Rimliler 14 - Мукаддес Китап

14‑нҗи бап Доганыңы язгарма

¹ Иманы говшагы онуң гарайышлары барада җеделлешмезден кабул эдиң.

² Мысал үчин, кәбирлериң иманы хемме зады иймәге ыгтыяр этсе, кәбирлериңки диңе гөк өнүмлери иймәге ыгтыяр эдйәндир.

³ Ислендик тагамы ийип билйән иманлы иймейән иманла әсгермезлик этмесин; иймейән-де хемме зады иййәни язгармасын, себәби Худай оны кабул эдендир.

⁴ Башга бириниң хызматкәрини язгарар ялы сен киммишиң?! Хызматкәриң өзүне буйруланлары берҗай эдип-этмәндигини диңе онуң хоҗайыны кесгитлейәндир. Йөне хызматкәр өзүне буйруланлары берҗай эдип билер, себәби онуң хоҗайыны Ребдир, Ол хызматкәрини кувватландырмагы башаряндыр.

⁵ Кәбир адамлар бир гүни бейлеки гүнлерден хас ваҗып сайяндыр, кәбирлери болса хемме гүнлери дең гөрйәндир. Гой, мундан бейләгем хер ким өз ынанҗына гөрә пикир эдиберсин.

⁶ Ким хайсыдыр бир гүни ваҗып сайян болса, муны Реб үчин сайяндыр. Ким хемме зады иййән болса, Реб үчин иййәндир, себәби ол иййән затлары үчин Худая шүкүр эдйәндир. Ким кәбир затлары иймейән болса, Реббиң хатырасы үчин иймән, Худая шүкүр эдйәндир.

⁷ Хич биримиз өзүмиз үчин яшаян дәлдирис, хич биримиз өзүмиз үчин өлйән дәлдирис.

⁸ Яшаян болсак, Реб үчин яшаяндырыс, өлйән болсак, Реб үчин өлйәндирис. Шоңа гөрә, яшасак-да, өлсек-де, Реббе дегишлидирис.

⁹ Себәби Иса Месих өлүлериң-де, дирилериң-де Ребби болмак үчин өлүп, дирелди.

¹⁰ Онда нәме үчин кәбирлериңиз өз доганыңызы язгарярсыңыз? Нәме үчин кәбирлериңиз өз доганыңыза әсгермезлик эдйәрсиңиз? Бизиң барымыз Худайың хөкүм күрсүсиниң өңүнде дурмалы дәлми нәме?

¹¹ Чүнки Мукаддес Язгыларда шейле язылгыдыр: «Реб: „Өз барлыгымдан ант ичйәрин, хер кес өңүмде дыз эпер, хер бир дил Мени алкышлар“ диййәр».

¹² Хава, хер биримиз Худайың өңүнде өзүмиз үчин җогап берерис.

¹³ Шоңа гөрә-де, бири-биримизи язгармалың. Гайтам, доганымызың бүдрәп, йыкылмагына себәп болайҗак херекетлерден сакланмагың пикирини эделиң.

¹⁴ Мен хич бир задың өз-өзүнден харам дәлдигини билйәрин, Реббим Иса Месих хем мени бу бабатда ынандыряр. Йөне ким хайсыдыр бир зады харам сайян болса, онуң үчин харамдыр.

¹⁵ Эгер сен доганыңы ынҗыдайҗак зады иййән болсаң, онда оны сөймедигиңдир. Иййән тагамың зерарлы өз доганыңың иманыны вейран этме, Иса Месих онуң угрунда өлди ахырын.

¹⁶ Шейлеликде, ягшы сайян затларыңыз эрбет гүррүңлериң дөремегине себәп болмасын.

¹⁷ Чүнки Худайың Шалыгы иймек-ичмек дәл-де, Мукаддес Рухуң пешгеш берйән догрулыгы, парахатлыгы ве шатлыгыдыр.

¹⁸ Ким Иса Месихе шейле хызмат эдйән болса, Худайы хошнут эдип, адамларың хорматына мынасыпдыр.

¹⁹ Шонуң үчин-де, парахатлыга, бири-биримизи иманда гүйчлендирмәге ярдам этҗек ишлери этмәге дырҗашалың.

²⁰ Хайсыдыр бир тагам зерарлы Худайың ишини вейран этмәлиң. Хемме зат тәмиздир, йөне доганының иманда бүдремегине себәп болян зады иййән адам нәдогры эдйәндир.

²¹ Эт иймек, шерап ичмек я-да хайсыдыр башга бир зат доганыңың бүдремегине себәп болян болса, олары этмезлик ягшыдыр.

²² Ийип-ичмеклик барадакы ынанчларыңы диңе өзүң ве Худай билсин. Өз ынанҗына гөрә херекет эдип, өз-өзүни язгармаян адам багтлыдыр.

²³ Ийип-де, өз иййәни барада шүбхеленйән адам эййәм хөкүм эдилендир, себәби ол өз иманына гөрә херекет эдйән дәлдир. Имана гөрә эдилмедик зат гүнәдир.