Wagyz 5 - Мукаддес Китап

5‑нҗи бап Худайдан горкмалы

¹ Хич хачан алңасаклык билен геплеме, Худайың хузурында йүрек сөзүни айтмага ховлукма; чүнки Худай гөкдедир, сен ердесиң. Шонуң үчин аз сөзле.

² Дүйшүң гайгы-аладаның көпдүги үчин гелши ялы, самсык геп-де, көп сөзлүликден гелйәндир.

³ Худая айдылан худайёлыңы гиҗикдирме. Чүнки Худай акылсызлардан хошал дәлдир; вадаңы берҗай эт.

⁴ Вада бермезлик вада берип, оны берҗай этмезликден ягшыдыр.

⁵ Дилиң саңа гүнә этдирмесин; Худайың илчисиниң өңүнде: «Вадам сәвлик» дийме. Нәме үчин Худай сениң сөзүңе гахарланып, эллериңиң ишини ёк этсин?

⁶ Көп хыяллылык ве бош сөзлер бидерекдир; сен Худайдан горк.

Ынсана зәхметинден леззет алмак ярамлыдыр

⁷ Эгер юртда гарыпларың эзилишини, адалатың ве догрулыгың бозулышыны гөрсең, муңа хайран галма; чүнки хер ёкары везипелиниң үстүнден өзүнден ёкары баштутан гоюляр ве оларың үстүнде өзлеринден ёкары боланлар бар.

⁸ Хеммелер экин мейдандан пейда гөрйәр, хатда патыша хем ондан гирдеҗи аляр.

⁹ Пулы сөййән, пулдан доймаз, байлыгы сөййән-де, газанчдан. Бу-да бидерек.

¹⁰ Харытлар көпеленде, оны иййәнлер-де көпелйәндир; гөзлери билен гөрмекден башга эесине ондан нәме хайыр бар?

¹¹ Аз ийсе-де, көп ийсе-де, зәхметкешиң укусы сүйҗүдир. Эмма байың байлыгы оны укудан саклар.

¹² Гүнүң астында бир эрбет дерт гөрдүм: топланан байлык эесине зелел гетирди.

¹³ Байлык бетбагтчылык билен ёк болуп гитди. Чагалары болса-да, олара бермәге хич зат галмаз.

¹⁴ Энесинден нәхили доглан болса, бу дүнйәден шейле-де гидер. Зәхметинден хич бир зады элинде гөтерип, өзи билен әкидип билмез.

¹⁵ Бу-да бир эрбет дертдир: нәхили гелен болса, шейле-де гидер. Бош ере чекен зәхметиниң оңа нәме хайры бар?

¹⁶ Өмүрбойы чөрегини гараңкылык, гайгы-гуссалык, хассалык ве газап ичинде иййәндир.

¹⁷ Ине, мениң гөреним шудур: ынсана ийип-ичип, Худайың өзүне берен гысга өмрүниң ичинде Гүнүң астында чекйән бүтин зәхметинден леззет алмак ярамлыдыр; чүнки бу онуң такдырыдыр.

¹⁸ Шейле хем Худай бир адама байлык, мал-мүлк берип, оңа булардан леззет алмага, такдырына кайыл болуп, өз зәхметинден леззет алмага кувват берен болса, бу Худайың пешгешидир.

¹⁹ Ынсан өмрүниң гүнлерини көп ятламаз, чүнки Худай онуң калбыны шатлык билен эелейәр.