Rimliler 9 - Мукаддес Китап

9-нҗы бап Худайың сайлап-сечен халкы

^1-2 Мениң улы гайгым, йүрегимде дынгысыз агырым бар. Мунуң хакыкатдыгына, ялан сөзлемейәндигиме Иса Месихиң адындан гүвә гечйәрин. Сөзлериме Мукаддес Рух аркалы ынсабым-да шаятдыр.

^3-4 Хава, мен ганыбир доганларым болан ысрайыл халкының Иса Месихден айра дүшенинден, өзүмиң гаргыша галып, оларың хатырасына Месихден айра дүшмәге-де кайылдырын. Худай олары огуллыга алды, олара Өз шан-шөхратыны аян эдип, олар билен әхт баглашды. Ол Кануны ве ыбадатханадакы хызматы олара ынанды, вадаларыны хем олара берди.

⁵ Олар бейик ата-бабаларымызың неслидир. Иса Месих хем ынсан тебигаты боюнча олардан гелип чыкандыр. Бүтин барлыгың Хөкүмдары болан Худая бакы шөхрат болсун! Омын!

⁶ Мен Худай Өз вадасында тапылмады диемок. Себәби аслы ысрайыл боланларың бары хакыкы ысрайыл дәлдир.

⁷ Ыбрайымың неслинден боланларың-да бары онуң хакыкы перзенди дәлдир. Себәби Мукаддес Язгыларда: «Сениң адың Ысхагың несли аркалы довам эдер» дийип язылгыдыр.

⁸ Диймек, Ыбрайымың неслинден боланларың барына Худайың перзенди дийип болмаз. Диңе вада гөрә догланлар Ыбрайымың хакыкы несли хасапланяндыр.

⁹ Чүнки: «Белленен вагтда доланып геленимде, Сараның бир оглы болар» дийлип вада берлипди.

¹⁰ Мундан башга-да, Ребеканың экизлери Ысав билен Якубы ятлалы. Оларың икиси-де бир атадан, ягны атамыз Ысхакдан доглупды.

^11-12 Йөне экизлер хениз догулманка, хениз яманлык я ягшылык этмәнкә, Худай Ребека «Улусы кичисине гул болар» дийип айдыпды. Бу сөзлер сайланып-сечилмәниң ынсан ишлерине дәл-де, диңе Чагырана баглыдыгыны мәлим этмек үчин айдылыпды.

¹³ Хава, Мукаддес Язгыларда: «Мен Якубы сайладым, эмма Ысавы рет этдим» дийип язылгыдыр.

¹⁴ Муңа нәме диели? Эйсем Худай адалатсызмыдыр? Элбетде, ёк!

¹⁵ Себәби Ол Муса: «Мен ислән адамыма мерхемет, ислән адамыма хем рехим-шепагат эдерин» дийип айдыпды.

¹⁶ Шонуң үчин-де, сайланып-сечилме адамың ислегине я-да тагалласына дәл-де, Худайың мерхеметине баглыдыр.

¹⁷ Худай Мукаддес Язгыларда Мүсүриң фараонына: «Мен Өз гүйҗүми сенде гөркезип, адымы тутуш дүнйә җар этмек максады билен сени патыша этдим» дийип айдыпды.

¹⁸ Шейлеликде, Худай исләнине рехим-шепагат эдйәр, исләниниң йүрегини гаталдяр.

¹⁹ Онда менден: «Эгер шейле болса, онда нәме үчин Худай адамлары язгаряр? Онуң ислегине гаршы чыкып билҗек бармы?» дийип сорамагың мүмкин.

²⁰ Хей, адам, Худая геп гайтарар ялы, сен киммишиң? Хей-де ясалан зат өзүни ясандан: «Нәме үчин мени бейле ясадың?» дийип сорап билерми?

²¹ Эйсем күйзегәриң шол бир тоюндан ислән габыны: бирини той-байрамлар үчин, бейлекисини гүнделик ишлер үчин ясамага хакы ёкмы нәме?

²² Худай Өз гудратыны гөркезмек үчин, хеләкчилиге доглан адамларың үстүне газабыны дөкүп билйәр. Йөне Ол Өзүни газапландырян адамлара улы сабыр-такатлык эдйәндир!

²³ Худай Өзүниң өңден шөхрат үчин тайярлап, мерхемет эденлерине Өз шөхратының байлыгыны билдирмек үчин шейле сабыр-такатлы боляндыр.

²⁴ Худайың шейле мерхемет эденлериниң ве чагыранларының арасында диңе яхудылар дәл, эйсем башга миллетлер хем бардыр. Хава, буларың арасында биз хем бардырыс.

²⁵ Худай Хошея пыгамбер аркалы шейле диййәр: «Мениң халкым болмадыга „Халкым“ диерин, сөйгүли болмадыга „Сөйгүлим“ диерин.

²⁶ Олара: „Сиз Мениң халкым дәлсиңиз“ дийлен ерде, „Сиз дири Худайың огулларысыңыз“ дийлер».

²⁷ Ишая пыгамбер хем Ысрайыл барада шуны җар этди: «Ысрайыл халкы деңиз якасындакы чәге дей көп болса-да, диңе бирнәчеси халас боларлар.

²⁸ Чүнки Реб Өз чыкаран хөкүмини тутуш ер йүзүнде тизара ве гутарныклы амала ашырар».

²⁹ Ишая хем өңден шулары айдыпды: «Эгер Хөкмүрован Реб зүрятларымызы аман галдырмадык болсады, Содом ялы болардык, Гомора меңзәрдик».

Ысрайылың имансызлыгы

³⁰ Бу нәме дийилдиги? Худайың хузурында акланмага ымтылмадык миллетлер иман эдип, акландылар.

³¹ Ысрайыл халкы болса Мусаның Кануныны берҗай этмек аркалы акланмакчы болды, йөне муны башармады.

³² Нәме үчин? Себәби оларың ымтылышлары имана дәл-де, Кануна даянды. Олар «Бүдреме дашына» бүдредилер.

³³ Худай Мукаддес Язгыларда олара бу даш барада айдыпды: «Ине, Мен Сионда бүдреме Дашыны, йыкян Гая гойярын; Оңа бил баглан утандырылмаз».