Nagmalar 7 - Мукаддес Китап

7‑нҗи бап Гызың бойдашлары:

¹ Долан, эй, шуламлы гыз, долан! Долан, саңа бакалы, долан. Ики топарың тансына томаша эдйән дей, шуламлы гыза бакҗаксыңыз нәме үчин?

Йигит:

² Не гөзел чарыклы аякларың, эй, асылзада гызы! Бутларың өкде зергәриң элинден чыкан гөвхер мысалы.

³ Гарышык шераплы хич эгсилмез ша кәсе мысалыдыр гөбегиң. Гарның чигилдемлере гушанан бугдай топбагына меңзейәр.

⁴ Экиз җерен овлагына огшаяр ики гөвсүң.

⁵ Бойнуң пил сүңкүнден эдилен диң дей, гөзлериң Батраббим дервезесиниң янындакы Хешбон ховузлары дей. Бурнуң Дамаска бакып дуран Ливан диңи дей.

⁶ Башың Кармел дагы дей дик болуп, зүлплериң беневшедир, ша олара бенди болды.

⁷ Сен ненеңси гөзел, ненеңси хошрой, эй, мылакатлы дилдарым!

⁸ Боюң серви агаҗына, гөвүслериң үзүм салкымларына меңзейәр.

⁹ Серви агаҗына чыкып, шахаларындан япышайын дийдим. Гөвүслериң үзүм салкымлары дей, демиң алмалар дей хошбой,

¹⁰ Додакларың сайлама шерап дей леззет эчилсин. Шерап ярым үчин аксын, уклап ятанларың додакларындан сүзүлсин.

Гыз:

¹¹ Мен ярымыңкы, ол маңа майыл.

¹² Эй, ярым, гиң сәхра чыкалы, гел; гел, оба гиҗелерине сейил эдели.

¹³ Ир сәхер үзүм багларына гидели, гөрели, гунчалапмы, гүлләпми үзүм, хем-де нар. Шол ерде ышкымы багыш эдерин саңа.

¹⁴ Мандрагораларың ысы барк уряр, гапымызда тәзе хем гурадылан дүрли сайлама мивелер бар, олары сең үчин сакладым, эй, ярым.