Wagyz 6 - Мукаддес Китап

6-нҗы бап Ынсан үчин нәмәниң говудыгыны ким билйәр?

¹ Гүнүң астында гөрен бир эрбет задым бар, бу ынсана аграм саляр.

² Худай адама байлык, мал-мүлк ве абрай берйәр, әхли ислән задындан кемлик эдйәни ёк, йөне оңа булардан леззет алмага мүмкинчилик бермейәр, оны бир кесеки иййәр. Бу бидерек, эрбет дертдир.

³ Эгер бир адам йүз чаганың атасы болуп, көп йыл яшаса, өмри узак болуп, йөне дурмушың нәз-ныгматларындан леззет алмаса, хормат билен җайланылмаса, мениң үчин өли доглан чага ондан говудыр.

⁴ Чүнки өли чага бидерек догуляр, гараңкылык ичинде йитип гидйәр, ады гараңкылыга өртүлйәр.

⁵ Шейле хем ол не Гүни гөрди, не-де бир зат билди. Эмма бу чаганың рахатлыгы ол адамыңкыдан артыкдыр.

⁶ Ол адам ики мүң йыл яшаса-да, абаданлыкдан леззет алса-да, ахырында бейлекилер ялы ол хем өтүп гитмейәрми?

⁷ Ынсаның бар зәхмети агзы үчиндир, йөне шонда-да ол хич канагатланмаз.

⁸ Акыллының акылсыздан нәме артыгы бар? Гарып ынсанларың өңүнде нәхили гезмелидигини билсе-де, мунуң оңа нәме хайры бар?

⁹ Барыңа канагат этмек калбың арзув этмесинден ягшыдыр. Бу-да бидерек, салгыма чапмак.

¹⁰ Нәме бар болса, оңа эййәм ат гойландыр; ынсаның нәмедиги беллидир. Ол өзүнден гүйчли билен давалашып билмез.

¹¹ Көп сөз бидереклиги артдыряр; мунуң ынсана нәме пейдасы бар?

¹² Бидерек дурмушында, көлеге кимин гечип гидйән гысга өмрүниң гүнлеринде ынсан үчин нәмәниң говудыгыны ким билйәр? Бу дүнйәден гиденден соң, Гүнүң астында нәме болҗакдыгыны ынсана ким айдып билер?