Resul 8 - Мукаддес Китап

8‑нҗи бап Шавул иманлылары ызарлаяр

¹ Стефаның өлдүрилмегини Шавул хем оңлады. Шол гүнден соң Иерусалимдәки йыгнагы ызгытсыз ызарламага башладылар. Ресуллардан башга хеммелер Яхудыя ве Самария себитлерине даргадылар.

² Эмма таква адамлар Стефаны җайлап, онуң үчин чуңңур яс тутдулар.

³ Шавул болса йыгнагы даргатмага башлады. Ол өйме-өй айланып, аял-эркек диймән, иманлылары сүйрәп, зындана дыкярды.

Филип Самарияда

⁴ Чар яна даргашып гиден иманлылар Худайың Хош Хабарыны әхли ерде вагыз эдйәрдилер.

⁵ Филип-де Самарияның бир шәхерине барып, олара Месих барада вагыз этди.

⁶ Филипи диңләп, амала ашыран гудратларыны гөрен мәхелле онуң айданларына дыкгат билен гулак асды.

⁷ Көп адамларың ичинден арвах-җынлар батлы гыгырышып чыкярдылар, көп санлы ысмаз ве отуралар шыпа тапярды.

⁸ Шейлеликде, ол шәхерде улы шатлык дөреди.

Симун җадыгөй

⁹ Ине, шол шәхерде өң җадыгөйлик билен мешгулланып, Самария халкыны хайран галдыран ве өзүни бейик адам дийип ыглан эден Симун атлы бир адам барды.

¹⁰ Улы-кичи хемме оны үнс берип диңләрди ве ол хакда: «Бейик гудрат дийип атландырылян Худайың гудраты, ине, шудур» диййәрдилер.

¹¹ Онуң җадыгөйлиги көпден бәри хеммәни хайрана гойярды, шонуң үчин оны дыкгат билен диңләрдилер.

¹² Эмма Филип Худайың Шалыгы ве Иса Месих барадакы Хош Хабары вагыз эденде, адамлар оңа ынандылар. Аял-эркек диймән оларың хеммеси Исаның ады билен сува чүмдүрилди.

¹³ Хатда Симун хем иман этди, сува чүмдүриленден соң болса Филипиң янындан айрылмады. Ол Филипиң амала ашырян бейик мугҗызаларыны ве гудратларыны гөрүп, хайран галярды.

¹⁴ Ресуллар самариялыларың Худайың Хош Хабарыны кабул эдендигини Иерусалимде эшидип, Петрус билен Ёханнаны оларың янына ибердилер.

¹⁵ Петрус билен Ёханна ол ере барып, оларың хем Мукаддес Рухы алмагы үчин дога-дилег этдилер.

¹⁶ Себәби Мукаддес Рух энтек оларың хич бириниң үстүне инмәнди, олар диңе Реб Исаның ады билен сува чүмдүрилипди.

¹⁷ Соңра Петрус билен Ёханна эллерини оларың үстүне гойдулар ве олар хем Мукаддес Рухы кабул этдилер.

¹⁸ Ресулларың эллериниң гоюлмагы билен Мукаддес Рухуң берленини гөрен Симун олара пул хөдүр эдип:

¹⁹ «Маңа-да шу гудратдан бериң. Элими кимиң башына гойсам, ол адам Мукаддес Рухы алсын» дийди.

²⁰ Эмма Петрус оңа шейле дийди: «Пулуң өзүң билен биле ёк болсун! Себәби сен Худайың пешгешини сатын аларын өйтдүң.

²¹ Бу ишде сениң не пайың, не-де хакың бар, себәби сениң йүрегиңе дүвен ниетиң Худайың назарында догры дәл.

²² Инди тоба эдип, бу яман ниетиңден эл чек-де, Реббе ялбар, белки, йүрегиңдәки бу ниетиңи багышлар.

²³ Мен сениң аҗы зәхерден долудыгыңы ве гүнә зынҗыры билен багланандыгыңы гөрйәрин».

²⁴ Симун оңа: «Мениң үчин Реббе дога эдиң, айданларыңызың хич бирине дучар болмайын!» дийди.

²⁵ Петрус билен Ёханна шаятлык эдип, Реббиң Хош Хабарыны вагыз этдилер. Соңра олар Самарияның көп обасында Хош Хабары ыглан эдип, Иерусалиме доланып гелдилер.

Филип ве эфиопиялы

²⁶ Реббиң бир перишдеси Филипе: «Тур, гүнорта тарап, Иерусалимден Газа барян чөллүк ёлдан гит» дийди.

²⁷ Ол хем туруп, ёла дүшди. Гидип барярка, эфиопиялы бир агта душды. Ол Эфиопияның меликеси Кандакының баш везирлериниң бириди ве онуң тутуш газнасыны доландырярды. Ол Иерусалиме ыбадат этмәге гелип,

²⁸ инди хем ызына доланып барярды. Ол өз арабасының үстүнде Ишая пыгамбериң китабыны окап отырды.

²⁹ Мукаддес Рух Филипе: «Бар, арабаның янындан йөре!» дийди.

³⁰ Филип ылгады-да, онуң Ишая пыгамбериң китабындан окаян сөзлерини эшидип: «Окаян затларыңа дүшүнйәрмиң?» дийип сорады.

³¹ Ол: «Бири дүшүндирмесе, нәдип дүшүнейин?» дийди. Онсоң Филипи араба мүнүп, янында отурмага чагырды.

³² Онуң Мукаддес Язгылардан окап отуран ери, ине, шуды: «Союлмага әкидилип барян гоюн дек, гыркымчының өңүндәки сессиз гузы дек, Ол хич агзыны ачмады.

³³ Ол кемсидилип, адалатсызлык билен әкидилди. Онуң несли хакда ким айдып билҗек? Чүнки Онуң өмүр танапы үзүлди».

³⁴ Эфиопиялы Филипден: «Айтсаңызлаң, пыгамбер муны ким хакда айдяр? Өзи хакдамы я-да башга бири хакда?» дийип сорады.

³⁵ Онсоң Филип дүшүндирмәге башлады, Мукаддес Язгыларың шу ердәки парчасындан башлап, Иса хакдакы Хош Хабары оңа вагыз этди.

³⁶ Олар ёлда барярка, бир сувлы ериң үстүнден гелдилер. Агта: «Ине, бу ерде сув бар. Мениң чүмдүрилмегиме нәме пәсгел берйәр?» дийди.

³⁸ Онсоң арабаны саклатды. Филип билен агта билеликде сува гирдилер. Филип оны сува чүмдүрди.

³⁹ Олар сувдан чыканларында, бирденкә Реббиң Рухы Филипи ол ерден әкитди. Агта оны гайдып гөрмеди. Ол шатланып, өз ёлуны довам этдирди.

⁴⁰ Филип болса Ашдотда пейда болды. Ол Кайсария барып етйәнчә, әхли шәхерлерде Хош Хабары вагыз этди.