Wagyz 12 - Мукаддес Китап

12‑нҗи бап

¹ Җуванлыгыңда, агыр гүнлер гелмәнкә, «олардан леззет алмарын» дийҗек йылларың голайлашманка, өзүңи Яраданы ятла.

² Сениң үчин Гүн, ышык, Ай, йылдызлар гаралманка, ягышдан соң булутлар ызына гайтманка, Оны ятла.

³ Шол гүн өйи гораянлар титрешерлер, гүйчли адамлар эглерлер, эл дегирмени билен дәне үвейәнлер ишини тогтадарлар, себәби оларың саны аздыр, пенҗиреден середйәнлериң гөзлери гараңкыраяр.

⁴ Көчә ачылан гапылар япылар, дегирмениң сеси кесилер; адамлар гуш сесине оянарлар, гызларың нагмасы кесилер.

⁵ Бейикликден горкарлар, ёллар горкулы болар; бадам агаҗы гүлләр, чекиртге өзүни зор билен чекер, хөвес йитер, чүнки ынсан өз эбеди өйүне гидер, яс тутянлар көчелерде айланышарлар.

⁶ Күмүш зынҗыр гырылманка, алтын кәсе дөвүлмәнкә, булак башындакы күйзе овранманка, гуйының башындакы чарх дөвүлмәнкә,

⁷ ердәки топрак овалкы ягдайына өврүлмәнкә, рух оны берен Худайың янына доланып барманка, өзүңи Яраданы ятла.

⁸ Вагызчы: «Бидерек! Бидерек! Бары бидерек!» диййәр.

Соңкы сөз

⁹ Вагызчы дана болмакдан башга-да халка билим хем өвретди. Ол гөзлег гечирип, өвренип, көп пәхимлери ерли-еринде гойды.

¹⁰ Вагызчы якымлы сөзлери тапмага чалышды. Онуң язанлары догры ве хак сөзлерди.

¹¹ Дананың сөзлери чишлер киминдир; топланан пәхимли сөзлер берк какылан чүйлер ялыдыр. Пәхимли сөзлер бир чопан тарапындан берлендир.

¹² Булардан башга-да, эй, оглум, сак бол. Көп китап язмагың соңы ёкдур, көп окамак беден үчин аргынлыкдыр.

¹³ Хемме зат айдылды. Нетиҗе шудур: Худайдан горк ве Онуң табшырыкларыны сакла, чүнки бу ынсаның эсасы борҗудыр;

¹⁴ хер бир ише, гизлин болан хер ише – исле ягшы болсун, исле яман – Худай казылык эдер.