Rut 4 - Мукаддес Китап

4‑нҗи бап Боваз Рута өйленйәр

¹ Боваз галаның дервезесиниң агзына гелип отурды. Шол вагт Бовазың: «Ол саңа хас якын хоссардыр» диен адамы гечип барярды. Боваз оны гөрен бадына адыны тутуп: «Бәрик совул, гел, шу ерде отур» дийип, оны янына чагырды. Ол гелип отурды.

² Соңра Боваз галаның яшулуларындан он адамы чагырды-да, «Гелиң, янымда отурың» дийди. Олар отурдылар.

³ Боваз яңкы якын хоссарына: «Мовап юрдундан ызына гелен Нагомы доганымыз Элимелегиң ер пайыны сатҗак боляр.

⁴ Мен муны бу ерде отуранларың ве халкымың яшулуларының хузурында саңа эшитдирейин дийдим, оны сен сатын ал. Эгер ере эелик эдип билҗек болсаң-а эт, эелик эдип билмеҗек болсаң-да, оны айт, мен бу барада билейин. Себәби онуң иң якын хоссары сенсиң, галыберсе-де, мендирин» дийди. Яңкы якын гарындашы: «Эелик эдерин» дийди.

⁵ Боваз: «Эгер-де сен Нагомының ерини сатын алайсаң, онда моваплы дул аял Рута өйленмели боларсың. Чүнки Рутдан чага дүнйә инсе, шол ер чаганың адына гечер ве өлениң ады дикелдилер» дийди.

⁶ Яңкы якын хоссары: «Мен оңа эе чыкып билҗек дәл, эгер эе чыкайсам, онда, өз мирасымы дагадарын, оны сен алай. Мен бейле эдип билҗек дәл» дийди.

⁷ Хайсыдыр бир зада эе чыкыланда я-да ер башга бириниң адына гечириленде, муны макулламак үчин озаллар Ысрайылда шейле дәп барды: тарапларың бири аякгабының бир тайыны чыкарып, бейлекә узадарды.

⁸ Шоңа гөрә яңкы якын хоссары Боваза: «Сениң өзүң сатын алай» дийип, аякгабыны чыкарды.

⁹ Боваз яшулулара, дервезәниң агзындакы адамлара: «Элимелегиң, Килёның ве Махлоның әхли эмләгини Нагомыдан мениң сатын аландыгыма бу гүн сиз шаятсыңыз.

¹⁰ Шейле хем мерхумың ады өз мирасының үстүнде беркарар болуп, доганларының арасында, догдук меканында онуң ады йитмез ялы, Махлоның аялы, моваплы Руты мен өзүме аяллыга алярын. Сиз муңа шаятсыңыз» дийди.

¹¹ Дервезәниң агзына үйшен яшулулар ве бейлеки адамлар Боваза йүзленип: «Биз шаятдырыс. Гой, Реб сениң өйүңе гелҗек аялы Рахел ве Лея ялы этсин! Ол икисинден ысрайыл халкы эмеле гелендир. Эфрат уругының арасында сениң дөвлетиң артып, адың Бейтуллахама долсун!

¹² Шу гелниң үсти билен Реббиң саңа берҗек перзентлеринден дөреҗек несил Тамарың Яхуда догруп берен оглы Пересиң несли ялы болсун!» дийдилер.

Нагомы шатланяр

¹³ Боваз Рута өйленди. Ол онуң янына гирди; Рут Реббиң мерхемети билен гөврели болды ве бир огул догурды.

¹⁴ Аяллар Нагома: «Реббе алкыш болсун! Ол бу гүн сени хоссарсыз гоймады. Дүнйә инен бу огланың ады Ысрайылда улы хормата эе болсун!

¹⁵ Ол сениң дурмушыңы тәзеләр. Гарраныңда, ол саңа аркадаянч болар. Сениң үчин еди огулдан хем артык болан бу гелниң саңа огул догруп берди, ол сени сөййәр» дийдилер.

¹⁶ Нагомы чаганы алып, гуҗагына гысды ве оңа энеке болды.

¹⁷ Гоңшы аяллар чага ат гоюп: «Нагомы үчин бир огул догулды» дийишдилер. Оны Обет дийип атландырдылар. Обет Давудың какасы Йышайың какасыдыр.

Давут патышаның несил дарагты

^18-22 Пересиң несиллери шулардыр: Пересден Хесрон, Хесрондан Рам, Рамдан Эминадап, Эминадапдан Нахшон, Нахшондан Салмон, Салмондан Боваз, Боваздан Обет, Обетден Йышай, Йышайдан болса Давут дүнйә инди.