Rimliler 6 - Мукаддес Китап

6-нҗы бап

¹ Онда нәме, Худай Өз мерхеметини бизе көпден-көп гөркезсин дийип, гүнә эдибермелими?

² Элбетде, ёк! Биз гүнә бабатда өлдүк ахырын. Онсоң ненең эдип гүнә ичинде яшап билерис?

³ Я-да сиз сува чүмдүрилиш аркалы Иса Месих билен биригип, инди Онуң өлүмине шәрик боляндыгымызы билмейәңизми?

⁴ Хава, биз сува чүмдүрилиш аркалы Месих билен өлүп, җайландык. Шоңа гөрә-де, Атаның шөхратлы гудраты аркалы Месихиң өлүмден дирелиши ялы, биз хем тәзе яшайша эе болуп билерис.

⁵ Биз Месихиң өлүминде Онуң билен бириген болсак, онда дирелишинде-де Онуң билен биригерис.

⁶ Биз мундан бейләк гүнәниң гулы болмаз ялы, көне тебигатымызың Иса Месих билен хача чүйленендигини билйәрис. Биз инди гүнәниң боюнтырыгындан бошандык.

⁷ Өлен адам гүнәниң ыгтыярындан азатдыр.

⁸ Эгер биз Месих билен өлен болсак, онда Онуң билен яшаҗакдыгымыза хем ынанярыс.

⁹ Биз Месихиң өлүмден дирелип, асла өлмеҗекдигини, өлүмиң инди Оңа өз хөкүмини йөредип билмейәндигини билйәрис.

¹⁰ Иса Месих Өз өлүми аркалы гүнәниң ыгтыярыны мүдимилик ёк этди. Онуң хәзирки яшайшы болса диңе Худайың шөхраты үчиндир.

¹¹ Шоңа гөрә-де, сиз хем өзүңизи гүнә үчин өли, Иса Месих билен биригендигиңиз себәпли Худай үчин дири сайың.

¹² Сиз паны тениңизиң гүнәли хөвеслерине эермез ялы, гүнәниң өз тениңизе хөкүм сүрмегине ёл бермәң.

¹³ Беден агзаларыңызы яманлык гуралы хөкмүнде гүнәниң ыгтыярына табшырмаң. Терсине, өлүмден дирелен хөкмүнде өзүңизи Худая табшырың. Гой, бедениңизиң хер бир агзасы Худайың догрулык гуралы болсун.

¹⁴ Шонда гүнә сизе өз хөкүмини йөретмез, себәби сиз Кануның ыгтыярында дәл-де, мерхеметиң ыгтыярындасыңыз.

Догрулыгың гуллары

¹⁵ Инди нәме? Биз инди Кануның ыгтыярында дәл-де, мерхеметиң ыгтыярында дийип, гүнә эдибермелими? Элбетде, ёк!

¹⁶ Эйсем сиз өзүңизи кимиң табынлыгына табшырсаңыз, шонуң-да гулуна өврүлйәндигиңизи билмейәңизми нәме? Сиз нәмәниң гулы: өлүме элтйән гүнәниң гулумы я-да догрулыга элтйән табынлыгың гулы?

¹⁷ Хава, сиз гүнәниң гулудыңыз, йөне Худая шүкүр, кабул эден таглыматыңыза йүрекден табын болдуңыз,

¹⁸ гүнәниң ыгтыярындан азат эдилип, догрулык гуллары болдуңыз.

¹⁹ Сизиң ынсан эҗизлигиңизи назара алып, сизе сада сөзлер билен айдярын: сиз озал беден агзаларыңызы харамлыга ве гитдигисайы артян биканунлыга табшырыпдыңыз. Инди болса беден агзаларыңызы халал яшайша элтйән догрулыга табшырың.

²⁰ Сиз гүнәниң гулларыкаңыз, догрулыгы берҗай этмекден азатдыңыз.

²¹ Озал эден ишлериңизден, ягны шинди утанян ишлериңизден нәме бәхбит гөрдүңиз? Шейле ишлериң соңы өлүмдир.

²² Йөне инди гүнәниң ыгтыярындан азат эдилип, Худайың гулы болдуңыз. Мунуң нетиҗеси халал яшамаклык, соңы болса бакы яшайышдыр.

²³ Чүнки гүнәниң музды өлүм, Худайың пешгеши болса Реббимиз Иса Месих аркалы берилйән бакы яшайышдыр.