Resul 24 - Мукаддес Китап

24‑нҗи бап Павлус Феликс хәкимиң өңүнде

¹ Бәш гүнден соң баш руханы Хананы бирнәче яшулулар ве Тертул атлы гаралавҗы билен Кайсария гелди. Олар Павлуса гаршы шикаятларыны хәкиме етирмекчидилер

^2-3 Павлусы чагырып гетиренлеринде, Тертул оны айыпламага башлады: «Белент мертебели Феликс! Сениң саяңда биз энчеме вагтдан бәри парахатчылыкда яшаярыс. Узакдан гөрүҗилигиң билен халкымыз үчин улы өзгертмелери амала ашырдың. Биз муны хемме ерде ве хемише чуңңур миннетдарлык билен тассыклаярыс.

⁴ Мен сениң көп вагтыңы алмакчы дәл, өз мәхремлигиң билен бизиң гысга хабарымыза гулак асмагыңы хайыш эдйәрин.

⁵ Биз бу адамың дүнйәдәки әхли яхудыларың арасында гозгалаң турузян бир питнечидигине гөз етирдик ве ол Насыра топарының баштутаны.

^6-8 Ол хатда ыбадатхананы-да харама чыкармага сынанышды. Сениң өзүң хем бу адамы сорага чекип, бизиң оны нәмеде айыплаяндыгымызы онуң өзүнден аныклап билерсиң».

⁹ Ол ердәки яхудылар хем айдыланларың догрудыгыны тассыкламак билен бу айыпламалара гошулдылар.

¹⁰ Хәким Павлуса гепләбер дийип ышарат эденден соң, ол сөзе башлады: «Сениң көп йыллардан бәри бу миллетиң үстүнден казылык эдйәндигиңи билйәрин. Шонуң үчин өзүми сениң хузурыңда гораяндыгыма җуда бегенйәрин.

¹¹ Худая сежде этмек үчин Иерусалиме бараныма он ики гүнден көп болмандыгыны өзүң хем аныклап билерсиң.

¹² Бу адамлардан хич бири мениң ыбадатханада бири билен җеделлешеними, синагогаларда я болмаса шәхерде халкы аяга галдыранымы гөрен дәлдир.

¹³ Олар маңа йөңкейән айыпларыны саңа субут эдип билмезлер.

¹⁴ Эмма саңа шуны ыкрар этмек билен оларың „галп таглымат“ дийип атландырян „Исаның Ёлы“ топарына дегишлидигими мәлим эдйәрин. Мен ата-бабаларымызың Худайына сежде эдйәрин. Төвратда ве пыгамберлериң язгыларында язылан хер бир сөзе ынанярын.

¹⁵ Эдил бу адамлар ялы, мен хем догруларың-да, догры дәллериң-де өлүмден дирелҗекдигине Худая умыт баглаярын.

¹⁶ Шонуң үчин хем Худайың ве ынсанларың өңүнде выжданымы хемише пәк сакламага чалышярын.

¹⁷ Мениң Иерусалимде болманыма энчеме йыл болды, инди болса халкымың гарыпларына садака бермек үчин ол ере гелдим.

¹⁸ Бу затлар билен мешгулланяркам, олар мени ыбадатханада гөрдүлер. Мен тәмизлениш дессурыны берҗай эдйәрдим, янымда хич хили мәхелле-де, гозгалаң-да ёкды.

¹⁹ Эмма ол ерде Азия велаятындан гелен кәбир яхудылар барды. Оларың маңа гаршы шикаятлары бар болса, оларың өзлериниң шу ере гелип, мени сениң хузурыңда айыпламаклары герекдир.

²⁰ Я-да бу ердәкилер ёкары меҗлисиң өңүнде дуранымда, менден нәме җенаят тапандыкларыны, гой, айтсынлар.

²¹ Оларың өңүнде дуруп, белент сес билен: „Өлүлер дирелйәр диеним үчин бу гүн сизиң өңүңизде хөкүм эдилйәрин“ дийдим. Мундан башга мениң нәме айыбым бар?»

²² «Исаның Ёлы» атлы топар догрусында хас такык маглуматы болан Феликс иши соңа гоюп: «Даваңыз хакда мүңбашы Лисияс геленден соң карар чыкарарын» дийди.

²³ Феликс ол ердәки йүзбаша Павлусы гөз астында сакламагы, эмма оңа бираз эркинлик бермеги, онуң мәтәчликлерине голдав бермек ислейән достларына ругсат этмеги буюрды.

²⁴ Бирнәче гүнден соң болса, Феликс өз яхуды аялы Друсилла билен гелди-де, Павлусы чагыртды ве Иса Месихе болан иман хакдакы онуң гүррүңлерини диңледи.

²⁵ Павлус догрулык, өзерклилик хем гелҗек хөкүм хакда сөхбет эденде, Феликс горкуп: «Болды, хәзирликче гит, аматлы пурсат геленде, ене сени чагырдарын» дийди.

²⁶ Шейле хем, Феликс Павлусдан пара тама эдип, оны йыгы-йыгыдан чагырдып, онуң билен сөхбет эдйәрди.

²⁷ Арадан ики йыл геченден соң, Феликсиң ерине Поркий Фестус хәким болды. Феликс яхудыларың гөвнүни авламак үчин, Павлусы туссаглыкда гоюп гитди.