Wagyz 7 - Мукаддес Китап

7‑нҗи бап Даналарың маслахаты

¹ Ягшы ат хошбой ыслы ягдан, өлүм гүни доглуш гүнүнден говудыр.

² Яс өйүне гитмек той өйүне гитмекден говудыр. Чүнки хер кесиң ахыры өлүмдир; яшаянлар муны ятда сакласынлар.

³ Гусса гүлкүден ягшыдыр, чүнки йүзүң гамгын болмагындан йүрек говуланяндыр.

⁴ Акыллының йүреги яс өйүндедир; акылсызың йүреги болса хезиллик өйүндедир.

⁵ Биакылың айдымындан акыллының кәйинҗи ягшыдыр.

⁶ Догрудан-да, акылсызың гүлкүси газаның астында янян яндагың шатырдысы ялыдыр. Бу-да бидерек.

⁷ Харам газанч акыллыны акылындан азашдыряр, пара йүреги аздыряр.

⁸ «Өңүм геленден соңум гелсин» дийлендир; сабырлы текепбирден говудыр.

⁹ Тизгахар болма, чүнки гахар акылсызларың гурсагында орнашяр.

¹⁰ «Нәме үчин гечен гүнлер бу гүнден говуды?» дийип сорама, чүнки бу совалы пайхас билен сорамаярсың.

¹¹ Даналык мирас кимин говудыр; дүнйәде яшаянлар үчин хайырлыдыр.

¹² Даналыгың саясы пулуң саясы киминдир. Билимиң бәхбиди будур: даналык оңа эе боланлара яшайыш берйәр.

¹³ Худайың ишине серет; Онуң эгрелденини ким догралдып билйәр?

¹⁴ Ягшы гүнде шат бол, гара гүнде муны ятла: ынсан өзүнден соң нәме болҗагыны билмесин дийип, Худай ягшылыгы-да, бетбагтлыгы-да яратды.

Нетиҗесиз дурмуш

¹⁵ Нетиҗесиз өмрүмде бар зады гөрдүм: догры адам догрулыгында ёк боляр, пис адам пислигинде өмрүни узалдяр.

¹⁶ Өте догры болма, өте акылдарлык этме. Нәме үчин өзүңи хеләк этҗек?

¹⁷ Гаты эрбет болма, акмагам болма. Нәме үчин өз вагтыңдан өң өлмели?

¹⁸ Бу дуйдурышларың бирине япышып, бейлекисинден эл чекмезлигиң говудыр, чүнки Худайдан горкян адам булары тутар.

¹⁹ Пайхас дана адамы шәхердәки он хөкүмдардан хас гүйчли эдйәндир.

²⁰ Догрусы, ер йүзүнде диңе ягшылык эдип, хич бир гүнә этмейән догры адам ёк.

²¹ Адамларың диййән хер сөзүне үнс берме, ёгсам хызматкәриң саңа эдйән гаргышыны эшидерсиң.

²² Сениң хем башгалара телим гезек гаргандыгыңы калбың билйәндир.

²³ Буларың барыны пайхас билен сынадым; «Дана боларын» дийдим. Эмма ол менден узакды.

²⁴ Узак, гаты чуң болан зады ким тапып билер?

²⁵ Мен акылдарлыгы, сорагларымың җогабыны билмәге, агтарып тапмага, пислигиң акмаклыкдыгыны, акмаклыгың телбеликдигини билмәге йүрегими гөнүкдирдим.

²⁶ Дузак кимин, йүреги гапандыр тор кимин, эллери зынҗыр кимин болан аялы өлүмден аҗы гөрдүм. Худайы хошал эдйән адам ол аялдан гачып гутуляр, йөне гүнәкәр онуң элине дүшйәр.

²⁷ Ине, Вагызчы шейле диййәр: «Сорагларымың җогабыны тапмак үчин бир-бирден санап чыкдым;

²⁸ йүрегим өвран-өвран агтарды, йөне мен тапмадым. Мүң кишиниң арасындан бир догры адамы тапдым, йөне оларың әхлисиниң арасындан бир догры аялы-да тапмадым.

²⁹ Ине, мен муны билдим: Худай ынсаны догры эдип яратды, йөне олар көп тосламалар ойлап тапдылар».