Wagyz 4 - Мукаддес Китап

4‑нҗи бап Дүнйәниң эзъетлери

¹ Мен ене Гүнүң астында эдилйән бар зулумлары гөрдүм. Эзилйәнлериң гөзяшларыны гөрдүм, олара теселли берйән ёкды. Гүйч олары эзйәнлериң элиндеди, эзилйәнлере теселли берйән ёкды.

^2-3 Биреййәм өлүп гиденлери дирилерден багтлы сайдым. Эмма энтек догулмадык, Гүнүң астында эдилйән пис ишлери гөрмедик, буларың икисинден-де багтлыдыр.

⁴ Мен ене-де бир адамың бар чекен зәхметиниң, уссатлык билен эден әхли ишлериниң гоңшусына болан гөриплик зерарлы эдилендигини гөрдүм. Бу-да бидерек, салгыма чапмак.

⁵ «Акылсыз голуны говшурып отурып, өзүни хеләк эдйәр».

⁶ Эмма бир овуч асудалык ики овуч зәхметден ве салгыма чапмакдан говудыр.

⁷ Мен Гүнүң астында ене-де бир бидереклик гөрдүм:

⁸ Ине, бир ялңыз адам барды; онуң не оглы барды, не-де доганы. Чекйән зәхметиниң соңы ёкды, йөне шонда-да гөзи байлыкдан доймаярды. Ол: «Мен ким үчин зәхмет чекйәрин? Ким үчин өзүми леззет алмакдан махрум эдйәрин?» дийип сорады. Бу-да бидерек, ёвуз юмуш.

⁹ Ики адам бир адамдан ягшыдыр, чүнки зәхметлери үчин ягшы музд алярлар.

¹⁰ Эгер бири йыкылса, бейлекиси ёлдашыны галдырар. Эмма йыкыланда еке боланың халына вай! Йыкылса оны галдырҗак ёкдур.

¹¹ Ики киши биле ятса, йылнарлар; эмма еке киши нәхили йылнып билер?

¹² Бириниң еке кишиден үстүн чыкмагы әхтимал, йөне ики киши оңа гаршылык гөркезер. Үч тар йүп аңсатлык билен үзүлмез.

¹³ Маслахата гулак гоймаян гарры, акылсыз патышадан гарып, акыллы йигит ягшыдыр.

¹⁴ Хакыкатдан-да, өз юрдунда гарып доглан хем болса, бендиликден бошан патыша болуп билер.

¹⁵ Мен Гүнүң астында гезип йөрен әхли ынсанларың, патышаның орнуны эелән бу йигидиң ызына эерйәндигини гөрдүм.

¹⁶ Онуң баштутанлык эдйән әхли халкы сан-саҗаксызды. Эмма соң геленлер ондан разы болмазлар. Элбетде, бу-да бидерек, салгыма чапмак.

¹⁷ Худайың өйүне гиден махалың херекетлериңе эсеван эт; Худайы диңлемек үчин хузурына гелмек, акылсызлар тарапындан хөдүрленен гурбанлыкдан оңатдыр; чүнки олар яманлык эдйәнлерини билйән дәлдирлер.