Rimliler 3 - Мукаддес Китап

3‑нҗи бап Худайың садыклыгы

¹ Шейлеликде, яхуды болмагың нәме артыкмачлыгы бар? Сүннетиң нәме пейдасы бар?

² Яхуды болмагың артыкмачлыгы көпдүр! Себәби Худайың канунлары ве вадалары илки яхудылара берилди.

³ Оларың кәбириниң Худая садык галмандыгы хеммелере мәлимдир. Йөне оларың бивепалыгы, хей-де, Худайың садыклыгыны ёк эдерми?

⁴ Асла этмез! Адамларың әхлиси бивепа болаянда-да, Худай садыкдыр. Себәби Мукаддес Язгыларда Худай барада шейле язылгыдыр: «Сен чыкаран хөкүмиңде адалатлысың, Казылык эдениңде, үстүн чыкансың».

⁵ Йөне бизиң бүтин нәдогрулыгымыз Худайың догрулыгыны хас әшгәр эдйән болса, муңа нәме диерис? Кәбир ынсанларың шейле дийип сорамагы мүмкин: эйсем Худай Өз газабыны башымыздан индеренде, биз бабатда адалатсызлык эдйәрмикә?

⁶ Элбетде, ёк! Худай адылдыр. Эгер шейле болмаса, Ол хей-де дүнйә казылык эдип билерми?!

⁷ Йөне мениң бивепалыгым аркалы Худайың садыклыгы хас әшгәр болуп, Онуң шөхраты артян болса, мен бир гүнәли хөкмүнде хөкүм эдилмелими нәме?

⁸ Ягшылыгы артдырмак үчин, белки, биз яманлык этмелидирис? Элбетде, ёк! Йөне кәбир адамлар мен хут шейле затлары өвредйәрмишим дийип, маңа төхмет барыны япярлар. Шейле төхметчилер өз эденлерине лайык җеза аларлар.

Хеммелер гүнәлидир

⁹ Онда нәме, биз яхудылар бейлеки миллетлерден артыкмы? Асла артык дәлдирис! Яхудыларың-да, башга миллетлериң-де гүнәниң туссаглыгындадыгы барада өң айдыпдык ахырын.

¹⁰ Мукаддес Язгыларда хем шейле язылгыдыр: «Догры адам ёк, ёк еке бири-де;

¹¹ Дүшүнйән асла ёк, Худайы агтарян-да ёк.

¹² Оларың хеммеси ёлдан чыкды, әхлиси дең дереҗеде дерексиз болды. Ягшылык эдйән ёк, ёк еке бири-де.

¹³ Оларың богазы ачык габырдыр, олар алдаяндырлар, агызларында йылан зәхери бардыр.

¹⁴ Агызлары гаргышдан, аҗы сөзден долудыр.

¹⁵ Аяклары ган дөкмәге ховлугяндыр.

¹⁶ Ёлларында харабалык, җепалар бардыр.

¹⁷ Парахатлык ёлы недир, олар билмейәр.

¹⁸ Олар Худайдан асла горкмаяр».

¹⁹ Биз Канунда айдылан затларың онуң табынлыгындакы адамлара дегишлидигини билйәрис. Йөне шонда-да, хич кимиң өз-өзүни акламага тутарыгы ёкдур, себәби Худайың хузурында хеммелер гүнәлидир.

²⁰ Шейлеликде, Мусаның Канунының парзларыны берҗай этмек аркалы Худайың хузурында хич ким акланып билмез. Терсине, бу Канун аркалы адам өзүниң гүнәлидигине гөз етирйәр.

Иман аркалы акланмак

²¹ Йөне инди Худай акланманың Кануна дахылсыз ёлуны гөркезди. Бу ёл барада Төврат ве пыгамберлериң язгылары хем шаятлык эдйәр.

²² Иса Месихе иман эдйәнлериң әхлиси Худайың хузурында акланяндырлар. Адамларың арасында хич парх ёкдур,

²³ себәби хеммелер гүнә эдип, Худайың шөхратындан махрум болдулар.

²⁴ Йөне олар Худайың мерхемети аркалы акландылар, Иса Месих аркалы гүнәлериниң җезасындан азат эдилдилер.

^25-26 Худай Өз адалатыны гөркезмек үчин Иса Месихи иберип, Онуң дөкүлен ганы аркалы иман эдйәнлери Өзи билен ярашдырды. Худай озалкы дөвүрде эдилен гүнәлере гечиримлилик этди. Инди болса Иса Месихе иман эдйән хер кеси аклаяр. Шейдип, Ол Өзүниң адалатлыдыгыны субут эдйәр.

²⁷ Инди магтанара тутарыгымыз галдымы? Асла галан дәлдир! Бу хайсы кануна гөрә шейле болды? Парзлары берҗай эдилмели кануна гөрәми? Ёк, иман канунына гөрә шейле болды.

²⁸ Биз адамың Кануны берҗай этмек аркалы дәл-де, иман аркалы акланяндыгыны ныгтаярыс.

²⁹ Эйсем Худай диңе яхудыларың Худайымы? Ол башга миллетлериң хем Худайы дәлми нәме? Элбетде, Ол башга миллетлериң хем Худайы.

³⁰ Себәби еке-тәк Худай бардыр. Ол сүннетлилери-де, сүннетсизлери-де иман аркалы аклаяндыр.

³¹ Онда нәме? Иман аркалы Мусаның Кануныны ятырярысмы? Ёк! Терсине, биз оны беркарар эдйәрис.