Resul 10 - Мукаддес Китап

10-нҗы бап Йүзбашы иман эдйәр

¹ Кайсарияда Корнелий атлы бир адам барды. Ол «Италия» атлы рим гошун бөлүминиң йүзбашысыды.

² Корнелий худайхон адам болуп, өзи хем, өй-ичерси хем Реббе сежде эдйәрди. Ол халкың арасындакы мәтәчлере көп көмек эдип, элмыдама Худая дога эдерди.

³ Бир гүн өйлән сагат үчлерде Корнелә бир гөрнүш аян болуп, өз янына Худайың бир перишдесиниң геленини айдың гөрди. Перишде: «Эй, Корнелий!» дийип сесленди.

⁴ Корнелий горкы ичинде гөзлерини оңа дикип: «Гулак асян!» дийди. Перишде оңа: «Сениң Худая эден догаларың, гарыплара пайлан садакаларың Онуң назарында кабул болды.

⁵ Инди Яфо бирнәче адам ёлла-да, Петрус лакамлы Симуны гетирт.

⁶ Бу адам деңзиң якасында яшаян Симун диен дери эйлейҗиниң мыхманыдыр» дийди.

⁷ Өзи билен геплешен перишде гиденден соң, Корнелий хызматкәрлеринден икисини ве хемише янында болян бир таква эсгери чагырды.

⁸ Болуп гечен әхли зады гүррүң берип, олары Яфо ёллады.

Петрус гөрнүш гөрйәр

⁹ Эртеси гүн олар ёл йөрәп, шәхере голайланларында, гүнортан он ики төвереги Петрус Худая дога этмек үчин үчеге чыкыпды.

¹⁰ Ол аҗыкды ве бир затлар иеси гелди. Нахар тайярланярка, оңа бир гөрнүш аян болды.

¹¹ Ол гөгүң ачылып, уллакан сачага меңзеш бир задың дөрт бурчундан ашак ере салланып гелйәнини гөрди.

¹² Онуң ичинде ер йүзүнде яшаян хер дүрли дөрт аяклы хайванлар, сүйрениҗилер ве гушлар барды.

¹³ Бир сес оңа: «Петрус! Тур, дамакларыны чал-да, ий!» дийди.

¹⁴ Петрус: «Ёк, Реббим! Яхуды канунына гөрә, мен хич хачан харам зат иен дәлдирин» дийди.

¹⁵ Сес ене икинҗи гезек оңа: «Худайың халал диен затларына сен харам диймегин» дийди.

¹⁶ Бу үч гезек гайталанды-да, сачак гөз-ачып юмасы салымда гөге алынды.

¹⁷ Петрус бу гөрнүшиң нәмедигине гең галып дурка, ине, Корнелиниң ёллан адамлары Симуның өйүни сорап, гапа гелдилер.

¹⁸ Олар гыгырып: «Петрус лакамлы Симун диен мыхман шу ердеми?» дийип сорадылар.

¹⁹ Петрус хенизем бу гөрнүш барада ойланып отырка, Мукаддес Рух оңа: «Ине, үч адам сени гөзләп йөр.

²⁰ Тур, ашак дүш, икирҗиңленме-де, олар билен гит. Олары Мен ёлладым» дийди.

²¹ Петрус адамларың янына гелип: «Гөзлейән адамыңыз мен. Нәме үчин гелдиңиз?» дийди.

²² Олар: «Бизи йүзбашы Корнелий иберди. Ол догры ве Реббе сежде эдйән адам, яхуды халкының арасында хем онуң абрайы улудыр. Худайың бир перишдеси оңа: „Петрусы өйүңе чагырып, онуң айтҗак сөзлерини диңле“ дийип буйрук берипдир» дийдилер.

²³ Петрус олары өе чагырып мыхман алды. Шол гүнүң эртеси Петрус олар билен ёла дүшди. Яфолы доганларың-да кәбири онуң билен гитди.

Петрус Корнелиниң өйүнде

²⁴ Эртеси гүн олар Кайсария бардылар. Корнелий хем доган-гарындашларыны, якын достларыны үйшүрип, олара гарашып отырды.

²⁵ Петрус өе гиренде, Корнелий онуң өңүнден чыкды-да, аягына йыкылып, оңа тагзым этди.

²⁶ Эмма Петрус оңа: «Тур ериңден! Мен хем сениң ялы бир ынсан» дийди.

²⁷ Петрус онуң билен гүррүңлешип, ичери гиренде, көп адамларың йыгнанандыгыны гөрди.

²⁸ Петрус олара: «Бир яхудының башга миллетден болан бири билен гатнашмагының я-да онуң янына гитмегиниң бизиң канунымыза гаршыдыгыны өзүңиз билйәнсиңиз. Эмма Худай маңа хич бир адама харам диймели дәлдигими аян этди.

²⁹ Шонуң үчин хем чагырыланымда, икирҗиңленмән гайтдым. Инди мени нәме үчин чагырандыгыңызы сорап билеринми?» дийди.

³⁰ Корнелий шейле җогап берди: «Үч гүн мундан озал шу вагтлар агзым беклиди. Өйлән сагат үчлерде өйүмде Худая дога-дилег эдйәрдим. Ине, бирденкә гаршымда ловурдаян эшикде бир адам пейда болды. Ол маңа:

³¹ „Сениң Худая эден догаларың, гарыплара пайлан садакаларың Онуң назарында кабул болды.

³² Инди Яфо адам ёлла-да, Петрус лакамлы Симуны чагырт. Бу адам деңзиң якасында яшаян Симун диен дери эйлейҗиниң мыхманыдыр“ дийди.

³³ Шейлеликде, мен дессине саңа адам ёлладым, сен-де гелип ягшы этдиң. Ине, хеммәмиз Худайың саңа айтмагы буйран әхли задыны эшитмек үчин, Онуң хузурына топландык».

³⁴ Шонда Петрус сөзе башлап, шейле дийди: «Мен, хакыкатдан-да, Худайың хич киме тарапгөйлик этмейәндигине гөз етирдим.

³⁵ Гайтам, Ол Өзүнден горканы ве догры иш эден хер кеси миллетине гарамаздан кабул эдйәндир.

³⁶ Худай ысрайыл халкына иберен бу парахатлык Хош Хабарыны хеммелериң Ребби болан Иса Месих аркалы ыглан этди.

³⁷ Яхя сува чүмдүрилиш барада вагыз этмәге башландан соңра, Җелиледен башлап, бүтин Яхудыяда болан вакалардан хабарыңыз бардыр.

³⁸ Худайың насыралы Исаны Мукаддес Рух ве гүйч-гудрат билен долдурып, Оны сайлап-сечендигини билйәнсиңиз. Иса чар тарапа айланып, көп ягшы ишлер этди, иблисиң хөкмүрованлыгындан эҗир чекйәнлериң барына шыпа берди, себәби Худай Онуң биленди.

³⁹ Биз Онуң Яхудыяда, Иерусалимде битирен ишлериниң барына шаятдырыс. Оны хача чүйләп өлдүрдилер,

⁴⁰ эмма Худай үчүленҗи гүн Исаны дирелтди.

⁴¹ Ол Исаны хеммелере дәл-де, диңе бизе гөрнер ялы этди. Себәби Худай бизи Иса хакда шаятлык этмегимиз үчин сайлады. Ол диреленден соң, биз Онуң билен биле нахарландык.

⁴² Иса Өзүниң Худайың ырадасы билен дирилериң хем, өлүлериң хем Казысыдыгыны халка вагыз эдип, шаятлык этмегимизи буюрды.

⁴³ Әхли пыгамберлер хем Иса хакда шаятлык этдилер. Иса иман эден хер бир адамың гүнәлериниң Онуң адының хатырасына багышланҗакдыгыны айтдылар».

⁴⁴ Петрус бу сөзлери хениз айдып дурка, оны диңлейәнлериң хеммесиниң үстүне Мукаддес Рух инди.

⁴⁵ Петрус билен биле гелен яхуды иманлылар Мукаддес Рухуң пешгешиниң кесеки миллетлериң үстүне-де иненини гөрүп гең галдылар,

⁴⁶ себәби оларың нәмәлим диллерде гепләп, Худайы өвги билен бейгелдишлерини гөрдүлер. Шонда Петрус:

⁴⁷ «Эдил бизиң ялы, бу адамлар хем Мукаддес Рухы кабул этдилер. Инди булары сува чүмдүрилмегини ким гадаган эдип билер?» дийди.

⁴⁸ Онсоң Петрус оларың Иса Месихиң ады билен сува чүмдүрилмегини буюрды. Соңра олар Петрусдан ене бирнәче гүн янларында галмагыны хайыш этдилер.