Wagyz 1 - Мукаддес Китап

1‑нҗи бап Бар зат бидерекдир

¹ Бу Иерусалимде патышалык эден Давудың оглы Вагызчының сөзлеридир.

² Вагызчы: «Бидерек! Бидерек! Бары бидерек!» диййәр.

³ Ынсан Гүнүң астында чекйән зәхметинден нәме пейда тапяр?

⁴ Бир несил гидип, бир несил гелйәр; эмма бу дүнйә эбедилик галяр.

⁵ Гүн догяр, яшяр; өз догҗак ерине тарап ховлугяр.

⁶ Ел гүнорта тарап өвүсйәр, соңра демиргазыга өврүлйәр. Ол төвереге айланып-айланып, ене өз айлавына доланяр.

⁷ Әхли дерялар деңзе акяр, эмма деңиз долмаяр. Дерялар тәзеден акмак үчин өз акян ерине доланярлар.

⁸ Бар зат иризйәр. Муны сөз билен беян эдип болмаз. Гөз гөрмекден доймаяр, гулак-да эшитмекден.

⁹ Нәме болан болса, ене шол болар, нәме эдилен болса, ене шол эдилер. Гүнүң астында тәзе зат ёк.

¹⁰ «Серет, ине, шу тәзе» дийип болҗак зат бармы? Ол овалдан барды, бизден өңем болупдыр.

¹¹ Өңки болуп гечени хич ким ятламаз; индики гелҗеклер-де хәзирки хем соңкы болҗак затлары ятламаз.

Пайхаса эе болмак салгыма чапмак ялыдыр

¹² Мен, Вагызчы, Иерусалимде Ысрайылың патышасыдым.

¹³ Гөгүң астында эдилйән әхли затлар барада пайхас билен гөзлег хем барлаг гечирмеги йүрегиме дүвдүм. Ишли болсунлар дийип, бу Худайың ынсанлара берен агыр юмшудыр.

¹⁴ Гүнүң астында эдилйән әхли ишлери гөрдүм; ине, бары бидерек, салгыма чапмак.

¹⁵ «Эгрини гөнелдип болмаз; ёк зады-да санап болмаз».

¹⁶ Өз-өзүме шейле дийдим: «Ине, мен бейик болуп, пайхасда өзүмден өң Иерусалимде хөкмүрованлык эденлериң хеммесинден оздум. Йүрегим пайхас билен билиме байды».

¹⁷ Акылдарлыга, телбеликдир акмаклыга дүшүнмәге йүрегими бердим. Мунуң-да салгыма чапмакдыгыны билдим.

¹⁸ «Пайхас нәче көп болса, гусса-да шонча көпдүр. Билимини артдырянлар, дердини-де артдыряндырлар».