Resul 15 - Мукаддес Китап

15‑нҗи бап Иерусалимдәки маслахат

¹ Яхудыядан бирнәче адам Антиёха гелип, доганлара: «Мусаның адаты боюнча сүннетленмесеңиз, халас болуп билмерсиңиз» дийип өвредйәрдилер.

² Павлус билен Барнап бу адамлар билен көп чекелешип җеделлешдилер. Онсоң бу меселәни чөзмек үчин, бейлеки доганларың бирнәчеси билен бирликде, Павлус билен Барнап Иерусалимдәки ресулларың, ёлбашчыларың янына гитмели диен карара гелинди.

³ Иманлылар йыгнагы олары ёла салып угратды. Олар Финикияның ве Самарияның ичинден гечип, кесеки миллетлериң-де Худайы кабул эдендиклери барада гүррүң бердилер. Бу хабар хемме иманлылара улы шатлык гетирди.

⁴ Иерусалиме геленлеринде болса, ресуллардыр ёлбашчылар ве тутуш йыгнак олары гызгын гаршылады. Павлус билен Барнап Худайың өзлери аркалы битирен әхли ишлерини йыгнананлара гүррүң бердилер.

⁵ Эмма фарисейлер топарындан иман эденлериң кәбири аяга галып: «Кесеки миллетлерден боланлары сүннетлемели ве олара Мусаның кануныны берҗай этмеги табшырмалы» дийдилер.

⁶ Онсоң ресуллар ве ёлбашчылар бу меселе барада маслахатлашмага йыгнандылар.

⁷ Йыгнакда гүррүң узага чекенсоң, Петрус еринден туруп, олара шейле дийди: «Доганлар! Өзүңиз билйәнсиңиз, кесеки миллетлере Хош Хабары вагыз этмегим үчин, энчеме вагт мундан өң Худай араңыздан мени сайлады. Ол муны миллетлериң Хош Хабары эшидип, иман этмеги үчин шейле этди.

⁸ Хер бир ынсаның йүрегини билйән Худай бизе берен Мукаддес Рухуны кесеки миллетлере хем берди. Шу аркалы олары кабул эдендигини тассыклады.

⁹ Худай оларың иманы аркалы йүреклерини пәкледи. Шейдип, Худай бизиң билен кесеки миллетлериң арасындакы пархы ёк этди.

¹⁰ Бейле болса, нәме үчин ата-бабаларымызың ве өзүмизиң гөтерип билмедик боюнтырыгымызы шәгиртлериң бойнуна саляңыз? Худайы сынаҗак болярсыңызмы?

¹¹ Ёк! Биз өзүмизиң хем, оларың хем Реббимиз Исаның мерхемети билен халас боляндыгымыза ынанярыс».

¹² Онсоң хеммелер дымып, Павлус билен Барнабы диңледилер. Олар Худайың өзлери аркалы кесеки миллетлере гөркезен бейик аламатларыны ве мугҗызаларыны гүррүң бердилер.

¹³ Олар гүррүңлерини гутарандан соң, Якуп сөзе башлап, шейле дийди: «Доганлар, маңа гулак асың!

¹⁴ Ине, Симун бизе Худайың илки билен кесеки миллетлере нәхили назар саландыгыны ве оларың арасындан Өзүне бир халк сайлап аландыгыны дүшүндирип берди.

¹⁵ Пыгамберлериң сөзлери-де бу айдыланлар билен габат гелйәр. Ине, онда шейле язылан:

¹⁶ „Мундан соң Мен доланып гелип, Давудың йыкылан чадырыны дикелдерин. Вейран болан ерлерини оңарып, оны тәзеден бина эдерин.

¹⁷ Шейдип, аман галанлар Ребби агтарсын, Маңа дегишли әхли миллетлер Ребби гөзлесин. Муны бу затлары эдйән Реб айдяндыр,

¹⁸ булар гадымдан мәлимдир“.

¹⁹ Шонуң үчин хем Худайы кабул эдйән кесеки миллетлере кынчылык дөретмели дәл диен карара гелдим.

²⁰ Гайтам, олара хат язып, шейле диелиң: „Бутлара хөдүрленен гурбанлык этини иймекден, зынадан, дамагы чалынмадык харам хайваның этинден ве ганындан даш дуруң“.

²¹ Чүнки Мусаның кануны гадым дөвүрден бәри хер бир шәхерде вагыз эдилйәр, хер Сабат гүни синагогаларда окаляр».

Кесеки миллетлерден болан иманлылара хат

²² Соңра ресуллар ве йыгнагың ёлбашчылары тутуш иманлылар йыгнагы билен бирликде бирнәче адамы сайлап, олары Павлус хем-де Барнап билен Антиёха ибермек карарына гелдилер. Олар ики адамы: Барсаба лакамлы Юдасы ве Силасы сайладылар, оларың икиси-де доганларың арасында ёлбашчыдылар.

²³ Эллерине шу хаты берип, олары угратдылар: «Сизиң доганларыңыз болан биз ресуллар ве ёлбашчылар Антиёхда, Сирияда, Киликияда яшаян яхуды дәл иманлы доганлара салам ёллаярыс.

²⁴ Бизиң эшидишимизе гөрә, арамыздан кәбирлери барып, өз сөзлери билен сизи ховсала салып, аңыңызы булашдырыпдырлар. Эмма олары биз ибермедик.

²⁵ Шонуң үчин хем арамыздан бирнәче адамы сайлап, олары эзиз достларымыз Барнап ве Павлус билен биле сизиң яныңыза ёлламагы бир агыздан карар этдик.

²⁶ Булар Реббимиз Иса Месихе гуллук этмек үчин җаныны орта гоян адамлардыр.

²⁷ Шейлеликде, биз Юдас билен Силасы ёллаярыс, олар бизиң язанларымызы дил үсти билен тассыкларлар.

²⁸ Биз Мукаддес Рухуң ёлбашчылыгында шу ваҗып талаплардан башга хич бир зады сизиң үстүңизе йүклемезлиги макул гөрдүк:

²⁹ бутлара хөдүрленен гурбанлык этини иймекден, зынадан, дамагы чалынмадык харам хайваның этинден ве ганындан даш дуруң. Шулардан саклансаңыз, ягшы иш эдерсиңиз. Хош, саг-саламат болуң».

³⁰ Шейлеликде, олар ёла дүшдүлер. Антиёха гелип, иманлылары үйшүрдилер-де, хаты говшурдылар.

³¹ Иманлылар хатдакы рухландырыҗы хабары окап, шат болдулар.

³² Юдас билен Силас пыгамбердилер. Олар доганлара көп өвүт-несихат эдип, оларың иманыны беркитдилер.

³³ Бирнәче вагт ол ерде боланларындан соңра, доганлар олары ресулларың янына саг-саламат уградып гойбердилер.

³⁵ Павлус ве Барнап хем Антиёхда галдылар. Олар башгалар билен бирликде халка сапак өвредип, Реб Иса хакындакы Хош Хабары вагыз этдилер.

Павлус билен Барнап бири-бирлеринден айрылярлар

³⁶ Бирнәче гүнден соң Павлус Барнаба: «Инди Реббиң Хош Хабарыны вагыз эден шәхерлеримизе доланып баралы, ол ердәки доганларымызы гөрүп, хал-ягдайларыны соралы» дийди.

³⁷ Марк дийлип атландырылян Ёханнаны-да Барнап өзлери билен әкитмек ислейәрди.

³⁸ Эмма Павлус өзлерини Памфилияда терк эдип, Худайың хызматыны ахырына ченли биле довам этмедик Маркы әкитмеги макул билмеди.

³⁹ Шейлеликде, араларында агзалалык дөрәп, олар бири-бирлеринден айрылдылар. Барнап янына Маркы алып, гәми билен Кипре гитди.

⁴⁰ Павлус болса Силасы сайлады, иманлылар олары Реббиң мерхеметине табшыранларындан соңра, олар ёла дүшдүлер.

⁴¹ Олар Сирия, Киликия айланып, йыгнаклары беркитдилер.