Nagmalar 8 - Мукаддес Китап

8‑нҗи бап

¹ Кәшгә энемиң гөвсүнден эмен агам дей болсадың маңа! Дашарда душанымда, өпердим сени, хич ким мени язгармазды.

² Өңүңе дүшүп, энемиң өйүне гетирердим сени, өвүт берердиң сен маңа. Хошбой ыслы шерапдан, энарларымың сувундан ичирердим саңа.

³ Сол эли келләмиң астында, Гуҗаклаяр мени саг эли билен.

⁴ Эй, Иерусалим гызлары, сизе ялбарярын: өзи ислейәнчә ышкы оярмаң, бирахатландырмаң!

Гызың бойдашлары:

⁵ Ярына сөенип, чөлден чыкып гелйән ким? Алма агаҗының астында оярдым сени. Энең шол ерде дүнйә индерди сени, ол шол ерде агыры чекип, догурды сени.

Гыз:

⁶ Йүрегиңде, голуңда сакла мени мөхүр дей; чүнки ышк өлүм дей гүйчли, габанҗаңлык габыр дей ёвуз. Ышкың ялны отлы ялындыр, ловлаян ялындыр ол.

⁷ Ышкы не бол сувлар сөндүрер, не-де дерялар оны гарк эдип билер. Ынсан ышк үчин бары-ёгуны берсе-де, ол йигренч билен рет эдилерди.

Гызың бойдашлары:

⁸ Кичи уям бар, мәмелери хениз төзленмедик, уямыза сөз айдылан гүни онуң үчин нәме эдерис?

⁹ Дивар болан болсады ол, үстүнде күмүш диңлер гурардык, гапы болан болсады, оны кедр агаҗына гаплардык.

Гыз:

¹⁰ Мен бир дивар, гөвүслерим-де диңлер дей. Шоңа гөрә ярымың гөзүне кәмил гөрүнйән мен.

¹¹ Сүлейманың Багалхамонда үзүм багы барды, оны сакчылара табшырды ол; херси хасыл үчин мүң күмүш теңңе бермелиди.

¹² Мениң-де үзүм багым өзүмиңкидир; эй, Сүлейман, мүң теңңе сениңки болсун, ики йүз күмүш хасылың сакчыларыныңкы болсун!

Йигит:

¹³ Эй, багларда месген тутан! Ёлдашларым овазыңы диңлейәрлер; мен-де овазыңы эшидейин.

Гыз:

¹⁴ Ылга, эй, ярым! Барк урян дагларың үстүнде җерен дей, кейик овлагы дей болгун.