Сепаня 2 - Мукаддес Китап

2‑нҗи бап

¹ Топлан, эй, утанчсыз миллет!

² Саман күлкеси дек соврулмазыңдан өң, Реббиң гахар-газабы үстүңизе инмезден өң, Реббиң газаплы гүни гелмезден өң топлан!

³ Реббиң эмрлерини берҗай эдйән юрдуң кичигөвүнлилери, Ребби агтарың, догручыллыгы ве песпәллиги агтарың. Белки, Реббиң газап гүнүнде гизленип сакланарсыңыз.

Реб пилиштлилере җеза берйәр

⁴ Газа бошап галар, Ашкелон хараба дөнер, Ашдот гүнорта чаглары ковлар, Экрон-да көки-дамары билен согрулар.

⁵ Деңиз якасында яшаян Керет халкының дат гүнүне! Эй, Кенган, пилиштлилер юрды, Реб сениң гаршыңа шейле диййәр: «Еке кишини-де галдырман, сени вейран эдерин».

⁶ Деңиз якасындакы юрдуңыз чопан өрүлерине, сүри агылларына дөнер.

⁷ Яхуданың аман галанлары юрды эеләрлер, олар өрүде сүрүлерини отарарлар, агшамына Ашкелон шәхеринде ятарлар, Худайы Реб олары ятлап, өңки абаданчылыкларыны гайтарып берер.

Реб Мовап билен Аммона җеза берйәр

⁸ «Халкымы масгаралап, оларың юрдунда мен-менлик эден Мовабың кемситмелерини, Аммонларың сөгүнчлерини эшитдим».

⁹ Мунуң үчин Ысрайыл Худайы Хөкмүрован Реб Өз барлыгындан ант ичип, шейле диййәр: «Мовап халкыны Содом кимин, Аммон халкыны Гомора кимин гырарын! Бу юртлар тикенекли отлардан, дузлы чукурлардан долуп, бакы хараба өврүлерлер. Аман галан халкым Мовабы, Аммоны талар, гутулан миллетим ол юртлары эеләр».

¹⁰ Оларың текепбирлиги зерарлы шейле җеза берлер, чүнки олар Хөкмүрован Реббиң халкыны кемсидип, олара гаршы мен-менлик этдилер.

¹¹ Реб оларың йүреклерини ярар! Ол дүнйәниң әхли худайларыны ёк эдер, өз яшаян юрдунда хер миллет Реббе сежде эдер.

¹² Реб: «Эй, Эфиопия халкы, сенем Мениң гылыҗымдан өлерсиң» диййәр.

¹³ Реб демиргазыга гаршы эл галдырар, Ашуры ёк эдер, Ниневәни харабалыга, чөл дейин ялазы мейдана өврер.

¹⁴ Ниневе мал-гараларың ятагына, дүрли вагшы хайванларың сүренине өврүлер. Байгушлар харабачылыкда месген тутарлар, пенҗирелерден увлашарлар, босагаларың өңи вейран болар, кедр пүрслери дув-дагын эдилер.

¹⁵ Ине, бу зовкы-сапада, ховпсузлыкда яшап: «Еке мен, менден башга хич ким ёк» диен шәхердир. Гөр, ол нәхили хараба болуп, вагшы хайванларың сүренине өврүлди. Гапдалындан гечйән хер кес оны масгаралап, эллерини салгаярлар.