Resul 11 - Мукаддес Китап

11‑нҗи бап Петрус болан вакалар барада гүррүң берйәр

¹ Ресуллар ве яхудыялы доганлар кесеки миллетлериң-де Худайың Хош Хабарыны кабул эдендиклерини эшитдилер.

² Петрус Иерусалиме геленде, яхуды иманлылар онуң билен давалашып:

³ «Сен сүннетсиз адамларыңка мыхман болупсың, олар билен биле нахарланыпсың» дийдилер.

⁴ Шонда Петрус башындан гечен ваканы җикме-җик гүррүң бермәге башлады:

⁵ «Яфо шәхеринде Худая дога эдип отыркам, маңа бир гөрнүш аян болды. Мен яныма улы сачага меңзеш бир задың дөрт бурчундан асылып, гөкден ере иненини гөрдүм.

⁶ Онуң ичине дыкгат билен середип сынланымда, өй хайванларындан башлап, ябаны хем сүйрениҗи хайванлардыр гушлары гөрдүм.

⁷ Соңра бир сесиң маңа: „Петрус, тур, дамакларыны чал-да, ий!“ диенини эшитдим.

⁸ Мен: „Ёк, я Реб, асла бейтмерин! Мен хич хачан харам затлары агзыма дегрен дәлдирин“ дийдим.

⁹ Эмма гөкден гелен сес икинҗи гезек маңа: „Худайың халал диен затларына харам диймегин!“ дийди.

¹⁰ Бу үч гезек гайталанып, хеммеси ене ёкары гөге алынды.

¹¹ Ине, шол вагт Кайсариядан иберилен үч адам мениң болян өйүмиң өңүне гелип дурдулар.

¹² Онсоң Мукаддес Рух маңа икирҗиңленмән, олар билен гитмелидигими айтды. Янымдакы бу алты доган хем мениң билен биле гитди, биз ол адамың өйүне бардык.

¹³ Ол адам хем бизе өйүнде өзүне гөрнен перишде барада гүррүң берди. Перишде оңа: „Яфо адам ёлла-да, Петрус лакамлы Симуны гетирт.

¹⁴ Онуң саңа айтҗак хабары аркалы өзүң ве тутуш өй-ичериң халас болар“ дийипдир.

¹⁵ Мен сөзе башланымда, Мукаддес Рух өң бизиң үстүмизе иниши ялы, оларың үстүне хем инди.

¹⁶ Шонда Реббимиз Исаның: „Яхя сува чүмдүрди, эмма сиз Мукаддес Руха чүмдүрилерсиңиз“ диен сөзи ядыма дүшди.

¹⁷ Шейлеликде, Реббимиз Иса Месихе иман эденимизде, Худай бизе берен пешгешини олара хем берен болса, Худая гаршы дурар ялы, мен ким болупдырын?»

¹⁸ Доганлар бу сөзлери эшиденлеринден соңра көшешдилер. Худайы шөхратландырып: «Худай хатда кесеки миллетлере-де тоба эдип, бакы яшайша говушмаклыгы берипдир» дийишдилер.

Антиёхдакы иманлылар

¹⁹ Стефан өлдүриленден соң башланан ызарланмалар зерарлы иманлылар Финикия, Кипре ве Антиёха ченли даргадылар. Олар Хош Хабары яхудылардан башга хич киме вагыз этмейәрдилер.

²⁰ Оларың арасында Кипрден ве Киринейден Антиёха гелен кәбир иманлылар барды. Олар Реб Иса барадакы Хош Хабары ол ердәки башга миллетлере-де вагыз этдилер.

²¹ Оларда Реббиң гудраты барды, шонуң үчин көп адамлар имана гелип, Ребби кабул этдилер.

²² Бу хакдакы хабарлар Иерусалимдәки йыгнага барып етди. Олар Барнабы Антиёха ёлладылар.

²³ Барнап геленде, Худайың мерхеметиниң субутнамасыны гөрүп шат болды. Ол Реббе чын йүрекден садык болмагы хеммелере үндеди.

²⁴ Онуң Мукаддес Рухдан ве имандан долы бир ягшызада адамдыгы үчин, җуда көп адам Реббе иман этди.

²⁵ Онсоң Барнап Шавулы гөзләп, Тарсуса гитди.

²⁶ Оны тапып, Антиёха гетирди. Шейдип, Барнап билен Шавул бир йыллап ол ердәки йыгнаклары бир ере топлап, көп адамлара таглымат өвретдилер. Шәгиртлере илкинҗи гезек Антиёх шәхеринде «месихилер» дийлип ат берилди.

²⁷ Шол гүнлерде Иерусалимден Антиёха бирнәче пыгамберлер гелдилер.

²⁸ Олардан бириниң ады Агапды. Ол еринден туруп, Рим империясында ёвуз ачлыгың болҗакдыгы барада Мукаддес Рух аркалы велилик этди. Бу ачлык император Клавдиниң доландырян дөврүнде болуп гечди.

²⁹ Шонда шәгиртлериң әхлиси гүйчлериниң етдигинден яхудыялы доганлара голдав үчин пул ёлламагы карар этдилер.

³⁰ Олар шейле хем этдилер, пулы Барнап ве Шавул аркалы йыгнак ёлбашчыларына ибердилер.