Resul 28 - Мукаддес Китап

28‑нҗи бап Павлус Малтада

¹ Биз кенара саг-аман чыканымыздан соң, бу аданың адының Малтадыгыны билдик.

² Ерли халк бизиң билен өрән мылакатлы болды. Хова ягышлы ве совук болансоң, олар от якып, хеммәмизи оңат гаршы алдылар.

³ Павлус бир үйшмек одун чөпләп, одуң үстүне гоянда, бир зәхерли йылан одуң ховрундан гачып, онуң элине япышды.

⁴ Ерли халк онуң элинден йыланың салланып дуршуны гөренде, бири-бирине: «Бу адам ганхор болса герек, ол деңизден халас болса-да, такдыры оны яшамага гоймады» дийишдилер.

⁵ Эмма Павлус элини силкип, йыланы одуң ичине зыңды, хич бир зыян хем гөрмеди.

⁶ Адамлар онуң чишмегине я-да бирденкә өлүп йыкылмагына гарашдылар. Эмма көп гарашып, оңа хич зат болмандыгыны гөренлеринде, пикирлерини үйтгедип: «Ол худайдыр!» дийишдилер.

⁷ Ол ериң голайында аданың Публий атлы башлыгының мүлки барды. Публий бизи мыхман алып, үч гүнләп йүрекден хызмат этди.

⁸ Шол вагт онуң какасыны ысытма ве ичагыры тутуп ятырды. Павлус хассаның янына гелди ве дога-дилег этди-де, онуң үстүне элини гоюп, шыпа берди.

⁹ Бу вакадан соң, ададакы бейлеки хассалар-да гелип шыпа тапдылар.

¹⁰ Олар бизе көп сылаг-хормат этдилер. Ёла уграмакчы боланымызда, бизе зерур әхли затлары гетирип, гәмә йүкледилер.

Павлус Риме гелйәр

¹¹ Үч айдан соң, биз Экиз худайлар атлы гәми билен деңзе чыкдык. Бу гәми Исгендериядан гелип, гышда шол адада галыпды.

¹² Биз Сиракус шәхерине барып, ол ерде үч гүн галдык.

¹³ Ол ерден айланып, Регия гелип етдик. Эртеси гүн гүнорта шемалы өвсүп башлады. Мунуң көмеги билен ики гүнде Путеёл шәхерине етдик.

¹⁴ Ол ерде бирнәче доганлары тапдык. Олар бизден янларында галмагымызы хайыш этдилер ве биз ол ерде ики хепде галдык. Шондан соң биз Риме гелдик.

¹⁵ Римдәки доганлар бизиң гелендигимизи эшидип, бизи гаршыламак үчин ол ерден Аппиюс базарына ве Үч кервенсарай диен оба ченли гелдилер. Павлус олары гөренде, Худая шүкүр эдип, ене гайрата галды.

¹⁶ Биз Риме геленимизден соң, Павлуса бир эсгериң гөзегчилиги астында өзбашдак яшамага ругсат берилди.

Павлус Римде вагыз эдйәр

¹⁷ Үч гүнден соң Павлус яхудыларың ёлбашчыларыны чагырды. Олар бир ере үйшенде, Павлус олара шейле дийди: «Эй, доганлар! Мен халкымыза я-да ата-бабаларымызың адатларына гаршы хич зат этмесем-де, Иерусалимде туссаг эдилип, римлилериң элине табшырылдым.

¹⁸ Олар мени сорага чекенлеринден соң, бошатҗак болдулар, себәби мени өлдүрмәге хич бир эсас тапмадылар.

¹⁹ Эмма яхудылар гаршы чыканларында, мен давамы императора арз этмәге меҗбур болдум. Бейтмек билен мен өз халкымы айыпламакчы дәлдирин.

²⁰ Шу себәпден мен сизиң билен гөршүп, сөхбет этмек үчин, сизи бу ере чагырдым. Аслында мен Ысрайылың умыды болан Месих угрунда зынҗырландым».

²¹ Олар Павлуса шейле дийдилер: «Биз сен хакда Яхудыядан хич бир хат алмадык, ол ерден гелен доганларымыздан хем хич ким сен барада ягшыдан-ямандан хич зат хабар бермеди.

²² Эмма бизиң сениң пикирлериңи өзүңден эшидесимиз гелйәр, себәби хемме ерде бу дини топара гаршы чыкыляндыгыны билйәрис».

²³ Шейлеликде, олар Павлус билен душушык гүнүни беллешдилер. Шол гүн онуң болян ерине җуда көп адам гелди. Павлус эртирден агшама ченли олара Худайың Шалыгыны дүшүндирип, вагыз этди. Мундан башга-да олары ынандырып, Төврат билен пыгамберлериң язгыларындан Иса догрусында ынандырыҗы делиллер гетирди.

²⁴ Кәбирлери онуң сөзлерине ынанды, кәбири ынанмады.

²⁵ Олар бири-бири билен өзара ылалашмадылар. Олар гитмекчи болуп дуркалар, Павлус шейле дийди: «Ишая пыгамбер аркалы Мукаддес Рух ата-бабаларыңыза шу сөзлери җайдар айдыпдыр:

²⁶ „Бар-да, бу халка шейле дий: Эшидип дурсаңыз-да, хич дүшүнмерсиңиз, середип дурсаңыз-да, хич аңламарсыңыз.

²⁷ Бу халкың йүреги күтелди, гулаклары кер ачды, гөзлери гапылды. Ёгсам гөзлери билен гөрүп, гулаклары билен эшидердилер, аңлары билен аңлап, Маңа тарап доланардылар, Мен хем олара шыпа берердим“.

²⁸ Шонуң үчин инди шуны билип гоюң: Худайың халас болмак барадакы Хош Хабары яхуды дәллере иберилди. Олар гулак асарлар».

³⁰ Павлус кирейине алан җайында тутуш ики йыл яшады ве янына геленлериң хеммесини кабул этди.

³¹ Ол батыргайлык билен ве хич бир бөкденчсиз Худайың Шалыгыны вагыз эдип, Реббимиз Иса Месих барада өвретди.