Wagyz 3 - Мукаддес Китап

3‑нҗи бап Хер задың өз вагты бар

¹ Хер задың өз мөврити бар, гөгүң астында хер задың өз вагты бар:

² Догулмагың өз вагты бар, өлмегиң өз вагты; экмегиң өз вагты бар, ормагың өз вагты.

³ Өлдүрмегиң өз вагты бар, шыпа бермегиң өз вагты; юмурмагың өз вагты бар, дикелтмегиң өз вагты.

⁴ Агламагың өз вагты бар, гүлмегиң өз вагты; яс тутмагың өз вагты бар, танс этмегиң өз вагты.

⁵ Дашлары пытратмагың өз вагты бар, даш үйшүрмегиң өз вагты; гуҗак ачмагың өз вагты бар, ондан сакланмагың өз вагты.

⁶ Агтармагың өз вагты бар, йитирмегиң өз вагты, сакламагың өз вагты бар, зыңмагың өз вагты.

⁷ Йыртмагың өз вагты бар, тикмегиң өз вагты; дыммагың өз вагты бар, геплемегиң өз вагты.

⁸ Сөймегиң өз вагты бар, йигренмегиң өз вагты; уршуң өз вагты бар, парахатчылыгың өз вагты.

Ынсаның пайы

⁹ Ишлейәне чекйән зәхметинден нәме пейда бар?

¹⁰ Ынсанлара ишли боларлары ялы Худайың берен ишини гөрдүм.

¹¹ Худай әхли зады өз вагтында гөзел этди. Шейле хем эбедилиги ынсаның йүрегине салды, йөне шонда-да олар Худайың овалдан ахыра ченли эден ишини аңлап билмезлер.

¹² Ынсан үчин шатланмакдан ве өмүрбойы ягшылык этмекден говы задың ёкдугыны билйәрин.

¹³ Хер кесиң ийип-ичип, өз бар зәхметинден леззет алмагы Худайың берен сылагыдыр.

¹⁴ Мен Худайың эден хер ишиниң эбеди галҗакдыгыны билйәрин; оңа хич зады гошуп болмаз, ондан хич зады айрып болмаз. Худай бу ишлерини хеммелер Өзүнден горксунлар дийип этди.

¹⁵ Хәзир нәме бар болса, ол өң хем боландыр; гелҗекде болҗак хәзир хем бардыр. Худай өтени ене гайтаряр.

¹⁶ Мен ене Гүнүң астында казылыкда адалатың дерегине-де, догрулыгың дерегине-де пислигиң бардыгыны гөрдүм.

¹⁷ Ичимден: «Худай догры адама хем, эрбет адама хем казылык эдер; чүнки Худайың Өзи хер меселе, хер иш үчин вагт белледи» дийдим.

¹⁸ Ынсанлар барада ичимден: «Өзлериниң хайванлар ялыдыкларыны гөрсүнлер дийип, Худай ынсанлары сынаяр» дийдим.

¹⁹ Ынсанларың-да, хайванларың-да такдыры бирдир. Бири нәхили өлйән болса, бейлекиси-де шейле өлйәр; хеммесиниң бир деми бар; адам хайвандан үстүн дәлдир, чүнки бары бидерек.

²⁰ Әхлиси бир ере гидйәр; әхлиси топракдандыр, әхлиси-де ене топрага доланяр.

²¹ Ынсанларың рухы ёкарык галярмы, хайванларың рухы ашак ере инйәрми, ким билйәр?

²² Шейдип, мен ынсана өз эден ишинден леззет алмакдан башга ягшы задың ёкдугыны гөрдүм, чүнки бу онуң муздудыр. Дүнйәден өтенден соң, нәме болҗагыны гөркезмек үчин хич ким ынсаны ызына гетирип билмез.