Rimliler 1 - Мукаддес Китап

1‑нҗи бап Саламлар

¹ Иса Месихиң гулы ве ресуллыга чагырылып, Худайың Хош Хабарыны вагыз этмәге сайланан мен Павлусдан догайы салам!

² Худай Мукаддес Язгыларда Өз пыгамберлери аркалы бу Хош Хабары вада берди.

³ Бу Хош Хабар Худайың Оглы Иса Месих хакдадыр. Ол ынсан тебигаты боюнча Давудың неслинденди.

⁴ Худай Реббимиз Иса Месихи өлүмден дирелдип, Оны Мукаддес Рухдан долдурды. Шейдип, Онуң Худайың гудратлы Оглудыгы тассыкланды.

⁵ Худай маңа Иса Месих аркалы мерхемет берип, ресуллыга сайлады. Ол муны әхли миллетлериң Худая иман гетирип, Оңа табын болмагы, Иса Месихиң адының шөхратланмагы үчин этди.

⁶ Сиз хем Иса Месихе дегишли болмага чагырылан шол миллетлериң арасындасыңыз.

⁷ Мен шу хатымы сизе, Римдәки доганларыма язярын. Худай сизиң хеммәңизи сөйүп, сизи Өзүниң халкы болмага чагырды. Гой, Атамыз Худайың ве Реббимиз Иса Месихиң мерхемети ве парахатлыгы сизе яр болсун!

Павлус Римдәки доганлары гөрмеги күйсейәр

⁸ Илки билен, Иса Месих аркалы әхлиңиз үчин Худайыма шүкүрлер эдйәрин, себәби иманыңыз барадакы хабар бүтин дүнйә яйрады.

⁹ Мен Худайың Оглы барадакы Хош Хабары яйрадып, Худая җан-тенден хызмат эдйәрин, сизиң үчин гиҗе-гүндиз дилег эдйәрин. Муңа Худайың хут Өзи шаятдыр.

¹⁰ Худайың ислегине гөрә сизиң яныңыза тизара барып билер ялы, Ондан бир ёл ачмагыны хемише сораярын.

¹¹ Сизи өрән гөресим гелйәр, иманыңызы беркитҗек рухы пешгешлери сизиң билен пайлашасым гелйәр.

¹² Мен иманымыз аркалы бири-биримизи рухландырмагымызы ислейәрин.

¹³ Эй, доганлар, шуны билмегиңизи ислейәрин: мен бейлеки миллетлериң арасында болшы ялы, сизиң хем араңыздакы хызматымың хасылыны гөресим гелди. Шоңа гөрә-де, яныңыза барҗак болуп, телим гезек сынанышдым. Эмма шу вагта ченли яныңыза барып билмедим.

¹⁴ Мен медениетли я-да медениетсиз, соватлы я-да соватсыз адамлара, гараз, хеммелере Хош Хабары вагыз этмәге борчлудырын.

¹⁵ Шонуң үчин-де, сизе, Римдәкилере хем Хош Хабары вагыз этмеги күйсейәрин.

Худайың гахар-газабы

¹⁶ Мен бу Хош Хабары вагыз этмекден утанмаярын, себәби ол Худайың гүйҗүдир. Худай бу Хош Хабар аркалы хер бир иман эдени: илки билен яхудылары, соңра яхуды дәллери халас эдйәр.

¹⁷ Хош Хабар Худайың адамлары аклаяндыгыны аян эдйәр. Ол иман эдйәнлери, хава, диңе иман эдйәнлери аклаяр. Чүнки Мукаддес Язгыларда: «Догручыл иман билен яшар» дийип язылгыдыр.

¹⁸ Яманлыклары билен хакыкаты бөкдейән адамларың худайсызлыгына ве яманлыгына гаршы Худай Өз гахар-газабыны гөкден аян эдйәр.

¹⁹ Бу адамлара Худай хакда билип болян затлар мәлимдир, себәби Худайың Өзи булары олара месе-мәлим этди.

²⁰ Худайың гөзе гөрүнмейән хәсиетлери: эбеди гудраты ве хак Худайдыгы дүнйә ярадылалы бәри Онуң ярадан затларындан месе-мәлим гөрүнйәндир. Шоңа гөрә-де, адамларың: «Худай хакда билмейәрис» диймәге хич тутарыгы ёкдур.

²¹ Олар Худай хакда билселер-де, Оны Худай хөкмүнде шөхратландырмадылар, Оңа шүкүр этмедилер. Терсине, бош пикирлере улашып, йүреклерини түмлүк гаплады.

²² Олар өзлерини акыллы сайып, акмак болдулар,

²³ бакы Худая сежде этмән, паны адамың, гушларың ве сүйрениҗилериң кешбиндәки бутлара сежде этдилер.

²⁴ Шонуң үчин Худай олары йүреклериниң гүнәли хөвеслериниң эден-этдилигине табшырды. Шу себәпден олар бири-бириниң беденлерини хаясыз ишлери билен веҗера этдилер.

²⁵ Олар Худай барадакы хакыкаты галп затлара чалышдылар. Ярадана дәл-де, ярадылан затлара сежде ве хызмат этдилер. Эмма бакы шөхрата диңе Ярадан мынасыпдыр. Омын!

²⁶ Хава, олар хакыкаты рет эденсоңлар, Худай олары өзлериниң веҗера хөвеслерине табшырды. Хатда аяллар хем тебигы җынс гатнашыгыны рет этдилер. Олар тебигы болмадык җынс гатнашыклара йүз уруп, бири-бирлери билен ятып турярлар.

²⁷ Шонуң ялы, эркеклер хем аял билен җынс гатнашыгыны терк эдип, бири-бирине болан мейил хесерине янярлар. Эркеклер эркеклер билен рысвалык эдип, өз азгынлыкларына лайык җеза алярлар.

²⁸ Бу адамлар Худайы танамалыдыр өйтмедилер. Шоңа гөрә-де, Худай олары азгын хөвеслерине табшырып, эдилмесиз затлары этмеклерине ёл берди.

²⁹ Оларың калбы хер түйсли яманлыкдан, адалатсызлыкдан, ачгөзлүкден ве азгынлыкдан долудыр. Олар гөрип, ганхор, давачыл, яланчы ве бетпәлдир. Олар гепчи,

³⁰ төхметчи, текепбир, өвүнҗең болуп, Худайы йигренйәрлер, яманлык этмегиң хер түйсли ёлларыны тапярлар, ата-энелерине гулак асмаярлар.

³¹ Олар доңйүрек, пәхимсиз, әхтиялан ве рехимсиздир.

³² Олар Худайың адалатлы Канунына гөрә шейле ишлери эдйәнлериң өлүме мынасыпдыгыны билселер-де, өз эдйән ишлеринде илерлейәрлер. Мунуң билен чәкленмән, башгаларың хем шейле этмегини оңлаярлар.