Rimliler 12 - Мукаддес Китап

12‑нҗи бап Худай үчин яшамак

¹ Шоңа гөрә-де, эй, доганлар, Худайың мерхеметиниң хатырасы үчин сизе ялбарярын: өзүңизи Онуң халаҗак дири ве мукаддес гурбанлыгы хөкмүнде хөдүрләң. Шейтсеңиз, Худайың хузурында мынасып тәрде хызмат этдигиңиз болар.

² Бу дүнйәниң йөрелгелерине уйгунлашҗак болмаң. Терсине, пикирлериңизи тәзеләп, өзгериң. Шейтсеңиз, Худайың ислегине дүшүнмеги, ягны Оны нәмәниң хошал эдйәндигини, нәмәниң оңат ве кәмилдигини билмеги башарарсыңыз.

³ Өзүме берлен мерхеметден пейдаланып, сизиң хеммәңизе шулары диййәрин: өзүңизе ёкары баха бермәң. Терсине, Худайың хер киме берен иманына гөрә өзүңиз бабатда сагдын дүшүнҗели болуң.

⁴ Беденимизи мысал хөкмүнде алалың: ол бир болса-да, агзалары көпдүр, херсиниң-де өз хызматы бардыр.

⁵ Биз бабатда хем шейле: көп болсак-да, Месих аркалы бир бедендирис, онуң агзалары хөкмүнде бири-биримизе баглыдырыс.

⁶ Бизе берлен мерхемете гөрә, хер биримизиң дүрли рухы пешгешлеримиз бардыр. Шонуң үчин-де, ким пыгамберлик пешгешини алан болса, гой, өзүне берлен имана гөрә пыгамберлик этсин.

⁷ Эгер хызмат болса, гой, хызмат этсин; өвредиҗи болса, гой, өвретсин.

⁸ Эгер несихатчы болса, несихат берсин; мәтәчлере хайыр-сахават эдиҗи болса, муны сахылык билен этсин. Эгер баштутанлык берлен болса, муны ыхлас билен ерине етирсин, рехим-шепагат этмеклик берлен болса, муны гөвүнҗеңлик билен этсин.

Доганлык сөйгүси

⁹ Сөйгиңиз икийүзли болмасын. Яманлыгы йигренип, ягшылыга япышың.

¹⁰ Бири-бириңизи доганлык сөйгүси билен түйс йүрекден сөйүң. Бири-бириңизи хорматлап, башгалары өзүңизден ёкары тутуң.

¹¹ Ыхласыңыз говшамасын, Мукаддес Рухуң берйән хыҗувы билен Реббе хызмат эдиң.

¹² Умыдыңызың бардыгына бегениң, мушакгатлара чыдамлы болуң, дога-дилегде эрҗел болуң.

¹³ Имандакы доганларыңыз мәтәчлик чексе, олара көмек бериң, мыхмансөер болуң.

¹⁴ Өзүңизе азар берйәнлере гаргамаң, терсине, олар үчин ягшылык диләң.

¹⁵ Шатланянларың шатлыгына шатланың, аглаянларың агысына аглаң.

¹⁶ Бири-бириңиз билен оңшуклы болуң. Текепбир болмаң, сада адамлар билен дост болуң, өзүңизи бейлекилерден акыллы саймаң.

¹⁷ Яманлыга яманлык этмәң, терсине, хеммелере ягшылык этмәге ымтылың.

¹⁸ Оңардыгыңыздан хеммелер билен парахат яшаҗак болуң.

¹⁹ Эй, эзизлерим, өзүңиз ар алҗак болмаң, муны Худая табшырың. Себәби Реб: «Өч Мениңкидир, җезаландырҗак Мендирин» диййәр.

²⁰ Гайтам Мукаддес Язгыларда языланлары берҗай эдиң: «Душманың ач болса, оңа нан бер, сувсан болса, сув бер. Шонда онуң башына көз гоярсың».

²¹ Яманлык сенден үстүн гелмесин, терсине, ягшылык эдип, яманлыкдан үстүн бол.