Titus 3 - Мукаддес Китап

3‑нҗи бап Иманлылара гелишйән йөрелге

¹ Эй, оглум, иманлылара хәли-шинди шулары ятладып дур: гой, олар хөкүмдарлара ве ыгтыярлылара гулак асып, олара табын болсунлар, ислендик вагт ягшылык этмәге тайын болсунлар.

² Хич кими яманламасынлар, дава-җенҗелден гача дуруп, мылайым ве хеммелере юмшак болсунлар.

³ Бирвагтлар биз хем аң-дүшүнҗесиз, бойнуёгын болуп, ёлдан азашыпдык, дүрли хөвеслериң, кейпи-сапаның гулларына өврүлипдик, гахарҗаңдык, гөрипдик ве бирек-биреги йигренйәрдик.

⁴ Эмма Халасгәримиз Худайың мәхремлиги, ынсана болан сөйгүси әшгәр боланда,

⁵ биз догрулыга даянып эден ишлеримиз аркалы дәл-де, Онуң рехим-шепагаты аркалы халас эдилдик. Худай бизи Мукаддес Рух аркалы өзгердип, гайтадан доглуш аркалы тәмизледи.

^6-7 Биз Худайың мерхемети билен акланып, Онуң бакы яшайша умыт баглаян мирасдүшерлери болар ялы, Худай бизе Халасгәримиз Иса Месих аркалы Мукаддес Рухы болдан-бол эчилди.

⁸ Бу сөзлериң бары хакыкатдыр. Худая иман эденлериң ягшылык этмекде илерлемеклери үчин, бу затлары ныгтамагыңы ислейәрин. Бу затлар ынсанлар үчин оңат ве пейдалыдыр.

⁹ Бош чекелешиклерден, несил дарагтлары ве Мукаддес Канун хакдакы дава-җенҗеллерден гача дур. Себәби булар пейдасыз, бидерек затлардыр.

¹⁰ Агзалалык дөредйән адама бирки гезек өвүт-несихат бер. Эмма шонда-да пәлинден гайтмаса, ондан гача дур.

¹¹ Бейле адамың ёлдан азашып, гүнә эдйәндигини, хөкүм эдилмә тутарык берйәндигини өзүң-де билйәнсиң.

Ислеглер ве саламлар

¹² Мен Артамы я-да Тихики сениң яныңа ёлламакчы. Олардан бири барандан соң, гайрат эдип, Никополисе, мениң яныма гелҗек бол. Себәби мен гышы шу ерде гечирмеги йүрегиме дүвдүм.

¹³ Канунчы Зенасы ве Аполлоны ёла салмаздан өң, оларың ёл шайларының гурат болмагы барада алада эт.

¹⁴ Бизиңкилер хем мивесиз өмүр сүрмез ялы, мәтәчлере ярдам бермек аркалы ягшылык этмеги адат эдинсинлер.

¹⁵ Мениң янымдакыларың әхлиси саңа салам айдяр. Сен хем бизи сөййән иманлы доганларымызың барына салам айт. Гой, Худайың мерхемети сизиң барыңыза яр болсун!