Titus 2 - Мукаддес Китап

2‑нҗи бап Сагдын таглымат хакындакы өвүт-үндевлер

¹ Сен болса сагдын таглымата лайык гелйән затлары өврет.

² Гоҗалара парасатлы, хормата мынасып, өзлерине эрк эдип билмеклери, иман, сөйги ве сабыр-такат бабатда сагдын болмакларыны үнде.

³ Шонуң ялы, гарры аяллар хем гыбата, шераба йыкгын этмән, терсине, Худайың халкына гелишйән тәрде яшап, хеммелере ягшы затлары өвретмеклерини үнде.

^4-5 Худайың Хош Хабарына дил етирилмез ялы, гой, бу гарры аяллар гелинлере өз әрлерини, чагаларыны сөймеги, өзлерине эрк этмеги, пәк ахлаклы, өйлери бабатда ыхласлы, мылайым ве әрлерине табын болмагы өвретсинлер.

⁶ Яш йигитлере хем өзлерине эрк этмеги үнде.

⁷ Ягшы ишлериң билен олара әхли затда гөрелде бол. Таглыматы сап йүрекден аграслык билен өврет,

⁸ сөзлериң мүйнсүз ве шүбхесиз болсун. Шонда бизе гаршы чыкянлар яманламага геп тапман, утанҗа галарлар.

⁹ Гуллара өз хоҗайынларына хер затда табын болмагы ве оларың гөвнүнден турмагы үнде. Олар хоҗайынлара дил гайтармасынлар,

¹⁰ зат огурламасынлар, гайтам хер затда өрән вепалы болсунлар. Шейдип, олар Халасгәримиз Худайың таглыматының хер җәхтден аҗайыпдыгыны тассыкларлар.

¹¹ Чүнки Худайың хеммелери халас эдйән мерхемети әшгәр болды.

¹² Бу мерхемет бизе худайсызлыгы ве дүнъеви хөвеслери рет этмеги өвредйәр, бу дөвүрде өзүмизе эрк этмеги, догры яшамагы, Худайың йөрелгесине эермеги үндейәр.

¹³ Биз бу йөрелгә эерип, аҗайып умыдымыз болан бейик Худайымыз ве Халасгәримиз Иса Месихиң шан-шөхрат ичинде гөклерден инмегине гарашярыс.

¹⁴ Иса Месих бизи әхли гүнәлерден халас этмек үчин, Өзүни гурбан этди. Ол муны Өзүне ягшылык этмекде эрҗел, пәк, эзиз бир халкы газанмак үчин этди.

¹⁵ Хава, буларың барыны өврет. Долы ыгтыяр билен өвүт-үндев бер, гүнә эдйәнлери паш эт. Гой, хич ким сени әсгермезлик этмесин.