Rut 2 - Мукаддес Китап

2‑нҗи бап Рут Бовазың экин мейданында ишлейәр

¹ Элимелегиң ковмындан, ягны Нагомының әриниң якын гарындашларындан бир танымал хем-де бай адам барды. Онуң ады Бовазды.

² Моваплы Рут Нагома: «Мен экин мейданына гидейин, ол ерде маңа өз ызындан хоша чөплемәге ругсат эден адам тапылса, онуң ызындан хоша чөпләрин» дийди. Ол хем: «Гидибер, гызым» дийди.

³ Рут гидип, оракчыларың ызындан хоша чөплемәге башлады. Онуң төтәнден гирен ери Элимелегиң ковмындан болан Бовазың экин мейданы экен.

⁴ Ине, Боваз Бейтуллахамдан гелди. Ол оракчылара: «Реб сиз билен болсун!» дийип йүзленди. Олар хем: «Сени-де Реб ялкасын!» дийип җогап бердилер.

⁵ Боваз оракчыларың ёлбашчысындан: «Бу гелин ким?» дийип сорады.

^6-7 Оракчыларың ёлбашчысы оңа: «Бу моваплы гелин. Ол Нагомы билен Мовап юрдундан гелен. Ол оракчыларың ызындан хоша чөплемек үчин менден ругсат сорады. Ирденки гелшинден тә шу вагта ченли хоша чөпләп йөр, ишиң аралыгында теләриң астында диңе бир салым дынч алды» дийип җогап берди.

⁸ Боваз Рута: «Диңле, гызым, хоша чөплемәге башга ере гитме. Бу ерден айрылма, бизиң гелин-гызларымызың янында бол.

⁹ Гөзүң оракчыларың орак орян мейданында болсун, сен оларың ызындан йөре. Мен өз адамларыма саңа азар бермезлиги табшырандырын. Сувсан вагтың хызматкәрлериң долдуран күйзелериндәки сувдан ичерсиң» дийип табшырды.

¹⁰ Рут ики бүкүлип тагзым эдип: «Мениң бир кесекидигиме гарамаздан, сен мен барада нәме бейле аладаланярсың? Саңа бейле якымлы гөрүнмегиме нәме себәп болды?» дийди.

¹¹ Боваз оңа: «Сениң адамың өленден соң, өз гайыненеңе эден ягшылыкларың барада хемме зат маңа мәлим. Сен эне-атаңы, догдук меканыңы ташлап, хич бир танамаян халкың арасына гелипсиң.

¹² Эден ягшылыкларың Ребден гайтсын! Сениң пена тапынан Реббиң, Ысрайыл Худайы сылагыңы берсин!» дийип җогап берди.

¹³ Рут: «Мениң җенабым, сенде рехим-шепагат тапайын. Мен сениң гырнагың болмасам-да, мылайым сөзлериң билен өз гырнагың гөвнүни гөтердиң» дийди.

¹⁴ Нахар вагты боланда, Боваз оңа: «Бәрик гел-де, бираз нан алып, шераба батырып ий» дийди. Рут оракчыларың янында отурды. Боваз оңа говурга узатды. Ол ийип дойды, галаныны йыгнап гойды.

¹⁵ Ол хоша чөплемек үчин еринден галанда, Боваз өзүне дегишли эркек адамлара: «Десселериң арасындан-да чөплесин. Оңа хич зат диймәң.

¹⁶ Оңа десселериңизден-де баш согруп гоюң; чөплесин, кәемәң» дийип табшырды.

¹⁷ Ол агшама ченли мейданда хоша чөпледи, чөпләнини дөвди. Ярым батмана голай арпа болды.

¹⁸ Онсоң оны гөтерип, гала гелди ве йыгнан арпасыны гайыненесине гөркезди. Рут өзүнден галан говурганы чыкарып, гайыненесине берди.

¹⁹ Гайыненеси оңа: «Бу гүн хошаны ниреден чөпледиң? Ниреде ишледиң? Сен барада аладаланан бу адамы Худай ялкасын» дийди. Рут гайыненесине кимиң янында хоша чөпләндигини айтды. Рут: «Мениң бу гүнки хоша чөплән еримиң эесиниң ады – Боваз» дийди.

²⁰ Нагомы гелнине: «Вепалылыгыны өлүлерден, дирилерден гайгырмадык Реб бу адамы ялкасын! Бу адам бизиң гарындашымыздыр, иң якын хоссарларымызың биридир» дийди.

²¹ Моваплы Рут: «Ол маңа: „Экин мейданымда орак орулян мөвсүм долы тамамланянча, мениң ишгәрлеримиң янында болубер“ дийди» дийип, болан затлары гайыненесине гүррүң берди.

²² Нагомы гелнине: «Хава гызым, экин мейданына онуң гелин-гызлары билен биле чыканың говы, башга бириниң экин мейданында саңа эркеклер азар берерлер» дийди.

²³ Рут арпа орагының ве бугдай орагының мөвсүми гутарянча, хоша чөплән вагтында Бовазың гелин-гызларының янында болуп, гайыненеси билен биле яшаберди.