмдарың гыкылыгындан говудыр.

¹⁸ Акылдарлык уруш ярагларындан говудыр, йөне бир гүнәкәр көп ягшылыклары ёк эдйәндир.