Titus 1 - Мукаддес Китап

1‑нҗи бап

¹ Худайың гулы ве Иса Месихиң ресулы мен Павлусдан догайы салам! Худай Өз сайлан адамларының иман гетирмеги ве Онуң йөрелгесине гөнүкдирйән хакыкаты билмеги үчин мени ресуллыга белледи.

² Худайың бу йөрелгеси бакы яшайыш умыдыны берйәр. Сөзүнде асла ялан болмадык Худай бу яшайшы дүнйә ярадылмаздан өң вада берип,

³ оны Хош Хабар аркалы Өз беллән вагтында аян этди. Халасгәримиз Худай бу Хош Хабарыны вагыз этмеги маңа табшырды.

⁴ Эй, Титус, иманымызың бир боландыгы үчин, мен сени хакыкы оглум сайярын. Гой, Атамыз Худайың ве Халасгәримиз Иса Месихиң мерхемети ве парахатлыгы саңа яр болсун!

Титусың Крит адасындакы везипеси

⁵ Саңа буйрушым ялы, тамамланылмадык ишлери битир, хер шәхердәки иманлылар йыгнагына ёлбашчылары белле. Ине, хут шу максат билен мен сени Крит адасында гоюп гайдандырын.

⁶ Йыгнага ёлбашчы белленилҗек адам мүйнсүз ве аялына бивепалык этмейән болмалыдыр. Онуң чагалары хем иман эдйән, азгынлыкда, битабынлыкда айыпланмаян болмалыдыр.

⁷ Йыгнагың ёлбашчысы Худая хызмат эдйәр. Шоңа гөрә-де, ол мүйнсүз болмалыдыр. Ол өздиенли, гызма, шераба мейилли, урушган болмалы дәл, гара небсине чапман,

⁸ эйсем мыхмансөер, ягшылык этмәге хөвесҗең, парасатлы, адалатлы, таква, небсине буйруп билйән болмалыдыр.

⁹ Ол өзүне өвредилен ыгтыбарлы таглымата садыклык билен эермелидир. Башгалара хем бу таглымата лайыклыкда өвүт-үндев берип, оңа гаршы чыкянларың ялңышяндыкларыны субут этмели.

¹⁰ Себәби питнечилер, яңралар ве кеззаплар дийсең көпдүр. Шейле адамлар, эсасан-да, халас болмак үчин сүннет эдилмелидигини үндейәнлериң арасында бардыр.

¹¹ Оларың агзыны багламак герек. Чүнки олар йыгнакларда өвретмесиз затлары өвредип, машгалалары бүтинлей даргадярлар. Иң эрбеди-де, олар булары пул газанмак үчин өвредйәрлер.

¹² Оларың бир акылдары шейле дийипдир: «Крит адасының халкы элмыдама ялан сөзлейәр; олар йыртыҗы хайванлар, асла гарны доймаяр».

¹³ Бу гаты җайдар айдылан сөзлердир. Шонуң үчин-де, сагдын иманлы болмаклары үчин, олары паш эт.

¹⁴ Гой, олар яхуды роваятларына ве хакыкаты рет эдйәнлериң буйрукларына гулак габартмасынлар.

¹⁵ Калбы пәклер үчин хемме зат пәкдир, йөне азгынлар ве иман гетирмедиклер үчин екеҗе-де пәк зат ёкдур. Оларың аң-дүшүнҗелери-де, ынсаплары-да мурдар боландыр.

¹⁶ Олар Худайы танаярыс дийселер-де, эдйән ишлеринде Оны рет эдйәндирлер. Олар неҗис, боюнегмезек болуп, ягшылык этмәниң нәмедигини-де билмейәрлер.