Rimliler 7 - Мукаддес Китап

7‑нҗи бап Канундан азатлык

¹ Эй, доганлар, сизе Мусаның Кануныны билйән адамлар хөкмүнде йүзленйәрин. Эйсем сиз бу Кануның диңе дири адама өз хөкүмини йөредйәндигини билмейәңизми нәме?

² Мысал үчин, әрли аялы алып гөрелиң. Ол әри дирикә, бу Канун боюнча оңа баглыдыр. Эмма әри өлсе, ол ника канунындан азатдыр.

³ Эгер аял әри дирикә башга бирине дурмуша чыкса, бу зынахорлыкдыр. Эмма әри өлсе, ол канундан азатдыр, башга әре барса хем зынахор дәлдир.

⁴ Эй, доганларым, сиз бабатда хем шейледир. Сиз Иса Месихиң хачдакы өлүми аркалы Мусаның Кануны үчин өлүсиңиз. Худая ягшы ишлериңизиң хасылыны гетирер ялы, сиз инди башга Бирине, ягны өлүмден дирелен Иса Месихе дегишлисиңиз.

⁵ Биз ынсан тебигатымыза гөрә яшаяркак, бу Канун бизиң беден агзаларымызда гүнәли хөвеслери оярярды. Бу хөвеслер бизи гүнәли ишлере имриндирип, өлүме элтйәрди.

⁶ Эмма биз өзүмизи туссаглыкда саклан Канун бабатда өлүп, ондан азат эдилдик. Биз инди Кануна табын болан көне йөрелгә гөрә дәл-де, эйсем Мукаддес Руха эерйән тәзе йөрелгә гөрә Худая хызмат эдип билерис.

Мусаның Кануны гүнәни әшгәр эдйәр

⁷ Онда нәме, Мусаның Кануны эрбет бир затмы? Элбетде, ёк! Йөне бу Канун болмадык болса, мен гүнәниң нәмедигини-де билмездим. Канун: «Башганың задына гөз дикме» дийип буюрмадык болса, мен мунуң гүнәдигини хем билмездим.

⁸ Гүнә болса бу буйрукдан өз бәхбидини арап, мени хер түйсли ачгөзлүге имриндирди. Кануның болмадык еринде гүнә өлүдир.

⁹ Мен Канун берилмәнкә диридим. Эмма Канун берленден соң гүнә җанланды-да,

¹⁰ мен өлдүм. Хава, маңа яшайыш бермели Канун мениң өлмегиме себәп болды.

¹¹ Себәби гүнә Кануның буйругыны тутарык эдинип, мени алдава салды-да, ол аркалы өлдүрди.

¹² Эмма Канун шонда-да мукаддесдир; онуң хер бир буйругы мукаддес, адалатлы ве оңатдыр.

¹³ Онда нәме, оңат зат мениң өлмегиме себәп болайдымы? Элбетде, ёк! Мени оңат буйруклар аркалы гүнә өлдүрди. Гүнәниң хакыкы тебигаты хут шейле аян болмалыды. Шейдип, гүнәниң нәдереҗеде эрбетдиги әшгәр болды.

¹⁴ Биз Мусаның Канунының Худай тарапындан берлендигини билйәрис. Мен болса гүнәниң есирлигиндәки бир эҗиз ынсандырын.

¹⁵ Мен өз эдйәнлериме өзүм дүшүнемок, себәби халаян задымы этмән, йигренйән задымы эдйәрин.

¹⁶ Эгер мен йигренйән задымы эдйән болсам, онда бу Кануның оңатдыгы билен ылалашярын.

¹⁷ Эгер шейле болса, онда эдйәнлерими мен дәл-де, менде месген тутан гүнә эдйәндир.

¹⁸ Менде, хава, ынсан тебигатымда оңат задың ёкдугыны анык билйәрин. Себәби оңат ишлери этмәге ислегим болса-да, олары амал этмеги башармаярын.

¹⁹ Мен ислейән оңат ишлерими этмән, терсине, йигренйән эрбет ишлерими эдйәрин.

²⁰ Эгер ислемейәними эдйән болсам, онда оны инди мен дәл-де, ичимде месген тутан гүнә эдйәндир.

²¹ Шейлеликде, мен дурмушда шейле йөрелгәниң бардыгыны билдим: оңат иши этмекчи болан бадыма, менде яманлык хәзир боляр.

²² Бүтин калбым билен Худайың Канунындан леззет алсам-да,

²³ беденимиң шол йөрелгә йыкгын эдйәндигини гөрйәрин. Бу йөрелге мениң аңымдакы йөрелгә гаршы гөрешип, беденимдәки гүнә йөрелгесине мени есир эдйәр.

²⁴ Вах, мен багтыгараны дийсене! Өлүме элтйән бу беденимден мени ким халас эдер?

²⁵ Худая шүкүр! Ол бизи Реббимиз Иса Месих аркалы халас этди! Шунлукда, аңым билен Худайың Канунына гуллук этсем-де, ынсан тебигатыма гөрә гүнә канунының гулудырын.