Rimliler 15 - Мукаддес Китап

15‑нҗи бап Ылалашыклы болуң

¹ Биз, иманы гүйчлүлер, диңе өз гөвнүмизден турҗак болмалы дәл-де, гайтам, иманы говшакларың эҗизликлерине гечиримли болмалыдырыс.

² Бизиң хер биримиз өз якынының иманыны гүйчлендирҗек затларың пикирини эдип, онуң гөвнүнден турмалыдырыс.

³ Себәби «Саңа дил етирйәнлериң гепи башыма инди» дийип язылышы ялы, хатда Иса Месиххем Өз гөвнүнден турҗак болан дәлдир.

⁴ Мукаддес Язгыларда языланларың бары бизе таглым өвретмек үчин языландыр. Биз Мукаддес Язгылар аркалы сабыр-такатлы болмагы өвренйәрис, оларың берйән теселлиси аркалы умытлыдырыс.

^5-6 Иса Месихе эерип, Онуң Атасы болан Худайымызы бир йүрекден ве бирагыздан шөхратландырып билериңиз ялы, гой, сабырлылыгың ве теселлиниң гөзбашы болан Худай сизе агзыбирлик берсин.

⁷ Шоңа гөрә-де, Худайы шөхратландырмак үчин, Иса Месих сизи нәхили кабул эден болса, сиз-де бири-бириңизи шонуң ялы кабул эдиң.

⁸ Чүнки Иса Месих Худайың садыклыгыны аян эдип, ата-бабалара берлен ваданың берҗай болмагы үчин яхудыларың хызматкәри болды.

⁹ Хава, Иса Месих муны яхуды дәллериң хем Худайы Онуң мерхемети үчин шөхратландырсынлар дийип этди. Чүнки Мукаддес Язгыларда шейле язылгыдыр: «Мунуң үчин миллетлер арасында Сени алкышларын, мен Сениң адыңа нагма айдарын».

¹⁰ «Онуң халкы билен шатланың, эй, халклар!» дийип хем язылгыдыр.

¹¹ «Ребби шөхратландырың, әхли миллетлер! Оңа алкыш айдың, эй, әхли халклар!» дийип хем язылгыдыр.

¹² Ишая пыгамбериң китабында хем шейле язылгыдыр: «Йышайың Көки пейда болар, Ол халклара Хөкүмдар болар, миллетлер Оңа умыт баглар».

¹³ Мукаддес Рухуң гүйҗи билен умыдыңызың артмагы үчин, умыдың гөзбашы болан Худай иманыңыз аркалы, гой, сизи шатлыкдан ве парахатлыкдан пүрепүр этсин.

Павлус өз ресуллыгы барада айдяр

¹⁴ Эй, доганларым! Мен сизиң ягшылыкдан долудыгыңыза, хемме зады билйәндигиңизе, бири-бириңизе өвүт бермеги башаряндыгыңыза берк ынанярын.

¹⁵ Йөне шонда-да, сизе кәбир затлары ятлатмак үчин, шу хатымың кә ерини батыргайлык билен яздым. Чүнки Худай маңа мерхемет эдип,

¹⁶ мени Иса Месихиң хызматкәри хөкмүнде башга миллетлериң арасына иберди. Мен олара Хош Хабары вагыз эдип, өз руханылык борҗумы берҗай эдйәрин. Шейдип, бу миллетлер Мукаддес Рух аркалы Худайың мукаддес халкы ве Онуң халаян садакасы болар.

¹⁷ Шоңа гөрә, буйсанайсам-да, диңе Иса Месих аркалы Худая хызмат эдйәндигиме буйсанарын.

¹⁸ Хава, муны батыргайлык билен диййәрин, себәби башга миллетлериң Худая табын болмагы үчин, Иса Месихиң өзүм аркалы эден ишлери барада айдяндырын. Ол муны сөзде ве ишде,

¹⁹ аламатлар, мугҗызалар ве Мукаддес Рухуң гүйҗи аркалы амал этди. Шейлеликде, мен Иерусалимден Иллирия велаятына ченли айланып, Иса Месих барадакы Хош Хабары долы яйратдым.

²⁰ Мениң гөвүн арзувым башга бириниң тутан бинядының үстүнде гурман, Месихиң ады хениз эшидилмедик ерлерде Хош Хабары вагыз этмекдир.

²¹ Чүнки Мукаддес Язгыларда шейле язылгыдыр: «Ондан хабарсыз боланлар Оны гөрерлер, Ол хакда эшитмедиклер инди дүшүнерлер».

²² Энчеме гезек сынанышандыгыма гарамаздан, хут шу хызматым себәпли сизиң яныңыза көпден бәри барып-да билмедим.

Павлус Риме гитмәге ниетленйәр

²³ Инди болса бу себитлердәки ишими тамамладым. Мен көп йыллардан бәри сизе бармагы арзув эдендигим үчин,

²⁴ Испания баряркам яныңыза совлуп гечерин. Аз салымлык болса-да, сизиң билен дидарлашанымдан соң, ёл шайымы тутуп, мени ёла саларсыңыз диен умыдым бар.

²⁵ Хәзир болса Худайың халкына хызмат этмек үчин Иерусалиме барярын,

²⁶ себәби Македониядакы ве Ахаядакы йыгнаклар Иерусалимдәки йыгнагың мәтәчлерине мадды көмегини ибермеги макул гөрдүлер.

²⁷ Хава, олар муны гөвүнҗеңлик билен этдилер, аслында олар шейле-де этмелидилер. Чүнки яхуды иманлылар башга халклар билен өз рухы паталарыны пайлашдылар. Шоңа гөрә-де, башга халклар хем өз гезегинде олара мадды мәтәчликлеринде көмек бермәге борчлудырлар.

²⁸ Мен оларың мадды көмегини Иерусалиме етирип, бу иши битиренимден соң, сизиң үстүңиз билен Испания уграмакчы.

²⁹ Сизиң яныңыза баранымда болса, билеликде гечирҗек вагтымызы Иса Месихиң болдан-бол ялкаҗакдыгына ынанярын.

³⁰ Эй, доганлар, Реббимиз Иса Месихиң ве Мукаддес Рухуң сөйгүсиниң хатырасына ялбарярын: мениң үчин Худая дога-дилег этмек билен, мениң гөрешиме гошулың.

³¹ Хава, Яхудыядакы имансызларың маңа зыян етирмезлиги үчин, Худайың шол ердәки халкы тарапындан Иерусалимдәки хызматымың кабул эдилмеги үчин Худая дога-дилег эдиң.

³² Онсоң, Худай ёл берсе, яныңыза шатлык билен барып, сизиң билен бираз дынч аларын.

³³ Парахатлык Худайы, гой, сизиң барыңыза яр болсун! Омын!