Нехемя 3 - Мукаддес Китап

3‑нҗи бап Иерусалимиң диварлары тәзеден гуруляр

¹ Онсоң баш руханы Эляшып ве онуң руханы доганлары Гоюн дервезесини тәзеден гуруп, онуң гапыларыны отуртдылар. Онсоң олар дивары Йүзлер диңине ве Хананел диңине ченли гуруп, оны хем Худая багыш этдилер.

² Эляшың гапдалында Ерихоның халкы гурярды. Оларың гапдалында болса Имриниң оглы Закур гурярды.

³ Хасенаның огуллары Балык дервезесини бина этдилер. Олар онуң пүрслерини гоюп, дервезәниң гапыларыны ерине отурдып, нурбатларыны ве килтлерини дакдылар.

⁴ Оларың гапдалындакы дивар бөлүмини Хакосың агтыгы, Урыяның оглы Меремот дикелтди. Оларың гапдалындакы дивар бөлегини Мешезабелиң агтыгы, Берекяның оглы Мешуллам дикелтди. Оларың гапдалындакы дивар бөлегини болса Багананың оглы Садок дикелтди.

⁵ Оларың гапдалындакы дивар бөлегини тековалылар дикелтдилер. Йөне оларың беглери баштутанлары тарапындан белленен иши этмекден йүз өвүрдилер.

⁶ Пасеяның оглы Ёяда билен Бесодяның оглы Мешуллам Көне дервезәни дикелтди. Олар пүрслери гоюп, дервезәниң гапыларыны ерине отурдып, онуң нурбатларыны ве килтлерини дакдылар.

⁷ Оларың гапдалындакы дивар бөлегини гибгонлы Мелатя билен меронотлы Ядон Евфрат дерясының гүнбатарындакы велаятың хөкүмдарының голастындакы Гибгоның ве Миспаның яшайҗылары билен биле дикелтдилер.

⁸ Оларың гапдалындакы дивар бөлегини зергәрлерден Хархаяның оглы Узыел дикелтди. Онуң гапдалында болса атыр ясайҗылардан болан Хананя дивары дикелтди. Олар Иерусалими тә Гиң дивара ченли беркитдилер.

⁹ Оларың гапдалындакы дивар бөлегини Иерусалимиң этрабының ярысының хәкими Хуруң оглы Репая дикелтди.

¹⁰ Оларың гапдалында Харумапың оглы Едая өз өйүниң гаршысындакы дивар бөлегини дикелтди. Онуң гапдалындакы дивар бөлегини Хашабнеяның оглы Хатуш дикелтди.

¹¹ Харымың оглы Малкыя билен Пахатмовабың оглы Хашуп диварың башга бир бөлегини ве Тамдырлар диңини дикелтдилер.

¹² Онуң гапдалындакы дивар бөлегини Иерусалим этрабының галан ярысының хәкими Халлохешиң оглы Шаллум ве онуң гызлары дикелтдилер.

¹³ Ханун ве зановалылар Дере дервезесини дикелдип, онуң гапыларыны отурдып, нурбатларыны ве килтлерини дакдылар. Олар Дөкүн дервезесине ченли диварың мүң тирсек аралыгыны дикелтдилер.

¹⁴ Бейтхакерем этрабының хәкими Рекабың оглы Малкыя Дөкүн дервезесини дикелтди. Ол дервезәни тәзеден бина эдип, онуң гапыларыны отуртды ве нурбатларыны, килтлерини дакды.

¹⁵ Миспа этрабының хәкими Колхозениң оглы Шаллум Булак дервезесини дикелтди. Ол дервезәни тәзеден бина эдип, онуң үстүни басырды, гапыларыны ерине отурдып, онуң нурбатларыны ве килтлерини дакды. Шейле хем ол патыша багының янындакы Шела ховзуның диварыны тә Давут шәхеринден ашак инйән басганчаклара барянча гурды.

¹⁶ Шаллумдан соң Бейтсур этрабының ярысының хәкими Азбугың оглы Нехемя Давут гонамчылыгының гаршысындан тә эмели ховза ве эдермен уршуҗыларың өйүне ченли болан дивары дикелтди.

¹⁷ Онуң гапдалындакы дивар бөлегини левилер дикелтдилер: Банының оглы Рехум онуң гапдалындакы дивары дикелтди; Кегила этрабының ярысының хәкими Хашабя өз этрабы үчин бир дивар бөлегини дикелтди.

¹⁸ Онуң гапдалында оларың гарындашлары, Кегила этрабының ярысының хәкими Хенададың оглы Биннуй бейлеки дивар бөлегини дикелтди.

¹⁹ Биннуйың гапдалында диварың өврүлйән еринден горхана учудының габадында болан диварың бинят дирегини Миспаның хәкими Ешуваның оглы Эзер дикелтди.

²⁰ Эзерден соң диварың өврүлйән еринден, баш руханы Эляшыбың өйүниң гапысына ченли дивары Закайың оглы Барук дикелтди.

²¹ Барукдан соң Эляшыбың өйүниң гапысындан тә өйүң гутарян ерине ченли аралыкдакы дивары Хакосың агтыгы, Урыяның оглы Меремот дикелтди.

²² Меремотдан соң Иерусалимиң төверек-дашындакы ерлерден гелен руханылар диварың бир бөлегини дикелтдилер.

²³ Оларың гапдалында Бенямин билен Хашуп өз өйлериниң габадындакы дивар бөлегини дикелтдилер. Оларың гапдалында Ананяның агтыгы, Магасеяның оглы Азаря өз өйүниң янындакы дивар бөлегини дикелтди.

²⁴ Онуң гапдалында Хенададың оглы Биннуй Азаряның өйүнден диварың өврүмине – бурча ченли болан дивар бөлегини дикелтди.

^25-26 Узайың оглы Палал дивар өврүминиң гаршысыны ве гаравулхана ховлусының янындакы ёкаркы көшгүң диңини дикелтди. Онуң гапдалында Парошың оглы Педая билен Офелде яшаян ыбадатхана хызматкәрлери гүндогарда Сув дервезесиниң габадына ве гаравул диңине ченли аралыкдакы дивар бөлегини дикелтдилер.

²⁷ Онсоң тековалылар бейик гораг диңиниң гаршысындакы Офел диварына ченли болан аралыгы дикелтдилер.

²⁸ Руханылар Ат дервезесинден башлап, демиргазыга тарап херси өз өйлериниң габадындакы дивары дикелтдилер.

²⁹ Оларың гапдалында Иммериң оглы Садок өз өйүниң габадындакы дивар бөлегини дикелтди. Онуң гапдалында Гүндогар дервезесини саклаян Шеканяның оглы Шемагя бир дивар бөлегини дикелтди.

³⁰ Онуң гапдалындакы дивар бөлүмини Шелемяның оглы Хананя билен Салапың алтынҗы оглы Ханун дикелтдилер. Оларың гапдалында Берекяның оглы Мешуллам өз өйүниң габадындакы дивар бөлегини дикелтди.

³¹ Онуң гапдалындакы дивар бөлүмини зергәрлерден болан Малкыя Гөзден гечириш дервезесиниң гаршысында болан ыбадатхана хызматкәрлериниң хем-де тәҗирлериң өйүне ченли болан аралыгы ве бурчдакы ёкаркы отага ченли болан аралыгы дикелтди.

³² Бурчда ерлешен ёкаркы отаг билен Гоюн дервезесиниң аралыгындакы дивар бөлегини зергәрлер билен тәҗирлер дикелтдилер.