Nagmalar 6 - Мукаддес Китап

6-нҗы бап Гызың бойдашлары:

¹ Ярың нирә гитди, эй, гөзеллериң гөзели? Хайсы яна йөнелди ол? Оны ызлалы сениң билен.

Гыз:

² Ярым өз багына, атыр сачян гүлханасына, багларда сүрүсини бакмага, чигилдемлер йыгмага гитди.

³ Ярым мениңки, мен онуңкы; сүрүсини чигилдемлериң арасында бакяр ол.

Йигит:

⁴ Эй, дилдарым, Тирса шәхери дей гөзелсиң сен, хошройсың Иерусалим дей, туглы гошун дей шөвкетли.

⁵ Гөзлериңи менден сов, мен олара бенди! Гилгат дагындан инип гелйән гечи сүрүсине огшаяр сачың.

⁶ Гыркылып, сувдан чыкып гелйән гоюн сүрүсине огшаяр дишлериң. Әхлиси экизлидир, ялкы дәлдир олар.

⁷ Бүренчекде гизленен яңаклар энара меңзейәр.

⁸ Шаның алтмыш аялы бар хем сегсен гырнагы, гызлар-да сан-саҗаксыздыр.

⁹ Гөгерчинимиң, пәкизәмиң болса деңи-тайы ёк, энесиниң эзиз гызы ол, найбашысы ол. Гызлар оны гөрүп, оңа багтлы дийдилер; ша аялларыдыр гырнаклары оны өвдүлер.

¹⁰ Шапак дей ялпылдаян, Ай дек гөзел, Гүн дей парлаян, туглы гошун дей шөвкетли ким бу?

¹¹ Җүлгәниң хасылына серетмәге, үзүм багларының гунчаларыны, нарларың гүллерини гөрмәге хоз багына гитдим.

¹² Билмән галдым, ислег-хыҗувым мени нәдип шанлы халкымың сөвеш арабаларына мүндүрди.