Rimliler 16 - Мукаддес Китап

16-нҗы бап Соңкы саламлар

¹ Кенхреядакы йыгнагың хызматчысы аял доганымыз Фибини сизе табшырярын.

² Оны Реббимизиң хакы үчин, иманлылара гелишйән тәрде мыхман алың, әхли мәтәчликлеринде көмек бериң. Чүнки ол көплере, шол санда маңа-да энчеме гезек көмек этди.

³ Иса Месихе хызмат эдйән ишдешлерим Приска ве Акила салам айдың.

⁴ Олар мениң үчин өз җанларыны ховп астына салдылар; олара диңе мен дәл, башга миллетлерден болан йыгнаклар хем миннетдардырлар.

⁵ Оларың өйүнде йыгнанян йыгнага-да салам айдың. Эзиз достум Эпенете хем салам айдың; ол Азия велаятындакыларың арасында илкинҗи болуп Иса Месихе иман этди.

⁶ Сизиң үчин арман-ядаман зәхмет чекен Меръеме салам айдың.

⁷ Мениң билен туссаглыкда болан тиредешлерим Андроник билен Юния салам айдың. Олар ресулларың арасында ат-абрай газанып, Месихе менден өң иман эдипдилер.

⁸ Реб аркалы эзиз достум болан Омплията салам айдың.

⁹ Иса Месихе хызмат эдйән ишдешлерим Урбана, эзиз достум Ыстаха салам айдың.

¹⁰ Месихиң садык шәгирди Апелә салам айдың. Аристобулың өй-ичерсине хем салам айдың.

¹¹ Тиредешим Хиродиюна салам айдың. Наркусың ичерсинден Реббе иман эдйәнлере салам айдың.

¹² Реб үчин арман-ядаман зәхмет чекйән аял доганларымыз Труфайына ве Труфоса салам айдың. Реб үчин көп зәхмет чекйән эзиз аял доганымыз Персе хем салам айдың.

¹³ Реб тарапындан сайланып-сечилен имандакы доганым Руфуса ве онуң энесине салам айдың. Руфусың энеси маңа-да хут өз оглы ялы гараяр.

¹⁴ Асинкрите, Флегона, Хермесе, Патроба, Хермә ве оларың янындакы доганлара салам айдың.

¹⁵ Филолога, Юлия, Олимпа, Нерее, онуң аял доганына ве оларың янындакы Худай халкының барына салам айдың.

¹⁶ Бири-бириңизи мәхирли огшап саламлашың. Иса Месихе дегишли болан йыгнакларың бары сизе салам иберйәр.

¹⁷ Эй, доганлар, сизе өвредилен таглымата гаршы чыкып, араңызда агзалалыклары дөредйәнлерден, иманыңыза бөвет болянлардан әгә болуң дийип ялбарярын. Шейле адамлардан гача дуруң.

¹⁸ Чүнки олар Реббимиз Иса Месихе дәл-де, өз гара гарынларына хызмат эдйәндирлер. Олар сүйҗи сөзлер ве яранҗаңлык билен гепләп, сада адамлары алдава саляндырлар.

¹⁹ Сизиң табынлыгыңыз хеммелере мәлимдир. Мен сизиң шейледигиңизе бичак бегенйәрин, йөне сизиң ягшыны ямандан айдың сайгарар ялы пайхаслы болмагыңызы, яманлыга янашмазлыгыңызы ислейәрин.

²⁰ Парахатлыгың гөзбашы болан Худай болса тиз вагтда шейтаны аякларыңызың астында мынҗырадар. Гой, Реббимиз Иса Месихиң мерхемети сизе яр болсун!

²¹ Ишдешим Тимотеос, тиредешим Лукий, Ясон ве Сосипатер дагы сизе салам ёллаярлар.

²² Бу хаты кагыза язып отуран мен Тертий Реббе иман эдйән доганыңыз хөкмүнде сизе салам ёллаярын.

²³ Мен Павлусы мыхман алып, йыгнаклары өз өйүнде гечирмәге мүмкинчилик дөреден Гаюс сизе салам ёллаяр. Шәхериң газначысы Эраст ве доганымыз Куварт сизе салам ёллаяр.

²⁵ Мениң вагыз эдйән Хош Хабарыма, ягны Иса Месих барадакы таглымата ынанан сизи иманда беркитмеги башарян Худая шан-шөхрат болсун! Бу Хош Хабар энчеме асырларың довамында яшырын сакланып, инди аян эдилен бир сырдыр.

²⁶ Хава, бу Хош Хабар аян болды. Ол әхли миллетлериң бакы Худайың эмрине гөрә Оңа табын болмагы үчин пыгамберлериң язгылары аркалы аян эдилди.

²⁷ Дана ве еке-тәк Худая Иса Месих аркалы бакы шан-шөхрат болсун! Омын!