Rimliler 11 - Мукаддес Китап

11‑нҗи бап Худая садык галанлар

¹ Инди шуны сорайын: эйсем Худай Өз халкыны рет эдәйдимикә? Элбетде, ёк! Мен-де Ыбрайымың неслинден, бенямин тиресинден болан ысрайылларың биридирин.

² Худай Өзүниң эзелден сайлап-сечен халкыны рет эденок. Я-да Мукаддес Язгыларда Ыляс пыгамбер барада языланлар ядыңызда дәлми? Ол Худая ысрайыл халкы барада арз эдип, шейле диййәр:

³ «Я Реб, ысрайыллар Сениң пыгамберлериңи өлдүрип, гурбанлык сыпаларыңы йыкдылар, еке мен галдым. Олар җаныма каст этмек үчин, инди мени ызарлап йөрлер».

⁴ Шонда Худай оңа нәме җогап берди? Худай: «Мен Ысрайылда Багал бутуна сежде этмедик еди мүң адамы Өзүме айрып гойдум» дийди.

⁵ Шонуң ялы хәзирки вагтда хем Худая садык галанлар бар. Олар Худайың мерхеметине гөрә сайлананлардыр.

⁶ Мерхемете гөрә сайланан болсалар, онда ынсан ишлерине гөрә сайланан дәлдир. Ёгса мерхемет мерхемет болмазды.

⁷ Инди нәме? Ысрайыл халкы догрулыга ымтылса-да, оңа етип билмеди. Оңа диңе сайланып-сечиленлер етди, галанлары болса өз доң йүреклериниң ыгтыярына табшырылды.

⁸ Мукаддес Язгыларда олар барада шейле язылгыдыр: «Худай олары агыр ука батырды, олара гөрйән гөз, эшидйән гулак бермеди».

⁹ Давут хем олар барада шейле диййәр: «Олара өз сачагы гапан ве дузак болсун, бүдреме дашы ве алҗак җезасы болсун.

¹⁰ Гой, гөзлери гараңкырасын, гөрүп билмесин, биллери өмүрлик бүкүлип галсын».

Сапылан балдаклар

¹¹ Онда шейле сораг йүзе чыкяр: эйсем яхудылар гайдып галмаз ялы йыкылайдылармыка? Элбетде, ёк! Хава, олар Иса Месихи рет этдилер, йөне оларың бу гүнәси бейлеки миллетлериң халас эдилмегине себәп болды. Бейлеки миллетлериң халас эдилмеги болса яхудыларың габанҗаңлыгыны оярмалыды.

¹² Хава, яхудыларың бу гүнәси бүтин дүнйәниң ялканмагына себәп болды. Оларың бу гүнәси башга миллетлер үчин бәхбитли болды. Эгер оларың гүнәси шейле ялканышы гетирен болса, онда тутуш Ысрайыл Худая долананда, бу ялканыш гөр бак нәхили болар!

¹³ Инди болса сизе, ягны яхуды дәллере йүзленйәрин. Худай мени ресуллыга белләп, сизе Хош Хабары вагыз этмәге иберди. Мен муңа дийсең буйсанярын.

¹⁴ Шунуң билен бирликде сиз аркалы өз илдешлеримиң габанҗаңлыгыны оярып, олардан кәбириниң халас болмагына ярдам эдерин диен умыдым бар.

¹⁵ Хава, Худай ысрайыл халкыны рет этди. Онуң шейле этмеги бейлеки миллетлериң хем Худай билен ярашмагына мүмкинчилик берди. Эгер Худайың рет этмеси бейлеки халклара шейле ялканыш гетирен болса, онда Онуң ысрайыл халкыны гайтадан кабул этмеги нәмә етирер? Өлүмден яшайша етирер!

¹⁶ Себәби Худая хөдүр эдилен чөрек мукаддес болса, шол хамырдан биширилен бейлеки чөреклер хем мукаддесдир; эгер багың көки мукаддес болса, онуң шахалары хем мукаддесдир.

¹⁷ Хава, багың кәбир шахалары дөвлүп, ябаны зейтуның шахасы болан сиз оңа сапылдыңыз. Сиз идедилип етишдирилен зейтуның көкүниң ширесине шәрик болдуңыз.

¹⁸ Шоңа гөрә-де, онуң дөвлен шахаларының өңүнде магтанмаң, себәби сиз көки дәл-де, көк сизи саклаяндыр.

¹⁹ Онда-да сизиң: «Шахалар бизиң сапылмагымыз үчин дөвүлди» диймегиңиз мүмкин.

²⁰ Сиз мамла, йөне олар имансызлыгы зерарлы дөвүлди. Сиз болса иман аркалы дурсуңыз. Шоңа гөрә, гопбамсырамаң-да, гайтам горкуң.

²¹ Себәби Худай багың өз шахаларыны гайгырмадык болса, онда сизи, ягны сапылан ябаны шахалары асла-да гайгырмаз.

²² Худайың мәхрибанлыгы ве берклиги барада ойланың. Ол йыкыланлар үчин беркдир, сизиң үчин болса мәхремдир. Эгер сиз Онуң мәхрибанлыгына бил багласаңыз, Ол хем сизе мәхрем болар. Эгер бил багламасаңыз, сиз хем кесилип ташланарсыңыз.

²³ Йөне ёлдан чыканлар хем имансызлыкларындан эл гөтерселер, тәзеден сапыларлар. Себәби Худай олары бага сапмагы башаряндыр.

²⁴ Эгер сиз ябаны зейтун агаҗындан кесилип, өз тебигы хәсиетлериңизе гарамаздан, идедилип етишдирилен зейтуна сапылан болсаңыз, онда аслы бу багдан болан шахалар өз зейтунына хас аңсат сапылар!

Тутуш Ысрайыл халас эдилер

²⁵ Эй, доганлар, сиз текепбирлиге йүз урмаз ялы, шу сырдан хабарлы болмагыңызы ислейәрин. Худай башга миллетлерден сайланларының барыны халас эдйәнчә, кәбир ысрайылларың йүреги юмшамаз.

^26-27 Чүнки тутуш ысрайыл халкы хут шейле халас эдилер. Мукаддес Язгыларда хем шейле язылгыдыр: «Мен Якуп неслиниң гүнәлерини багышланымда, олар билен эдйән әхтим, ине, шудур: Сиондан Халасгәр гелер, Ол Якуп неслинден худайсызлыгы айрар».

²⁸ Ысрайыл халкы Хош Хабары кабул этмән, Худая душман болды. Бу болса башга миллетлер, ягны сизиң үчин бәхбитли болды. Йөне ысрайыл халкы шонда-да Худайың сайлап-сечен халкыдыр. Худай олары ата-бабаларының хакы үчин сөййәндир.

²⁹ Чүнки Худай берен пешгешлерини ызына алмаяр, Өз чакылыгыны ятырмаяр.

³⁰ Сиз хем бирвагтлар Худая табын дәлдиңиз. Эмма ысрайылларың битабынлыгы аркалы Худайың сизе мерхемет эдиши ялы,

³¹ олар-да сизе эдилен мерхемете етҗек болуп, Худая табын болмаярлар.

³² Чүнки Худай хеммелере мерхемет этмек үчин, хеммелери битабынлыгың туссагы этди.

³³ Худайың байлыгы, даналыгы ве билими уммасыздыр! Онуң хөкүмлерини ким дүшүндирип билер? Онуң ёлларына ким акыл етирип билер?

³⁴ «Реббе ким акыл етирди? Ким Оңа маслахат берип билди?

³⁵ Худай бергили болар ялы, ким Оңа зат берди?»

³⁶ Хич ким! Чүнки бүтин барлык Худайдан болуп, Ол аркалы ве Онуң үчиндир! Оңа бакы шан-шөхрат болсун! Омын!