Rimliler 5 - Мукаддес Китап

5‑нҗи бап Худай билен ярашык

¹ Шейлеликде, биз иманымыз билен акланып, Реббимиз Иса Месих аркалы Худай билен ярашдык.

² Иса Месих бизе Худайың мерхеметиниң гапысыны ачып берди. Биз иман аркалы бу мерхемете улашып, берк дурус ве Худайың шөхратына шәрик болҗакдыгымыза умыт баглап бегенйәрис.

³ Диңе муңа дәл, эйсем мушакгатларымыза хем бегенйәрис, себәби мушакгатларың чыдамы,

⁴ чыдамың эрҗеллиги, эрҗеллигиң хем умыды дөредйәндигини билйәрис.

⁵ Шейле умыт бизи утандырмаз, себәби берлен Мукаддес Рух аркалы йүрегимиз Худайың сөйгүсинден долуп-дашяр.

⁶ Бизиң өзүмизи акламага гүйҗүмиз ёкка, Иса Месих Худайың өңден беллән вагтында биз худайсызлар үчин өлди.

⁷ Хатда догры адам үчин өлмәге тайын адамы тапмак кындыр. Йөне ким билйәр, белки, ягшы адам үчин өлүп билҗегиң тапылмагы-да ахмал.

⁸ Эмма Иса Месих хениз гүнәкәркәк, бизиң үчин өлди. Шейдип, Худай бизе болан сөйгүсини гөркезди.

⁹ Шоңа гөрә-де, Месихиң ганы билен акланан болсак, Ол аркалы Худайың газабындан гутулҗагымыз хем гүррүңсиздир.

¹⁰ Чүнки душманкак Оглуның өлүми аркалы Худай билен ярашан болсак, онда Онуң өмри аркалы халас эдилҗегимиз хем гүррүңсиздир.

¹¹ Мундан башга-да, биз Худайың Реббимиз Иса Месих аркалы эден ишлерине бегенйәрис, себәби Ол бизи Худай билен ярашдырды.

Өлүм Адам атадан, яшайыш Иса Месих дендир

¹² Бир ынсан, ягны Адам ата зерарлы гүнә дүнйә аралашды, гүнә болса өлүмиң гелмегине себәп болды. Ынсанларың әхлиси гүнәли боланы үчин, өлүм оларың үстүнден хөкүм сүрүп башлады.

¹³ Гүнә Канун берилмәнкә-де дүнйәде барды, йөне Кануның болмадык еринде гүнә хасаба алынмаяр.

¹⁴ Муңа гарамаздан, Адам атадан башлап Муса ченли яшанлар Адам атаныңкы ялы гүнә этмеселер-де, өлүм оларың үстүнден хөкүм сүрди. Адам ата белли бир дереҗеде өзүнден соң гелмели Адамың, ягны Иса Месихиң нусгасы болды.

¹⁵ Эмма Худайың пешгеш берен мерхеметини Адам атаның гүнәси билен деңешдирип-де болмаз! Чүнки бир адамың гүнәси көплери өлүме дучар этди; башга бир Адамың, ягны Иса Месихиң мерхемети аркалы болса көплер Худайың бу пешгешини болдан-бол алды.

¹⁶ Хава, Худайың пешгеш берен мерхемети Адам атаның гүнәси ялы дәлдир. Себәби бир гүнә җезаландырылып, хөкүм эдилмә сезевар этди. Эмма көп гүнәлерден соң пешгеш берлен мерхемет акланманы гетирди.

¹⁷ Чүнки бир адамың гүнәси зерарлы ве шол адам аркалы өлүм хөкүм сүрүп башлады. Эмма Худайың чәксиз мерхемети билен акланма пешгешиниң боллугыны аланларың бары инди бир Адам, ягны Иса Месих аркалы бакы яшайышда хөкүм сүрерлер.

¹⁸ Шейлеликде, бир адамың гүнәси зерарлы хеммелериң хөкүме дучар болшы ялы, бир Адамың догрулыгы аркалы-да хеммелере яшайыш берйән акланма гелди.

¹⁹ Бир адамың битабынлыгы аркалы көп адамың гүнәкәр болшы ялы, бир Адамың табынлыгы аркалы көп адам догручыл болар.

²⁰ Гүнәниң месе-мәлим болмагы үчин, Канун ара гирди. Йөне адамлар гүнәни көпден-көп этдигисайы, Худайың мерхемети хас-да артды.

²¹ Озал гүнә хөкмүрованлык сүрүп, хеммелериң өмүр танапыны гырярды. Инди велин Худайың мерхемети хөкмүрованлык сүрйәр. Шоңа гөрә-де, биз акланып, Реббимиз Иса Месих аркалы бакы яшайша эе болдук.