Rimliler 10 - Мукаддес Китап

10-нҗы бап

¹ Эй, доганлар, ысрайыл халкының халас болмагы мениң көңүл күйсегимдир. Мен бу хакда элмыдама Худая дога-дилег эдйәрин.

² Чүнки Худайың буйрукларыны берҗай этмекде оларың дийсең ыхласлыдыгына өзүм дири шаят. Эмма шейле ыхласлы болсалар-да, оларың Худай хакда хакыкы билими ёк.

³ Олар Худайың догрулыгына дүшүнмедилер. Шонуң үчин-де, Мусаның Кануныны берҗай этмек аркалы акланҗак болуп, Худайың догрулыгына табын болмадылар.

⁴ Иса Месих болса бу Кануның максадыны амала ашырды. Шонуң үчин-де, Оңа иман эдйән хер кес Худай тарапындан акланандыр.

⁵ Кануна даянян догрулык барада Муса шейле язяр: «Оны берҗай эдйән адам аман галар».

^6-7 Имана даянян догрулык барада, болса ол шейле диййәр: «„Ол ере ким чыкар?“, (ягны Месихи гөклерден индирмек үчин), „Дүйпсүз чукура ким инер?“, (ягны Месихи дирелтмек үчин) – дийип, өз-өзүңден сорама».

⁸ Шейле-де, имандан болан догрулык: «Бу сөз саңа якындыр, ол сениң агзыңда ве йүрегиңдедир» диййәр. Бу сөз болса бизиң вагыз эдйән иманымыз хакдакы хабардыр.

⁹ Шоңа гөрә-де, эгер сен агзың билен Иса Месихиң Ребдигини ыкрар этсең, Худайың Оны өлүмден дирелденине йүрекден иман этсең, халас боларсың.

¹⁰ Чүнки чын йүрекден иман эдйән адам акланар, агзы билен ыкрар эдйән хем халас болар.

¹¹ Мукаддес Язгылар хем: «Оңа бил баглан утандырылмаз» диййәндир.

¹² Бу яхудылара-да, бейлеки миллетлере-де дегишлидир. Себәби хеммелериң Ребби бирдир, Ол Өзүни чагырянларың барына сахыдыр.

¹³ Чүнки: «Ребби чагыран хер бир ынсан халас болар».

¹⁴ Йөне адамлар Худая иман этмеселер, Оны нәдип чагырсын? Худай барада эшитмеселер, Оңа нәдип иман этсин? Худай барада вагыз эдилмесе, адамлар Ол барада нәдип эшитсин?!

¹⁵ Эгер вагызчылар иберилмесе, нәдип вагыз эдилсин? Вагызчылар барада Мукаддес Язгыларда шейле язылгыдыр: «Хош Хабары ыглан эдйәниң гелши не гөзелдир!».

¹⁶ Йөне бу хабары хеммелер кабул этмеди. Ишая хем бу барада: «Я Реб, бизиң хабарымыза ким ынанды?» дийип сораяр.

¹⁷ Шунлукда, иман эшитмекден, хава, Иса Месих хакдакы Хош Хабары эшитмекден дөрейәндир.

¹⁸ Йөне мен шуны сорамакчы: эйсем ысрайыл халкы Хош Хабары эшитмедими? Элбетде, эшитди, себәби Мукаддес Язгыларда шейле язылгыдыр: «Тутуш ер йүзүне яйрандыр олаң овазы, дүнйәниң дөрт күнҗегине – олаң сөзлери».

¹⁹ Инди шуны хем сорайын: я ысрайыл халкы дүшүнмедимикә? Элбетде дүшүнди, себәби Худай Муса аркалы олара: «Мен хем миллет болмадыклар билен сени габандырарын, акмак бир халк билен оларың гахарыны гетирерин» дийипди.

²⁰ Ишая хем: «Мени агтармаянлар Мени тапдылар, Мени сорамаянлара Өзүми аян этдим» дийип, Реббиң сөзлерини батыргайлык билен мәлим эдйәр.

²¹ Ысрайыл хакда болса Реб: «Мен питнечи ве өздиенли халка гүнузын эллерими узадып отырын» дийип айдяр.