Nahum 3 - Мукаддес Китап

3‑нҗи бап

¹ Ганхор шәхериң дат гүнүне! Кеззаплыкдан, олҗалардан долусың, түкенмездир сениң талаңчылыгың!

² Гамчы сеси, араба тигирлериниң такырдысы, чапян атларыңдыр сөвеш арабаларының тапырдысы!

³ Атлы гошун хүҗүм эдйәр, гылыч ялпылдап, найза барк уряр. Үйшмек-үйшмек җесетлер, сан-саҗаксыз ләшлер, маслыклара бүдрейәрлер!

⁴ Буларың бары зынахорлык эдендигиң үчин, җадыгөйлигиң билен халклары хеләкчилиге элтендигиң үчин, җадылык билен миллетлери гул эдендигиң үчин, гөзбагчылык билен халклары өзүңе чекендигиң үчин болды.

⁵ Хөкмүрован Реб: «Мен сениң душманыңдырын, эй, Ниневе халкы!» диййәр. «Эшигиңи сыпырып, миллетлере ялаңачлыгыңы гөркезерин, патышалыклара айбыңы ачарын.

⁶ Үстүңе неҗислик ягдырып, иле рысва эдерин, томаша өврерин.

⁷ Сени гөренлериң бары гачып, шейле диерлер: „Ниневе хараба өврүлди, Ким онуң ясыны тутар?“ Саңа теселли берҗеклери ниреден тапайын?»

⁸ Төвереги сув билен гуршалан, Нилиң кенарындакы деңиз галалы, сув беркитмели Но-Амондан нирәң артык?

⁹ Эфиопия билен Мүсүр онуң чәксиз гүйҗүди, Пут ве Ливия онуң көмекчилериди.

¹⁰ Эмма шонда-да Но-Амон халкы тутулып сүргүн эдилди, чагалары хер көчәниң башында даша урлуп өлдүрилди. Онуң эмелдарлары үчин биҗе атылды, бейик адамлар зынҗырланды.

¹¹ Сен хем, эй, Ниневе, серхош болуп, хушуңдан гидип йыкыларсың, душманлардан өзүңе пена агтарарсың.

¹² Әхли галаларың инҗир агаҗының илки етишен мивеси киминдир; силкелененде, иййәниң агзына дүшйәр.

¹³ Эсгерлериңе серет, олар араңызда хелей ялыдырлар! Юрдуңың дервезелери душманларыңа гуҗак ачяр, дервезәң килтлери күле өврүлди.

¹⁴ Габав дөври үчин сув чек, галаларыңы беркит, лайы депеләп, палчыгы эйле, керпич галыбыны тайынла!

¹⁵ Шол ерде янып күл боларсың, сен гылычдан өлерсиң, сени чекиртгәниң экини ялмайшы дек ялмар. Чекиртгелерче көпел, тенечирлерче өрңе!

¹⁶ Сөвдагәрлериң саныны көпелтдиң, олар гөклердәки йылдызлардан-да көп, эмма олар чекиртге дей үлкәңи талап, учуп гидйәрлер.

¹⁷ Горагчыларың тенечирлер, баштутанларың чекиртге сүрүлери ялы, олар Гүнүң сергин чагында хаятларда орнашып, Гүн доган бадына гайып болярлар, ниредедиклерини билйән ёкдур.

¹⁸ Эй, Ашур шасы, баштутанларың гөзлери юмландыр. Танымал адамларың ука гидендир, халкың даглара дагады, олары бир ере җемләре хич ким ёк.

¹⁹ Дердиңе дерман болмаз, яраларың гутулмаз, сениң башыңа геленини эшиден хер кес бегенҗинден эл чарпар. Чүнки сениң дынувсыз зулумыңдан хей, гачып гутулан болдумы?