Nahum 1 - Мукаддес Китап

1‑нҗи бап

¹ Ниневе шәхери хакындакы пыгамберлик; элкошлы Нахум өзүне гелен аянлыгы язып алды.

Реббиң Ниневә гаршы гахар-газабы

² Реб габанҗаң ве өч алян Худайдыр, Ол ар аляндыр ве газапдан долудыр, душманларындан өч аляндыр, ягыларына гаршы газапланяндыр.

³ Реб гиң гөвүнли ве гудратлыдыр, Ол языклыны җезасыз гоймаз. Реббиң ёлы тупанлы ве гайлыдыр, булутлар Онуң аяк тозудыр.

⁴ Ол буйругы билен деңизлери гурадяр, бүтин дерялары такырадяр, Башан ве Кармел даглары соляр, Ливаның гүллери соляр.

⁵ Реббиң өңүнде даглар титрейәр, байырлыклар эрейәр, ер сарсяр, дүнйә илаты билен лерзана гелйәр.

⁶ Ким Онуң гахарына гаршы дуруп билйәр? Ким Онуң ловлаян газабына чыдам эдйәр? Реббиң газабы от дейин инйәр, өңүнде гаялар күл-пеекун боляр.

⁷ Реб ягшыдыр, бетбагтлык гүнүнде халкына пенадыр; Ол Өз пенасындакылары гораяндыр.

⁸ Эмма Ол Ниневәни дашгын сил билен ёк эдер, душманларыны гараңкылыга ковалар.

⁹ Реббиң гаршысына нәме дилдүвшүк гурасалар-да, Ол хеммесини ёк эдер, мушакгат икиленч инмез.

¹⁰ Душманлар тикенлер дей бири-бирлерине чырмашып, аракхорлар кимин серхошдырлар; гуры саман дейин якылып ташланарлар.

¹¹ Реббе гаршы яманлык гураян, пислиги маслахат берйән сизден чыкды, эй, ниневелилер!

Яхуда үчин хош хабар

¹² Реб халкына шейле диййәр: «Ашурлар көп ве гүйчли болсалар-да, гырлып, ёк болуп гидерлер. Эй, Яхуда, сизе эҗир чекдиренем болсам, мундан артык эҗир чекдирмерин.

¹³ Сизи Ашурың боюнтырыгындан азат эдерин, гандалларыңызы кесип ташларын».

¹⁴ Реб сиз барада шейле буйрук берйәр: «Адыңызы довам этдирер ялы, сизден зүрят өнмез. Худайларыңызың бутханасындакы ойма, гуйма бутлары ёк эдерин. Сизиң габрыңызы тайынларын, чүнки сиз йигренҗисиңиз».

¹⁵ Ине, сизе хош хабар гетирйән, парахатчылыгы җар эдйән чапар даглардан ашып гелйәр. Эй, яхуда халкы, байрамларыңы белле, берен вадаларыңы берҗай эт. Инди пис миллет үстүңизе хүҗүм этмез, чүнки олар бүтинлей ёк эдилерлер.