Resul 23 - Мукаддес Китап

23‑нҗи бап Павлус ёкары меҗлисиң өңүнде

¹ Павлус ёкары меҗлисе дыкгат билен середип: «Эй, доганлар! Мен шу гүне ченли Худайың өңүнде арасса выждан билен яшадым» дийди.

² Баш руханы Хананы Павлусың янында дуранлара онуң агзына урмагы буюрды.

³ Павлус оңа: «Сени Худай урар, эй, йүзи акланан дивар! Өзүң-ә мениң үстүмден кануна гөрә хөкүм чыкармак үчин отырсың, соңам болса кануны бозуп, мени урмагы буюрярсың» дийди.

⁴ Павлусың янында дуранлар ондан: «Сен нәме үчин Худайың баш руханысына дил етирйәрсиң?» дийип сорадылар.

⁵ Павлус: «Доганлар, онуң баш руханыдыгыны билмәндирин. Ёгсам Мукаддес Язгыларда хем: „Өз халкыңың ёлбашчысыны нәлетлеме“ дийип язылан» дийди.

⁶ Павлус оларың бир бөлегиниң саддукейлер, бейлеки бөлегиниң-де фарисейлердигини билип: «Эй, доганлар, мен фарисей, фарисейиң оглудырын. Мен өлүлериң дирелйәндигине умыт баглаяндыгым үчин хөкүм эдилйәрин!» дийип, меҗлисде батлы гыгырды.

⁷ Павлусың бу сөзүнден соңра фарисейлер билен саддукейлериң арасына агзалалык дүшүп, йыгнанан мәхелле икә бөлүнди.

⁸ (Саддукейлер дирелиш-де, перишде-де, рух-да ёк диййәрдилер, фарисейлер болса буларың хеммесине ынанярдылар.)

⁹ Шейлеликде, улы галмагал турды. Фарисейлериң тарапыны тутян кәбир Төврат мугаллымлары еринден туруп, улы дава туруздылар. Олар: «Биз бу адамда хич хили айып тапмадык. Онуң билен бир рух я перишде геплешен болса нәбилйәңиз?» дийдилер.

¹⁰ Дава-җенҗел шейле бир гызды велин, мүңбашы оларың Павлусы парчаламакларындан хедер эдип, эсгерлере гелип, оны оларың арасындан сүйрәп чыкарып, гала әкитмеги буюрды.

¹¹ Шол гиҗе Реб Иса Павлуса гөрнүп, оңа: «Мерт бол! Сен Мен хакда Иерусалимде нәхили шаятлык эден болсаң, Римде-де шейле шаятлык этмелисиң» дийди.

Павлуса каст этмек барада дилдүвшүк

¹² Эртеси гүн яхудылар бири-бирлери билен дил бирикдирип, Павлусы өлдүрйәнчәлер, ийип-ичмезлиге касам этдилер.

¹³ Бу дилдүвшүге гатнашанларың саны кыркдан хем көпди.

¹⁴ Олар ёлбашчы руханыларың ве яшулуларың янына гелип: «Биз Павлусы өлдүрйәнчәк, хич зат ийип-ичмезлиги берк касам этдик.

¹⁵ Шейлеликде, сиз ёкары меҗлис билен билеликде мүңбашыдан Павлусы ызына гетирмеги хайыш эдиң. Ол хакдакы маглуматлары долы өвренмек ислейәрис диен болуң. Павлус бу ере гелип етмәнкә, биз оны ёлда өлдүрмәге тайын» дийдилер.

¹⁶ Эмма Павлусың егени оларың дилдүвшүк гураныны эшидип, гала барды-да, муны Павлуса хабар берди.

¹⁷ Павлус хем йүзбашыларың бирини янына чагырып: «Бу йигиди мүңбашының янына элт, оңа бир зат барада хабар бермекчи» дийди.

¹⁸ Онсоң йүзбашы оны алып, мүңбашының янына гетирди. Оңа: «Туссаг Павлус мени чагырып, шу йигиди сениң яныңа гетирмегими хайыш этди. Онуң саңа айтҗак зады бар экен» дийди.

¹⁹ Мүңбашы йигиди голтуклап, бир гыра чекди-де, ондан: «Сен маңа нәме хакда хабар бермекчи?» дийип сорады.

²⁰ Ол шейле җогап берди: «Яхудылар ве ёкары меҗлис билеликде Павлус хакдакы маглуматлары долы өвренмек баханасы билен, оны эртир меҗлисе гетирмеги сенден хайыш этмек үчин диллешдилер.

²¹ Эмма сен оларың сөзүне гулак асма, себәби кыркдан говрак адам гизленип, Павлуса букуда гарашяр. Олар Павлусы өлдүрйәнчәк, ийип-ичмерис дийип касам этдилер. Шу вагт олар тайяр болуп, сениң разычылыгыңа гарашярлар».

²² Мүңбашы ол йигиди уградып: «Муны маңа хабар берениңи хич киме айтмагын» дийип табшырды.

Павлус Кайсария иберилйәр

²³ Онсоң мүңбашы йүзбашыларындан икисини янына чагырып: «Агшам сагат докузда Кайсария гитмек үчин, ики йүз саны пыяда, етмиш саны атлы эсгери ве ики йүз найзачы тайынлаң.

²⁴ Павлусы хем ата мүндүрип әкидип, саг-аман хәким Феликсиң янына алып барың» дийип табшырык берди.

²⁵ Соңра мүңбашы шейле мазмунлы хат язды:

²⁶ «Чуңңур хорматланян хәким Феликсе Клавдий Лисиясдан догайы салам!

²⁷ Яхудылар бу адамы тутуп өлдүрҗек болуп дуркалар, мен онуң римлидигини билип, эсгерлерим билен етишип, оны халас этдим.

²⁸ Онуң нәме айыбының бардыгыны билмек үчин, оны яхудыларың ёкары меҗлисине алып гелдим.

²⁹ Мен оны өзлериниң дини кануны билен баглы меселелерде айыплаяндыкларыны билдим, эмма онда өлүме я-да туссаг этмәге лайык хич хили эсас ёкдур.

³⁰ Бу адама каст эдилҗек боляндыгы барадакы хабары аланымда болса, оны шобада сениң яныңа ибермеги карар этдим. Оны айыплаянлара-да өз шикаятларыны саңа мәлим этмеклерини буюрдым».

³¹ Эсгерлер өзлерине буйрулышы ялы, Павлусы алып, гиҗе Антипатрисе гетирдилер.

³² Эртеси гүн атлы эсгерлер Павлус билен биле ёлларыны довам этдирдилер, бейлекилер болса гала доландылар.

³³ Атлылар Кайсария геленлеринде, хаты хәкиме говшурып, Павлусы-да онуң элине табшырдылар.

³⁴ Хәким хаты окап, Павлусың хайсы велаятдандыгыны сорады. Павлусың Киликиядандыгыны биленде болса:

³⁵ «Сени айыплайҗылар геленсоң диңләрин» дийди. Соңра Павлусың Хиродың көшгүнде гөзегчилик астында сакланмалыдыгы барада буйрук берди.