Nahum 2 - Мукаддес Китап

2‑нҗи бап Ниневәниң сынмагы

¹ Эй, Ниневе, юмруҗы гаршыңа чыкды, галаларыңы гора, ёлы гаравулла. Билиңи берк гушап, бар гүйҗүңи җемле.

² Душманлар Ысрайылы талап, хараба өврүп, үзүм шахалары дек сыпыран болсалар-да, Реб Якубың шөхратыны, Ысрайылың бейиклигини өңкүси ялы дикелдер.

³ Душман сөвешиҗилериң галканы чым гызылдыр, эсгерлериниң лыбасы гойы гырмызыдыр. Тайярлык гүнүнде сөвеш арабаларының тигирлери от сачяр, сан-саҗаксыз найзалар ховада галгаярлар.

⁴ Сөвеш арабалары көчелерде дәлирән дек чапышярлар, мейданчаларда чар тарапа чарп урярлар. Шамчыраглар кимин шугла сачып, йылдырым дейин окдурылярлар.

⁵ Ниневе шасы сайлама эсгерлерини топлаяр, олар ёлда бүдрейәрлер, хүҗүм эдйәнлер гала тарап окдурылярлар. Гермевлер гуруляр,

⁶ деря дервезелери ачыляр, көшк опурыляр.

⁷ Айдылан берҗай болды, шәхер сүргүн эдилди, кенизлери гумры дейин налап, гурсакларына урдулар.

⁸ Сувы акып гидйән ховдан ялыдыр Ниневе, «Дуруң, дуруң!» дийип гыгырышярлар, эмма ыза бакян ёкдур.

⁹ Күмши талаң, Алтыны талаң! Түкениксиз хазына! Уммасыз байлык!

¹⁰ Чоларды, харабалыга өврүлди, вейран болды! Йүреклер эзилип, дызлар титрейәр, хеммәниң сүңңи сарсып, йүзлери чув ак боляр.

¹¹ Арсланларың сүренине, яш арсланларың ерине нәме болды? Арсланларың барян, чага арсланларың горкусыз гезйән ерине нәме болды?

¹² Арсланлар өз чагалары үчин етерлик ав авладылар, эне арсланлар үчин авуны богуп өлдүрдилер, говакларыны авдан, сүренлерини олҗадан долдурдылар.

¹³ «Мен саңа душмандырын». «Сөвеш арабаларыңы түтедип якарын, яш ширлериң гылычдан гырларлар, ер йүзүнден топлан олҗаларыңы ёк эдерин, чапарларыңың сеси эшидилмез асла». Муны Хөкмүрован Реб айдяндыр.